26
Ọnu k'ẹto, Jobu eyeru Bilidadu
1 Tọ dụ iya bụ; Jobu abya eyee ọnu; sụ Bilidadu:
2 “Lewaru egbe mkpu,
ị gbaru onye ẹ-te nwedu ụvo, nọ iya nụ!
Lewaru egbe adzọdzo,
ị dzọo onye ẹka tsụshiru ụme.
3 Lewaru ẹge i shi
akpọ-ziru onye
mmamiphe pehuru ụzo;
bya emee t'ẹnya saa ya ọkpobe asasa.
4 ?Bụ onye yetaru ngu ẹka
l'iphemiphe ọbule ono,
i kfushiru ono?
?Bụ onye b'i shi l'ọnu iya kfushia iya?
5 Ndu nwụhuru anwụhu;
bẹ ejekwa ntakfuru;
mbụ ndu maa, bu lẹ
mkpuli mini;
mẹ ndu ọphu bu l'ime mini.
6 Alị-maa dabukwaru
ebedere-badara l'ifu Nchileke.
Abádọnu, bụ iya bụ
Nwa-Emebyi adaburu iya abadoro l'ifu.
7 Akpamigwe ọphu nọ
l'ụzo isheli bụ iya gbaru iya ógodo;
tọ dụ iphe ọ tukoberu l'eli iya.
O meru mgboko;
to nwe iphe o koberu iya.
8 O gude urukpu kechishia mini;
ọphu ẹra mini ono
'emejedu urukpu ono t'ọ gbafuhu.
9 Ọ bụ iya egudeje urukpu
domia aba-eze iya;
wota urukpu nk'iya
phụ-kputa iya l'eli.
10 O nweru ógé,
ọ gbaru l'eli eze ẹnyimu.
Ógé ono abụru iphe,
o gude kpaaru iphoro yẹle ọchi ókè.
11 Ọobuje; ọ -baa mba;
itso, gude igwe anmahu jijiji.
12 Ọ bụ ike iya b'o gude
mee eze ẹnyimu; yo deru guu.
Yọ bụru mmamiphe iya
b'o gude gbua ẹjo-anụ-mini ono;
mbụ Réhabu pyaapyaa.
13 Ọ bụ ume, ọ tụru;
bẹ meru akpamigwe;
yọ nwua too.
Yọ bụru ẹka iya
b'o gude nmafua
ẹjo agwọ ono,
awụ swarịswari ono ẹpho.
14 Iphemiphe ọbule ono
bụtsua ọtsota ọnu l'iphe,
Nchileke emeje.
Ọbule ọda iya ta dụdu ẹke oojebeje.
Ọlobu; ike iya ono,
adaje l'ọ bụ egbe-igwe ono;
?bụ onye bẹ oo-doghe ẹnya?”