30
Iphe-ẹhuka Jobu kẹ nta-a
1 “Obenu lẹ nta-a;
bẹ ẹphe achịwa mu ọchi;
mbụ ụnwegirima,
mu heru l'ẹka;
mbụ ndu nna ẹphe bụ
ndu, mu t'aga ekwedu
t'ẹphe tsoru nkụta,
e cheru mu atụru.
2 Ike ta dụhedu ẹphe;
ọphu a-bụkwanu l'ẹphe a-baru mu uru.
Mbụ l'ụvo gbe gvụshi ẹphe.
3 Ụkpa-mkpẹre;
mẹ ẹgu meru ẹphe;
ẹphe agbaa ẹji l'ẹnya.
O meru ẹphe;
ẹphe anọduje agha
ngvudangvu lẹ
mgbẹgu l'ẹnyashi;
l'egvu ọnu l'alị ọkponku;
l'ẹke ẹphe aka ẹka ịkarikari.
4 Ẹphe etsojeru ẹgbudu
l'akpakọ mkpẹkwo,
atsọ únú-únú l'ata.
Yọ bụru iwobe;
bẹ ẹphe avụkoje l'eri.
5 Ndu-a bụ ndu
e bufuru ebufu
t'ẹphe ba anọshi
l'ẹke madzụ ibe ẹphe nọ;
l'atụru ẹphe ụzu
l'ẹ̀phè -bụ ndu iphura.
6 E yebutaru ẹphe;
ẹphe alatsụa lẹ
mkpoworo nggele,
mini tashịhutsuaru atashịhu je eburu;
mẹ lẹ mgbaku eze mkpuma
l'ime ime ọgba ime alị.
7 Ẹphe anọduje l'ime ẹgbudu
l'ẹke ono l'ara ngarongarongaro;
kwọnwua l'ẹgbudu ẹke ono.
8 Ẹphe bụ ndu mmanu,
ẹ-te nwedu iphe, ẹphe bụ;
ndu e bufuru ebufu lẹ mkpụkpu.
9 Ọ bụ ndu dụ ẹge ono;
bẹ ụnwu ẹphe gbe bya
egudewa mu nụ agụ egvu.
Mu abya abụwaru nụ iphe, ẹphe
gude aghọ ụgho-okfu.
10 Mu dụ ẹphe oyi;
ẹphe agbaru mu nkụsa;
ọphu ọotsudu ẹphe l'ẹhu
ọnodu mu l'ifu gbụa ọnu-mini.
11 Ishi iya abụru lẹ
Nchileke mewaru;
ẹnwu agvụ mu l'ẹhu;
yewa mu ọru;
yewa mu ọru;
tọ dụhe iphe,
ẹphe asọjekwadu nsọ
ọnodu mu l'ifu mee.
12 Ẹphe anọduje abya ọgu l'ẹke mu nọ.
Ẹphe kweshiru ọ́nyà
dobe tẹ mu bya eye ọkpa;
bya agbaa ose-ọgu
gude yebuta mu.
13 Ẹphe egudeje iphe
tọ-chishia mu ụzo;
l'ese t'ẹphe wofu mu;
tọ dụ onye agbọru ẹphe chaa.
14 Ẹphe shiru l'owere bata;
ẹphe azaa l'awụpyabe mu.
15 Egvu gudewaru mu;
ugvu, e shi akwabẹje mu
ephukashihuwa l'ọ bụ phẹrephere.
Iphe, mu shi nweru
emishihuwa l'ọ bụ urukpu.
16 Nta-a bẹ iphe-ẹhuka
kewaru mu kepyaa.
Nke mu gvụakwaru.
17 O -rua l'ẹnyashi;
ọkpu, nọ mu l'ẹhu
amịkota mu a.
Ẹhuka iya ta
anọnyajedua zee ẹka.
18 Nchileke gudewa ike iya,
dụ egvu zụ mu l'ẹkpiri.
Ọ lọtaru mu l'olu uwe mu;
kepyia mu ẹkpiri.
19 Ọ patawaru mu tụa l'ẹpoto;
mu abụwaru-a ẹja;
mẹ ntụ.
20 Mu ara l'araku nggụbe
Nchileke; tii yeeru mu ọnu;
mu -gbeshi vudo evudo;
nggu achalẹ mu-a ẹnya achacha.
21 Ị byaru bya aghachiru mu ifu;
l'anụ mu chịkikfuu.
I gudewa ike ngu l'ọ ha byia mu ẹka.
22 Ị paliru mu oreke-imeli;
woru mu tụaru phẹrephere.
Ịipanga mu apanga l'ọ bụ
onye oke phẹrephere apa.
23 Mu mawaru l'ị kpụwa mu ala maa.
Ị kpụwa mu ala ẹke ono,
e doberu iphe bụ ndu nọ ndzụ ono.
24 Ẹ tọ dụdu onye aphụje
onye ike gvụru;
jeshia ya otso ọgu;
l'ẹke oochi mkpu
t'a gbaaru iya mkpu.
25 ?Mu te shidunua arajẹru
onye iphe-ẹhuka byaru ẹkwa.
?Mu te shidunua agụje
aphụ onye ụkpa.
26 Obenu lẹ mu leru ẹnya iphe-ọma;
yọ bụru ẹjo iya bẹ mu phụru.
Mu elee ẹnya iphoro;
yọ bụru ọchi bẹ byaru nụ.
27 Iphe, anọduje atapyashị
mu ime ẹhu te kwedu mu ahaha;
mbọku-mbọku kpọ
abụjelephu iphe-ẹhuka.
28 Mu tsowaru ghaphee;
bya anwakputa;
tọ bụ l'ọo anwụ chiru mu;
mu anwakputa.
Mu nọwa l'edzudzu ọha
l'echi mkpu t'a gbaaru mu mkpu.
29 Olu mu adawa l'ọ bụ olu nkụta-ọswa;
l'adakwaphu l'ọ bụ kẹ enyi-nwẹnu.
30 Akpọ, nọ mu l'ẹhu
jihuwaru kpalungu;
l'aswashịhu aswashịhu.
Nta-a bẹ ẹhu erekotale mu phụ ọku.
31 Ogumogu, mu shi
akpọje bụwa mu nụ aphụ.
Opu, mu shi aphụje
egbe adawa nụ l'ọ bụ ụzu-ẹkwa.”