32
Ọnu, Elihu eye
1 Tọ dụ iya bụ; ụmadzu ẹto ono ahaa ntụtego ono, ẹphe lẹ Jobu atụ ono; kẹ lẹ Jobu te kwetadu l'o nweru iphe ya meru ẹji. 2 Ya ndono; Elihu avọru ọku ghụa ẹhu l'ẹke Jobu nọ; kẹle Jobu pataru onwiya kogabe l'ọ bụ yẹbe Jobu bụ onye doberu ẹka ndoo; l'ẹ tọ bụdu Nchileke. Elihu ono bụ nwatibe Barakelu, bụ onye Buzu; onye eri Ramu. 3 Elihu avọkwaruphu ọku ghụa ẹhu l'ẹke ndu ọ̀nyà Jobu ono nọ; ẹphe ẹto; okfu l'ẹphe ta dụdu ike gbanwee Jobu okfu; gbe anmakwa iya rụ ikpe. 4 Iphe, kparu iphe, Elihu daru ashị keshinu ono bụ l'ọo yẹbedua bụ nwata l'ẹke ndu ọphu nọ. 5 Yọ bya aphụ l'ụmadzu ẹto ọphu ta mahẹdu iphe, ẹphe e-kfu; yo ghulahaa ya eghughu.
6 Tọ dụ iya bụ;
Elihu Barakẹlu, bụ onye Buzu asụ ẹphe:
“Mbẹdua kwa nwata;
unubẹdua abụru ọgurenya.
Ọ kwa iya kparu iphe,
mu shi atsụ egvu;
l'atsọkwaphu unu ẹnya
okfuru unu nwẹge ya mataberu.
7 Mu shi arị tẹ ndu bụ ọgurenya kfua;
ndu ọphu kawaru nka
ezia ayi mmamiphe.
8 Obenu l'ọ bụ ume,
nọ madzụ l'ẹhu;
mbụ ume
Ọkaribe-Kakọta-Ike;
bẹ emeje tẹ madzụ maru mmamiphe.
9 Mmamiphe ta bụkwa l'ọgurenya;
ọphu iphe-odo-ẹnya 'abụkwa l'ọka nka.
10 Ọo ya bẹ mu ekfu;
sụ t'unu ngabẹduduru
mu phụ nchị;
tẹ mu kfua nwẹge mu maru.
11 Mu shikpelekwaphu daa ashị;
unu l'ekfu nk'unu.
Mu shi ngabekpelephu
nchị l'ẹke unu achọkashi iphe, unu e-kfu.
12 Mu ngabẹkpooru unu nchị
ọhuma ọhuma;
ọphu ọ dụdu l'unu ha,
onye dụru ike gbanwee Jobu okfu;
tọ dụ unu onye dụru ike saa ya okfu.
13 Unu ba asụkwa l'unu maru mmamiphe;
lẹ Nchileke nwekwaru
ọnu, oo-yeru Jobu;
l'ẹ tọ kwa madzụ b'ọ nọ l'ẹka.
14 Jobu te kfukwaru yeru mu;
ọphu mu 'eyekwanu ọnu ẹge unu yeru.
15 Nta-a bẹ ike gvụwaru ẹphe;
ẹphe ta mahẹ iphe ọdo, ẹphe e-kfu.
16 ?Mu a-da ashị;
kẹ l'ẹphe ta mahẹdu iphe,
ẹphe e-kfu tọo;
mbụ nta-a, ẹphe nmangotsuaru;
ẹphe ta mahẹ ọnu ọdo, ẹphe e-ye-a.
17 Mbẹdua nwekwaru
nwọnu, mu e-ye.
Mu e-kfukwaphu
nwẹge mu maru.
18 Ishi iya abụru l'iphe,
mu e-kfu jiru mu ọnu;
ọkpoma te kwe tẹ mu dobe ọnu ndoo.
19 L'ime onwomu;
bẹ mu dụlephu l'ọ bụ
mẹe, a gbaru ye
l'ekpemu swọ-chia
aswọ-chi.
Mu -dobe ọnu ndoo;
bẹ mu a-gbajahụkwa
l'ọ bụ otumu ọphungu,
e yeru mẹe.
20 Mu e-kfu okfu t'ẹhu gụa mu phengu.
Mu e-kpuha ọnu;
yee ọnu.
21 Ẹ tọ dụdu onye mu agba eyeru;
ọphu ọ dụdu onye mu
aja ajaja-ntsụdekfu;
22 kẹle ndẹge ọja madzụ
ajaja-ntsụdekfu kwọru mu ẹhu;
mẹ onye ono, meru mu
ono ewofu mu ru l'ịpheregede.”