24
1 Bélamu abya aphụa l'iphe, dụ Ojejoje mma bụ t'a gọru ọnu-ọma nụ ndu Ízurẹlu; o jeheduru ọji ẹge ọojijehawa. Iphe, o meru bụ l'o woru ifu ghaa l'ụzo echi-ẹgu. 2 Bélamu abya apalia ẹnya imeli; phụa ndu Ízurẹlu l'ẹke ẹphe kpọbegbaaru ụlo-ẹ́kwà ẹphe l'ikfu l'ikfu. Ume Nchileke abya iya l'ẹhu; 3 yo kfulahaa; sụ:
“Ọwaa iphe Bélamu Beyọ l'ekfu;
Ọ kwa onye ono, e meru;
ẹnya asahụ ono ekfu iya.
4 Ọwaa okfu, onye ono, anụje
okfu, shi l'ẹka Nchileke ono ekfu;
mbụ onye ono, aphụje iphe,
Ọkaribe-Kakọta-Ike ekoshi ono;
mbụ onye ono, adaje kpurumu l'alị;
bya abụru onye e meru; ẹnya asahụ iya.
5 Ẹge ụlo-ẹ́kwà ngu amabe mma;
nggụbe Jékọpu; mbụ ẹke
nggụbe Ízurẹlu bu ebubu!
6 Ọo ẹge nsụda nsụda adụje-a
bụ ẹge ọ sụsaru asụsa.
Ọ dụ l'ọ bụ mgbabu,
a gbaru l'iku ẹnyimu.
Ọ dụ l'ọ bụ oshi alowe,
Ojejoje yeru l'onwiya;
bya adụ l'ọ bụ oshi sida,
gvuru l'iku ẹnyimu.
7 Mini e-shije l'ite-mini Ízurẹlu l'atsọshi atsọshi.
Ẹphe e-nweru mini nweru k'etsubo iya.
Eze ẹphe a-ka eze Agagu.
Alị-eze ẹphe bẹ aa-pali eli.
8 Nchileke dufutaru ẹphe lẹ Íjiputu;
bya emee ẹphe;
ẹphe enweru ọkpehu l'ọ bụ atsụ.
Iphe, bụ mbakeshi ndu
ọphu ẹphe dụ ashị;
bẹ ẹphe e-ripya eripya;
tsua ọkpu ẹphe
yọgiriyogiri.
Ẹphe e-gude arwa ẹphe
nmafushia ẹphe anmafushi.
9 Ízurẹlu nmakpuru anmakpuru;
zẹru l'ọ bụ agụ.
Ọ zẹ l'ọ bụ nne agụ;
?bụ onye a-dụ ike kpatsua ya.
Tẹ iphe, bụ ndu gọru ụnwu
Ízurẹlu ọnu bụkwaru ndu a gọru ọnu.
Tẹ iphe, bụ ndu tụru unu
ọnu bụkwaruphu ndu
a tụru ọnu.”
10 Tọ dụ iya bụ; ẹhu eghulahaa Balaku eghughu l'ẹke Bélamu nọ. Yọ kụa ẹka pamụ; sụ Bélamu: “Nta-a bẹ ya kuru ngu t'ị bya atụaru iya ndu ọhogu iya ọnu; yo gbe bụru ọnu b'ị gọru nụ ẹphe ugbo ẹto-a. 11 Ngwaa; gude ọso gbagbụa lashia nk'unu nta-a! Ya shi rịa kẹ tẹ ya kwabẹ ngu ugvu, ha nshinu; obenu lẹ Ojejoje bẹ nafụwaru ngu ugvu ono.”
12 Bélamu ajị Balaku sụ iya: “?Ya te kfuduru iya ndu i ziru t'ẹphe bya ekua ya; sụ: 13 ‘M'o -ruhuduru Balaku nụ iya ụlo iya ono, mkpọla-ododo mẹ mkpọla-ọcha jiru ejiji ono bẹ ya te emeghatakwa iphe, Ojejoje sụru tẹ ya mee; ya te egudedu uche k'onwiya l'eme iphe, dụ mma; m'ọ kwanụ iphe, dụ ẹji. Ọ bụlephu iphe, Ojejoje kfuru bẹ ya e-kfu.’ 14 Nta-a bẹ ya a-lakfuakwa ndibe iya. Ọle byakwa tẹ ya nmaaru ngu ọkwa iphe, ndu ono e-mekochaa mee ndibe unu lẹ teke nọ l'ifu.”
Okfu k'ẹno, Bélamu nataru l'ẹka Ojejoje
15 Tọ dụ iya bụ; Bélamu
ekfulahaa; sụ:
“?Ọwaa bụ iphe, Bélamu Beyọ ekfu;
mbụ okfu, onye e meru;
ẹnya asahụ asahụ ekfu.
16 Ọwaa bụ okfu, onye ono,
anụje okfu, Nchileke ono
ekfu; mbụ onye ono,
maru iphe,
shi Ọkaribe-Kakọta-Nụ l'ẹka;
mbụ onye ono, aphụje iphe,
Ọkaribe-Kakọta-Ike ekoshi;
onye ono, daru kpurumu;
bya abụleru-a onye ono,
e meru; ẹnya asahụ ono.
17 Ya phụru onye ono;
ẹ-tọ bụdu nta-a.
Ya ele onye ọbu ẹnya;
ọle ẹ tọ nọdu ntse.
Mkpọro eze e-shi
l'ọnu-ụlo Jékọpu lụfuta.
Onye eze a-lụfuta lẹ Ízurẹlu.
Móabu bẹ ọo-tụko
ókè-alị iya rakaa araka;
tụko ụnwu Sheti l'ophu mebyishia.
18 Ndu Édọmu bẹ aa-lụta l'ọgu;
Ọ kwaphụ ẹge ono;
bẹ aa-lụta ndu Séyi,
bụ ndu ọhogu Ízurẹlu.
Obenu lẹ ndu Ízurẹlu;
bẹ a-nọdu aka ike l'eje.
19 Onye ishi e-shi l'ọnu-ụlo
Jékọpu lụfuta;
bya emebyishia ndu ọphu
wafụru nụ lẹ mkpụkpu ono.”
20 Bélamu abya aphụa ndu
Amalẹku; kfushilahaa; sụ:
“Ndu Amalẹku bụ ivuzọ
l'iphe bụ mbakeshi;
obenu l'ẹphe a-bụru
kpurupyata l'ikperazụ.”
21 Yọ bya aphụa ndu Kenu; sụ:
“Ẹke unubẹ ndu Kenu,
bu ebubu b'e meru;
yo shihu kẹ dụngudungu.
Nwamkpu, unu tụru;
bẹ unu tụru l'eli mkpuma.
22 Ọle unubẹ ndu Kenu;
bẹ aa-lụkwa alụlu.
Ndu Asiriya a-kpụko unu lẹ ndzụ.”
23 Bélamu ekfutsua ono; bya asụ:
“?Bụ onye a-nọ ndzụ teke
Nchileke a-nọdu eme iphe ono?
24 Ụgbo-mini e-shi lẹ Kítimu bya;
bya emeshia ndu Asiriya
yẹle ndu Eba ike.
Obenu l'ẹphebedua
a-bụkwaruphu kpurupyata.”
25 Tọ dụ iya bụ; Bélamu ekfutsua ẹge ono; gbeshi; yọ bụru iya alala; Balaku atụgbua lashia.

© 2014 WBT