20
1 Onye angụruma
bụ iphe-iphere b'ọ bụ;
bụru onye ụswo.
Onye ngụru mẹe;
ngụta iya k'ome l'ẹnya ta makwa iphe.
2 Iwe eze adụjekwa l'ọ bụ ẹke agụ ede ekiri;
k'onye ọphu, kpatsuru iya
iwe ọbu agvụakwanua.
3 Onye agbaru okfu ọso;
kwa ùgvù b'ọ kwabẹ onwiya.
Ọ bụ onye eswe
akwagebeje akwagebe ụswo.
4 Onye ẹnyiru ta akọjedu okfu
teke ibe iya akọ.
O -rua teke aakpata iphe akpata;
yo lelahaa taphungu.
5 Iphe madzụ arịebe hakwa ogvu l'ọ bụ ebo.
Ọ kwa onye iphe doru ẹnya atsụtaje iya.
6 Ndiphe adụje l'igwe ajịshi ire l'ẹphe eme ọhuma.
Ọlobu; ?bụ onye b'a maru, e gude ire iya ẹka.
7 Onye doberu ẹka ndoo;
bẹ ụta ta adụjedu l'iphe,
bụ iphe, oome ememe.
Ọ -nọtsua laa; ọnu-ọma abụru k'ụnwu iya.
8 Onye eze -nọdu l'aba-eze iya l'ekpe ikpe;
b'o gudeje ẹnya yọfu
ezi-okfu l'ẹjo-ire.
9 ?Bụ onye a-sụ lẹ ya mewaru;
obu agụa ya iphoro;
tọ dụhe ẹjo iphe, nọ iya l'ẹhu?
10 Ogude iphe, ẹ-ta bụdu
ọkpobe iya tụa ẹra iphe;
mẹ ogude iphe, ẹ-ta bụdu
ọkpobe iya mata iphe amata
tụkokwa bụru akpamara l'ifu Ojejoje.
11 Ọ bụ umere nwata atụje ọnu iya;
?m'ọ bụ ọkpobe nwata;
?tọ mkpọkoro nwata.
12 Nchị, anụ iphe yẹle ẹnya, aphụ ụzo
bụ Ojejoje tụko iya mekota.
13 Be ekunukajekwa mgbẹnya.
Ọdumeka bẹ ịi-bụkwa ụkpa-mkpẹre.
Mụjeru ẹnya; ẹge ii-nweru
nri nweru iya k'etsutsu iya.
14 Onye azụ iphe asụje l'iphe
ya azụ renukaru ire.
Obenu l'ọ -lụfulephu;
yo gude iphe ọbu,
ọ zụru ọbu kulahaa onwiya.
15 Mkpọla-ododo nọ;
mkpuma oke aswa akụru.
Obenu; l'ọnu, ekfu okfu,
ekoshi mmamiphe dụkwa ụko.
16 Madzụ -naa
o-shi-awe-o-shi-awe mkpalẹka;
natakwa iya uwe eli ẹhu iya.
Gude iya t'o ye iphe l'itumo;
m'ọ -bụru onye mba ọdo
b'ọ naru mkpalẹka ọbu.
17 Nri, a kpataru l'ụgho atsọje ẹna teke eeri iya.
Obenu; l'e -megee;
bẹ ọnu abụjeru onye riru iya nụ ẹja ẹja.
18 Ị -chị idzu iphe ii-me; kpajẹedu ishi.
Ọ -bụru l'ị bya oje ọgu;
kpatajẹ-odu ishi t'e koshi ngu ẹge ii-me iya.
19 Kfuru mu; be ekfuru onye ọdo;
ta bụkwa k'onye ntụmatu.
Ọo ya bụ t'i bukwaru ụba yeru ekfurekfu.
20 Onye kọru nna iya;
m'ọ bụ nne iya ọnu
bẹ aa-phụ-nyi urọku iya l'echi-abalị-ìshì.
21 Ẹku, e te tsudu ẹphuru kpata
ta abụjekwaru onye kparu iya nụ
iphe-ọma l'ikperazụ iya.
22 Ba asụkwa: “L'ịi-kfụ madzụ
ụgwo ẹjo iphe, o meru ngu.”
Hakwaa tẹ Ojejoje gbaaru ngu ọdzori.
23 Ogude iphe, ẹ-ta bụdu
ọkpobe iya tụa ẹra iphe;
mẹ ogude iphe, ẹ-ta bụdu
ọkpobe iya mata iphe amata
tụkokwa bụru akpamara l'ifu Ojejoje
24 Keshinu ọphu ọ bụ Ojejoje
atọjeru madzụ ụzo;
?nanụ ẹge madzụ e-me makọtaru
iphe amụebe l'ẹhu iya.
25 Ọ kwa ọgbaru onwonye ọnya;
mbụ madzụ ogude ovovoshi
kwe Ojejoje ụkwa iphe;
l'ẹ b'ọ rị iya arịri;
k'ọphu ẹ tọ wọdu iya.
26 Onye eze, maru iphe afọje
mkpụkpu iya l'ọ bụ onye afọ ereshi;
bya egude iphe eegudeje
etsu witu fọshia ya ndu k'ẹjo iya ono.
27 Obu madzụ bụ iya bụ urọku Ojejoje,
oogudeje atụ ẹhu madzụ yọriyori.
28 Onye eze, yeru ndu ọochi obu;
bya abụru onye ẹphe gude
ire iya ẹka; te nwedu iphe,
iphe-ẹhuka, byaru iya nụ eme iya.
Yọ bụru n-yemobu emeje;
tẹ ọchichi iya ba anga anganga.
29 Ọ bụ ugvu; bụ ike kẹ
ụnwu-okorọbya.
ụnwu-okorọbya.
Ishi-ẹwo abụru mma kẹ ndu bụ ọgurenya.
30 Ẹka, e chiru madzụ;
chifu iya ọnya bẹ eegudeje gọta iya;
t'o sefu ẹka l'ẹjo iphe;
bụru ẹchachi bẹ eegudeje
dozia madzụ ime ẹhu.