5
Egvu-ọma, Dévidi deru nụ onye ishi egvu; t'a phụru opu ye iya
1 Nggụbe Ojejoje;
ngabẹnu nchị nụa olu mu;
ude, mu atsụ erua ngu nchị!
2 Nggụbe Nchileke mu,
bụ Eze mu; ngabẹnu nchị; nụa mkpu,
mu echi echiku ngu;
kẹ l'ọ bụ nggu bẹ mu ekfu anụ.
3 Nggụbe Ojejoje;
ụtsu mbọku-mbọku;
bẹ ịinuje olu mu.
bẹ ịinuje olu mu.
Ụtsu mbọku-mbọku;
bẹ mu ewojeru mkpa mu
dooru ngu giriri l'ifu;
daa ngabẹru ngu.
4 Nchileke; ẹ tị bụdu onye
iphe dụ ẹji adụje mma.
Ọphu iikwejedu tẹ ndu eme
ẹjo iphe nọdu l'ẹke ịino.
5 Ndu eku onwẹphe ẹge ẹphe
ẹ-ta hadu te evudoghekwa ngu l'ifu.
Iphe bụ ndu eme iphe ẹ-ta
adụdu mma dụkwa ngu ashị.
6 Ndu ntụmatu bẹ iimeje t'ẹphe bụru kpurupyata.
Ndu mgbugbu-madzụ;
mẹ ndu ẹjire; bẹ nggụbe
Ojejoje akpọfu akpọfu.
7 Obenu lẹ mbẹdua e-shi lẹ
n-yomobu ngu l'ẹke mu nụ;
abya l'ụlo ngu.
Mu e-gudeje ọtsu egvu;
ghaa ifu l'eze-ụlo ngu, dụ nsọ;
baaru ngu ẹja.
8 Nggụbe Ojejoje;
keshinu ọphu ị bụ onye doberu ẹka ndoo;
duzinua mu ụzo;
l'ọgvu ndu ọhogu mu.
Menua t'o doo mu ẹnya;
mbụ ụzo, ịicho tẹ mu shia.
9 Ẹ tọ dụdu okfu, shi ẹphe
l'ọnu m'ọo nanụ, e gude ẹka.
Iphe jiru ẹphe obu bụ mkpaka.
Ẹphe egudeje ọnu ẹphe aja madzụ ajaja;
obenu l'iphe nọ ẹphe l'obu
anọduje eshi l'ọbu ili, gheru ọnu.
10 Nggụbe Nchileke;
menua t'ẹjo iphe ẹphe
meshiru tukoru ẹphe l'ishi;
tẹ idzu, ẹphe chịru nma ẹphe l'ọ bụ ọnya.
Chịfukota ẹphe Nchileke;
kẹ l'iphe ẹphe meshiru ghatawaru aghata;
shi iya kwa iya phụ
l'ekwefuru ngu íkè!
11 Ọle tẹ ẹhu-ọtso-ẹna bụkwaru
kẹ ndu agbabajẹ ngu l'ime; zeeru ndzụ.
T'egvu ẹhu-ọtso-ẹna bụru
nk'ẹphe jeye lẹ tutu yoyo.
Gbochita ẹphe Nchileke;
k'ọphu iphe bụ ndu yeru
ẹpha ngu obu e-te ẹswa.
12 Ọ bụ nggụbe Ojejoje
agọjeru ọnu-ọma nụ ndu doberu ẹka ndoo.
Iigudeje kẹ l'ẹphe nọ ngu
l'obu gbochita ẹphe.