27
Egvu, Dévidi deru
1 Ọo bụ Ojejoje bụ iphoro,
dụru mu nụ; bya abụru
onye adzọje mu nụ;
?Bụ onye; bẹ mu a-nọdu atsụkwa nụ egvu.
Ọ bụ Ojejoje bụ
ụlo-ozeru-ndzụ mu.
?Bụhunu onye; bẹ mu
a-nọdu atsụ egvu ọdo.
2 Teke ndu ẹjo iya ono;
mbụ ndu ọhogu mu;
mẹ ndu mu dụ ashị zaru
gidigidi bya t'ẹphe vụa anụ mu avụvu;
bẹ ẹphe a-kpakota iphe
dagbushia onwẹphe.
3 Ọ -bụru lẹ ndu sọja nọ-pheru
mu mgburumgburu;
bẹ obu te etedu mu etete.
Mbụ; ọ -bụru lẹ ndu ọhogu
mu wụ-lihuru tso mu ọgu;
bẹ mu a-dakobelee Nchileke.
4 Ọ bụ iphe lanụ kpụu;
bẹ mu arọ Ojejoje;
bụru iphe ono; bẹ mu achọ.
Iphe ọbu bụ tẹ mu nọdu
l'ụlo Ojejoje gbururu jeye
ẹge mu a-nọ-bebe lẹ mgboko-a;
tẹ mu nọdukpelephu egbu
igo l'ọ-dụ-ugvu kẹ Ojejoje;
nọdukwaphu l'eze-ụlo
Nchileke kpatajẹ iya ishi iphe.
5 Kẹle mbọku, iphe-ẹhuka
byaru mu; bẹ oo-dobe mu l'ẹke ọ nọ;
domia mu l'ime ụlo-ẹ́kwà iya;
woru mu tukobe l'eli mkpuma, ha l'eli.
6 Ọo ya bụ; mu emekputa ndu
ọhogu, nọ-pheru mu mgburumgburu.
Mu anọdu l'ụlo-ẹ́kwà Nchileke;
tụa okokooko gude gwaa Ojejoje;
gude egvu; gude nkwa;
tua ya ẹpha.
7 Nggụbe Ojejoje; nụnua olu
mu teke mu rakuru ngu!
Phụnuaru mu imiko;
za mu rụ oku!
8 Iphe obu mu kfuru mu;
bụ tẹ mu chọo ifu ngu.
Yọ bụru ifu nggụbe Ojejoje;
bẹ mu achọ-a.
9 Ba aghakwaru mu azụ;
ọphu i gudekwa
ẹhu-eghughu ngu nwufu mụbe nwozi ngu;
kẹ l'ọ bụ nggu bụ onye
shi keshinu yetataru mu ẹka.
Byiko; ba ajịkakwa mu;
ọphu i leswetakwa mu;
nggụbe Nchileke,
bụ onye adzọje mu nụ!
10 Ọ -bụru le nne mu; mẹ nna mu jịkawaru mu;
bẹ Ojejoje e-leta mu-a ẹnya.
11 Byiko kpoziaru mu ụzo ngu; nggụbe Ojejoje!
Dunua mu shia ụzo,
vudo nhamụnha l'ọgvu ndu akpa mu ẹhu.
12 Ba ahakwa mu tẹ ndu
ọhogu mu mee mu ẹge, dụ ẹphe mma;
kẹle ndu ẹjo-ekebe
wụ-lihuru ebo mu ibo;
l'ahashị ẹnu ishi mu.
13 Obenu l'iphe mu chịru ụkfu kwẹe
bụ lẹ mu a-nọdu ndzụ;
phụ iphe dụ mma,
shi Ojejoje l'ẹka.
14 Nọdu ngabẹru Ojejoje!
T'obu shia ngu ike;
ẹka eshia ngu ike;
nggu angabẹru Ojejoje.