33
1 Unu gụa egvu ẹhu-ẹna
nụ Ojejoje; unubẹ ndu
doberu ẹka ndoo!
Tẹ ndu obu gụru iphoro jaa ya ajaja.
2 Unu kpọo une
gude kele Ojejoje ekele!
Unu gude ogumogu gụaru
iya egvu, atsọ ẹna!
3 Unu gụaru iya egvu ọphungu!
Unu kụmataru iya ẹya akụmata;
unu atụaru iya ụzu ẹhu-ẹna!
4 Kẹ l'okfu Ojejoje vudo nhamụnha.
Ọ bụ o-me-g'o-kfuru
l'iphe bụ iphe oome ememe.
5 Iphe adụje Ojejoje mma bụ ikpe, dụ mma;
mẹ odobe-ẹka-ndoo.
N-yemobu Ojejoje jiru
mgboko tsubo etsubo.
6 Ọ bụ okfu, shi Ojejoje l'ọnu
b'o gude mee igwe;
bụru ume, ọ tụru atụtu
b'o gude mee iphe bụ iphe, nọ iya nụ.
7 Yọ bya awụkobe mini,
nọ l'ẹnyimu ye l'ẹkalanu.
Eze Ẹnyimu b'ọ kparu oge ẹke oo-jebetsua.
8 Tẹ mgboko l'ophu tsụje Ojejoje egvu.
Tẹ iphe bụ ndu nọ lẹ
mgboko kwabẹjekwa iya ugvu;
9 kẹ l'o kfuru okfu; mgboko abya adụ.
Yọ tụa ekemu;
iphemiphe ọbule abya adụ.
10 Ọ bụ Ojejoje emeje tẹ idzu,
iphe bụ mbakeshi chịru bụru iphe mmanu;
bụru iya akpọshije iphe
ndiphe tụberu k'ememe.
11 Obenu l'idzu ọphu Ojejoje
chịru akfụjeru gbururu jeye lẹ gbururu.
Iphe ọ tụberu k'ememe;
bẹ oomeje;
bẹ oomeje;
yo shi l'ọgbo sweru ọgbo.
12 Ọnu-ọma bụ kẹ mba,
bụ Ojejoje bụ Nchileke ẹphe;
bụ iya bụ ndu, ọ fọtaru;
ẹphe abụru òkè-iphe iya.
13 Ojejoje anọduje l'imigwe lee
ẹnya lẹ mgboko-a
phụ ụnwu eliphe l'ẹphe ha.
14 Ọonoduje l'ẹke,
o bu l'imigwe phụkota ndu,
bu lẹ mgboko l'ẹphe ha.
15 Ọ bụ yẹbedua meru ọriri nụ ẹphe.
Iphe bụ iphe ẹphe eme
ememe edokotaje iya ẹnya.
16 Iphe meru iphe onye eze
emekputaje l'ọgu ta bụkwa
okfu lẹ ndu sọja iya ha igwe.
Ọphu mkparawa
'egudejekwa ike k'ẹka iya nahụ.
17 Ịnya-ọgu bụ iphe-mmanu;
ẹ tọo dzọfutadu madzụ l'ẹgu ọgu;
ọphu 'onwedu ẹge ike iya
hatabe, ọo-dzọ-ghe ndzụ.
18 Obenu l'ẹnya Ojejoje nọkwa
l'ẹhu ndu atsụ iya egvu;
mbụ ndu ono,
dakoberu n-yemobu iya;
19 kẹ l'ọo-nafụta ẹphe l'ẹka anwụhu;
dobe ẹphe ndzụ teke
ẹjo-ẹgu byaru.
20 Ayi nọ ngabẹru Ojejoje;
kẹ l'ọo ya bụ onye agbaru ayi mkpu;
bụru iya egbochitaje ayi.
21 Oomeje t'ẹhu tsọo ayi ẹna;
kẹ l'ọ bụ l'ẹpha iya,
dụ nsọ bẹ ayi dakoberu.
22 Nggụbe Ojejoje;
byiko koshinu l'i yeru ayi obu;
kẹ l'ọ bụ nggu bẹ ayi dakoberu.