36
Egvu, Dévidi, bụ nwozi Ojejoje deru nụ onye ishi egvu
1 Ọ bụ ẹjo iphe anọduje ekfu
okfu l'obu ndu ẹjo iya ono.
Ẹphe jịkaru Nchileke;
ẹphe ta atsụ iya egvu lẹ phuu.
2 Kẹ l'ọonoduje aja onwiya ajaja-njagbu;
mbụ jatabe onwiya;
k'ọphu bụ l'ẹ tọo phụjedu
iphe dụ ẹji, oome;
k'ọphu ọo-kpọ iya ashị.
3 Iphe, eshije iya ọnu
bụlephu ẹjo okfu; mẹ ụgho.
Ẹ too mejedu l'ọ bụ onye maru iphe;
too me iphe dụ mma.
4 Ọozeje azẹe rịkobe iphe dụ ẹji, ya e-me.
Ọ bụlephu ẹjo ụzo;
bẹ ootsochitaje;
bẹ ootsochitaje;
tọ dụ iphe dụ ẹji, ọojikaje ememe.
5 Nggụbe Ojejoje; n-yemobu ngu
chịkowa igwe l'ọ ha gvua kfurukfuru.
O-me-g'o-kfuru, ị bụ eruwa akpamigwe.
6 Odobe-ẹka-ndoo nke ngu
akpa origodo l'ọ bụ eze ugvu.
Ikpe nke ngu aha ogvu l'ọ
bụ ebo eze ẹnyimu ime-alị.
Nggụbe Ojejoje; ọ bụ nggu
doberu madzụ; dobe anụ, bu l'ẹgbudu.
7 Lewaru ẹge n-yemobu ngu
bụ-be iphe vu oke aswa!
Ọ bụ iya meru iphe ndiphe
gbabaru l'agu ngu je anọdu ezeru ndzụ.
8 Ẹphe anọduje l'ụlo ngu eri gwọogwoo.
Iimeje t'ẹphe ngụa mini
l'ẹnyimu ẹhu-ọtso-ẹna nke ngu.
9 Kẹ l'ọ bụ l'ẹka ngu bẹ ndzụ futaru.
Yọ bụru l'ẹke iphoro
nke ngu nọ;
bẹ ayi a-nọdu phụ iphoro.
10 Byiko yekpelekwaruphu
ndu maru ngu nụ obu ẹge i yeru iya ẹphe.
Nggu edobekpelekwaphu
ẹka ndoo ẹge
ị doberu iya l'ẹhu ndu obu gụru iphoro.
11 Be ekwekwa tẹ ndu eku
onwẹphe ekuku dzọo mu ọkpa.
Ọphu i kwekwa tẹ ndu akirishi
gude ẹka ẹphe nwufu mu.
12 Phụaru ẹge e nwutsushiru
ndu ẹjo iya ono;
ẹphe adabutsuaru;
ọphu ẹphe e-gbeshihedu ọdo.