57
Egvu-ọma, Dévidi deru nụ onye ishi egvu; ishi egvu iya bụ “Be emekwa tẹ ya laa l'iyi”
Teke o deru iya bụ teke ọ nahụru Sọlu gbalaa; je anọdu l'ime ọgba
1 Nggụbe Nchileke;
phụaru mu rụ imiko!
Byiko; phụaru mu rụ imiko;
kẹ l'ọ bụ l'ẹka ngu;
bẹ mu nọ l'ezeru ndzụ.
Mu a-nọdu lẹ mkpuli ẹ́bà ngu;
zee ndzụ; gbururu jeye
teke iphe-ẹhuka-a, byaru mu nụ-a a-gvụ.
2 Mu araku Nchileke; mbụ
Ọkaribe-Kakọta-Nụ;
mbụ Nchileke, atụkoje
iphe bụ iphe bụ mkpa mu meeru mu.
3 Oo-shi l'imigwe zia t'a bya adzọfuta mu;
bya emeru iphe-iphere
kpua ndu ono, achị mu kpabẹkpabe ono.
Nchileke e-koshi lẹ ya yeru mu obu;
bụru o-me-g'o-kfuru.
4 Mu nọ l'echi agụ;
mu zẹkwa l'echi ẹjo anụ;
ndu ézé ẹphe dụ l'ọ bụ arwa; mẹ akfụ;
ire ẹphe atsụ nkọ l'ọ bụ ogu-mbeke.
5 Koshinu ndiphe ẹge ị hatebe;
mbụ l'ị nọ-ghataru
akpamigwe anọghata;
tẹ ndiphe kpamukpamu
phụa ẹge ị dụ-be biribiri.
6 Ndu ọhogu mu geru ụgbu
kwabẹru mu l'ụzo;
ẹhu adaa mu kọo.
Ẹphe eje ebua nsụ l'ụzo, mu eshije.
Ọbụ l'e mekochaaru;
ẹphe adaba lẹ nsụ ono l'onwẹphe.
7 Nggụbe Nchileke;
obu shihukpokwaaru mu ike;
obu shihukpokwaaru mu ike;
k'ọphu bụ lẹ mu a-nọdu
agụ egvu etu ngu ẹpha.
8 Obu mu; tehu mụru ẹnya.
Nggụbe ogumogu mu;
mẹ ụbo mu; unu tehu mụru ẹnya.
Mbẹdua e-gudekwa egvu
gụ-tee nchi-abọhu lẹ mgbẹnya.
9 Mu a-nọdu l'ifu ndiphe;
kele ngu ekele nggụbe Nnajiufu;
mu anọdukwaphu l'ifu
iphe bụ mbakeshi
gụa egvu gude tua ngu ẹpha.
10 Ishi iya abụru lẹ
n-yemobu ngu hatabe;
k'ọphu bụ l'o ruru rua imigwe.
Ire-lanụ ngu edzuru akpamigwe.
11 T'e mee ẹpha ngu t'o dee ude;
derua ẹke igwe jeberu;
ọdu-biribiri ngu erua ẹke mgboko jeberu.