60
Egvu-ọma, Dévidi deru nụ onye ishi egvu; t'e gude olu egvu “Okfukfulike Ọgba-ndzụ” gụa ya
Teke o deru iya bụ teke ẹphe lẹ ndu Áramu Naharayimu; mẹ ndu Áramu Zoba lụru ọgu; mbụ teke ono, Jóabu laru bya etso ndu Édọmu ọgu; gbua ụnu sọja ụkporo l'iri lẹ Nsụda Alị Únú
1 Nggụbe Nchileke;
ị jịkawaru ayi; wowaru
ayi chịkashia nanụ nanụ.
I shi avụru ayi ọvuma.
Ọle nta-a; bẹ ayi arọ ngu; sụ:
t'ị naphutaru ayi azụ ọdo.
2 Ọ bụ nggu meru mgboko;
yọ nmaa jijiji; bya emee ya;
yọ gbawashịhu.
Mekwazinu ẹke ọ gbatsụaru ọru;
kẹ l'ọonga anganga.
3 Ị hawaru ndibe ngu;
ẹphe ejee iphe-ẹhuka;
bya echee ayi mẹe;
ayi angụa ya l'akpọ galagala.
4 I paliwaru ẹkwa-ọhubama
ngu doberu ndu atsụ ngu egvu;
k'ọphu ẹphe a-phụ iya;
dzukobe l'ẹ́kwà-ọhubama ono;
shi iya zeeru akfụ ono.
5 Gudenu ẹka-ụtara ngu dzọfuta ayi!
Nụnua ekfukfu, ayi ekfu anụ ngu;
k'ọphu ee-shi ẹge ono dzọo ndu i yeru obu.
6 Nchileke nọ l'ụlo iya, dụ nsọ; kfua; sụ:
“Ya a-nọdu atụ okokooko;
l'eke alị ndu Shékemu;
bya ewota Nsụda Súkọtu keshia.
7 Gíledu bụ nk'iya;
Manásẹ abụru nk'iya.
Ífuremu bụ okpu, ya kpu l'ishi.
Júda bụ mgbọro-eze,
ya apajẹ l'ẹka.
ya apajẹ l'ẹka.
8 Móabu bụ ochi, ya akwọje ọkpa;
Édọmu abụru ẹke ya
eyeshije akpọkpa iya dobe.
Filísutiya bẹ ya tụwaru okokooko kpua.”
9 ?Bụ onye e-du mu duba lẹ
mkpụkpu ono, a kpụru
kpụshia ya ike ono?
?Bụ onye e-duru mu duba lẹ Édọmu?
10 Ọ kwa nggụbe Nchileke bụ onye ọbu.
Obenu l'i gbe jịka ayi;
ọphu i tsojehedu ndu sọja ayi l'eje ọgu.
11 Yeru ayi ẹka byiko;
t'ayi mekputa ndu ọhogu ayi;
kẹ l'ẹka ọphu ndiphe eye bụ iphe-iphoro.
12 Obenu l'ayi -nọduwa
Nchileke l'ẹka; bẹ ayi
e-mekputa ndu ọhogu ayi l'ọ bụ mkparawa.
Yọ bụru Nchileke a-dzọ
ndu ọhogu ayi pyaapyaa.