71
1 Nggụbe Ojejoje; ọ bụ nggu;
bẹ mu nọ l'ẹka l'ezeru ndzụ.
Be ekwekwa t'iphere mee mu!
2 Eshinu ị bụ onye
doberu ẹka ndoo;
nafụtanu mu!
Yeru mu ẹka tẹ mu nahụ!
Ngabẹru mu nchị;
dzọfuta mu!
3 Bụnuru mu agbara-mkpuma,
mu a-gbabajẹ;
domia onwomu!
Tụnua ekemu t'a dzọo mu;
kẹ l'ọ bụ nggu bụ
agbara-mkpuma mu;
bụru nggu bụ
a-gbabe-a-dzụru nke mu.
a-gbabe-a-dzụru nke mu.
4 Nggụbe Nchileke mu;
gbafụta mu rụ; l'ẹka ndu akirishi;
mbụ l'ẹka ndu e te dobedu ẹka ndoo;
mẹ ndu iwe.
mẹ ndu iwe.
5 Kẹ l'ọ bụ nggụbe Nnajiufu, bụ Ojejoje;
bẹ mu chịru ẹnya ziaru.
Keshinu mu bụ nwata;
bụ nggu; bẹ mu dakoberu.
6 Keshinu ọphu a mụru mu;
bụ nggu bẹ bụ agbarike mu.
Mu a-nọdulephu etu ngu ẹpha
gbururu jeye lẹ gburu;
kẹ l'ọ bụ nggu kufutaru mu l'ẹpho nne mu.
7 A dụwa l'igwe gude mu anma ẹtu ọma.
Obenu l'ọo l'ẹka ngu;
bụ ẹke, shihuru ike,
mu anọduje; ezeru ndzụ.
8 Eswe l'ẹnyashi;
bẹ mu anọduje etu ngu ẹpha;
l'atụ ọnu ẹge ị dụ-be biribiri.
9 Byiko; ba ajịkakwa mu nta-a,
mu bụwa ọgurenya-a.
Be eleswetakwa mu nta-a,
ike gvụwaru mu-a.
10 Kẹle ndu ọhogu mu
ekfukwaru mu ẹjo okfu.
Ndu domishiru onwẹphe;
kwabẹ t'ẹphe mee mu iphe
anọkobeje achị idzu ẹhu mu.
11 Ẹphe asụje: “Lẹ Nchileke jịkawaru mu.
T'a chịa mu gude;
kẹ l'ẹ tọ dụkwa onye abya mu agbataru.”
12 Ba anọdukwa mu ote-ẹnya; nggụbe Nchileke.
Nggụbe Nchileke nke mu;
bya ẹgwegwa bya eyeru mu ẹka!
13 T'iphe bụ ndu ebo mu ibo
bụkwaru ndu iphere e-me t'ẹphe chịhu.
Tẹ ndu ono, eme t'ẹphe
wofu mu ono bụkwaru ndu
aa-chị ọchi; jaa ewena.
14 Obenu lẹ mbẹdua bụlephu
l'ẹke ịino; bẹ ẹnya mu a-nọ.
Mu a-nọdu aka ngu ọja ajaja l'eje.
15 Mu e-gude ọnu mu ekfu iya mkpụrumkpuru
l'ekfushi iya ike
l'ị doberu ẹka ndoo;
mẹ l'ọ bụ nggu adzọje madzụ.
Odobe-ẹka-ndoo ngu;
mẹ ndzọta nke ngu ono hatabe nshinu
k'ọphu bụ lẹ mu ta
atụkota-ghedu ọnu iya.
16 Mu e-gude ike kẹ
nggụbe Nnajiufu, bụ Ojejoje
je araa ya arara l'ọ bụ
nggụbedua nwẹnkinyi ngu;
bụ onye doberu ẹka ndoo.
17 I shikpooru keshinu mu
bụ nwata zita mu iphe;
nggụbe Nchileke.
Iphe dụ biribiri, iimeje;
bẹ mu shilephu teke ono
tụta ọnu iya jeye nta-a.
18 Nta-a, mu bụwa ọgurenya,
ẹwo kpuru mu ishi-a;
ba aghakwaru mu azụ;
nggụbe Nchileke jeye teke
mu akọeberu ọgbo ọphu
abyanụ ẹge ike ngu habe nshinu;
mbụ kọoru iya iphe bụ
ndu ee-mekochaa mụa
ẹge ike ngu habe nshinu.
19 Odobe-ẹka-ndoo ngu
ruru akpamigwe;
nggụbe Nchileke;
mbụ nggụbe onye ono,
meshiru iphe paru ẹka ono.
?Bụ onye atụru ngu;
nggụbe Nchileke?
20 E gudekwaru l'i
mewaru mu;
mu ejee iphe-ẹhuka;
ọnu akpụa mu ụphu;
ọbule mu marua
l'ii-me mu-a tẹ mu
gbufu bya adụ mma ọdo;
mbụ kufuta mu l'ime ili; woru mu melia.
21 Ii-me t'a ka mu ọkwabe ugvu.
Ọ kwaphụ ẹge ono;
bẹ ịi-dụ mu ike ọdo.
22 Nggụbe Nchileke mu;
mu a-kpọ une gude jaa
ngu ajaja l'ị bụ onye
evudoshije ike l'iphe i kfuru.
Mu e-gude ogele gụa egvu;
jaa ngu ajaja;
nggụbe Onye dụ Nsọ kẹ Ízurẹlu.
23 Mu a-tụ ụzu ẹhu-ọtso-ẹna;
gụa egvu gude jaa ngu ajaja;
mbụ mụbe onye ị gbafụtaru.
24 Eswe mẹ ẹnyashi;
bẹ mu a-nọdu e-kfushi
iphe i meshiru gude koshi
l'ị doberu ẹka ndoo;
kẹle ndu shi achị mu nụ;
b'e mewaru iphere kpua;
mekwaaphu t'ẹphe ghahụ beringu.