118
1 Unu kele Ojejoje ekele
l'ọ bụ onye, dụ mma;
kẹle n-yemobu iya
anọje jeye lẹ tutu yoyo.
2 Tẹ ndu Ízurẹlu tụko sụ:
“Lẹ n-yemobu iya anọje jeye lẹ tutu yoyo.”
3 Tẹ ndibe Érọnu tụkokwaphu; sụ:
“Lẹ n-yemobu iya anọje jeye lẹ tutu yoyo.”
4 Tẹ ndu atsụ Ojejoje egvu sụkwaphu:
“Lẹ n-yemobu iya anọje jeye lẹ tutu yoyo”
5 Teke mu eje iphe-ẹhuka;
bẹ mu rakuru Ojejoje.
Yọ za mu oku bya emee mu;
mu enweru onwomu.
6 Ojejoje nọwa swiru mu eswiru;
mu te gbe atsụdu egvu.
?Bụkwanu ngụnu;
bẹ madzụ mmanu eme mu?
7 Ojejoje nọwa swiru mu eswiru;
ọo yẹbedua agbajẹru mu mkpu.
Mu e-mekochaa gude ẹnya mu;
phụa l'e mekputaru ndu mu dụ ashị.
8 Ọnodu l'ime Ojejoje domia
onwonye kakwa mma;
mẹ l'ọda-kobe madzụ.
9 Ọnodu l'ime Ojejoje domia
onwonye kakwa mma;
mẹ l'ọda-kobe ndu ishi.
10 Iphe bụ mbakeshi
gbaru mu mgburumgburu;
ọle mu gude ẹpha Ojejoje
mekputakota ẹphe l'ẹphe ha.
11 Ẹphe nọ-pheru mu
mgburumgburu
ẹka ẹbo-ẹbo;
ọle mu gude ẹpha
Ojejoje mekputakotaru ẹphe l'ẹphe ha.
12 Ẹphe ripyaberu mu l'ọ bụ ẹngu;
ọle ẹphe meleruphu ẹgwegwa;
nwụshihu l'ọ bụ ogvu ọkponku,
ọku dzụpyashiru.
Yọ bụru ẹpha Ojejoje;
bẹ mu gude mekputakota ẹphe l'ẹphe ha.
13 E nwuru mu daphungu;
nwuphu mu azụ;
mu abya adaa.
Obenu lẹ Ojejoje yeru mu ẹka.
14 Ọ bụ Ojejoje bụ ike mu;
bụru onye mu agụ-ku l'egvu.
Ọ bụ iya bụ onye adzọfutaje mu nụ.
15 Ụzu ẹhu-ọtso-ẹna
yẹle okokooko,
ndu mekputaru emekputa atụ
ada l'ufu ndu doberu ẹka ndoo.
Ẹphe tụko ekfu; sụ:
“Lẹ agburu-ẹhu kẹ Ojejoje;
meekwaru iphe ha nshinu.
16 Ojejoje koshiakwuru agburu-ẹhu iya.
Agburu-ẹhu iya ono
meekwaru iphe ha nshinu.”
17 Mu ta anwụhukwa.
Mu a-nọdu-chia ndzụ
raa iphe Ojejoje meru mu
arara t'a nụkota iya.
18 Ojejoje hụ̀waru mu àhụ̀hù
hụ̀shia mu ike.
Ọle ẹ to kwedu tẹ mu nwụhu.
19 Gụhanuaru mu ọnu-ọguzo
eze-ụlo Nchileke;
tẹ mu shi iya bahụ
je etua Ojejoje ẹpha.
20 Ọwaa bụ ọnu-nggamgbo Ojejoje.
Ono bụ ẹke ndu doberu ẹka ndoo eshije abahụ.
21 Mu e-kele ngu ekele;
kẹ l'ị zaru mu oku.
Ọ bụwa nggu;
bụ onye adzọfutaje mu nụ.
22 Mkpuma ono, ndu akpụ ụlo jịkaru ono;
bẹ mekochaaru bya abụru itso, gude ụlo.
23 Ono abụru iphe Ojejoje meru.
Ọ dụ ayi biribiri l'ẹnya.
24 Ntanụ bụ mbọku,
Ojejoje meru.
Unu t'ẹhu tsọo ayi ẹna;
tẹ ayi tee ẹswa.
25 Nggụbe Ojejoje;
dzọfutanu ayi!
Nggụbe Ojejoje;
menua t'iphemiphe ọbule,
ayi eme bụru ayi ụpete.
26 Onye a gọru ọnu-ọma nụ;
b'ọ bụ;
mbụ onye ono, gude ẹpha Ojejoje l'abya ono.
Ayi nọ l'ụlo Ojejoje agọru ngu ọnu-ọma.
27 Ọ kwa Ojejoje bụ Nchileke.
O meekwaru tẹ iphoro iya nwuaru ayi.
Unu tụa anụ, unu gude
abya ogworu Ojejoje ngwẹja eri;
kpụta bya l'iku mpo,
a mabẹru l'ẹnya-ngwẹja iya.
28 Ọ bụ nggu bụ Nchileke mu;
mu a-nọdu ekele ngu ekele.
Ọ bụ nggu bụ Nchileke mu;
mu a-nọdu ekutse ngu.
29 Unu kele Ojejoje ekele
l'ọ bụ onye, dụ mma;
kẹle n-yemobu iya anọje jeye lẹ tutu yoyo.

© 2014 WBT