140
Egvu-ọma, Dévidi deru nụ onye ishi egvu
1 Nafụtanu mu l'ẹka ndu
akirishi; nggụbe Ojejoje.
Letanu mu ẹnya;
tẹ mu ba daba l'ẹka ndu
anọduje eme madzụ iphe kpangangangu;
2 mbụ ndu, bụlephu ẹjo iphe;
bẹ ẹphe anọduje l'ọriri iya.
Ọ bụ ọgu bẹ anọduje
l'akpali mbọku-mbọku.
3 Ẹphe emeje ire ẹphe;
yọo tsụ nkọ l'ọ bụ ire agwọ.
Okfu, shi ẹphe l'ọnu
egbu egbugbu l'ọ bụ ẹra ogiji.
4 Gudeshinua mu ike;
nggụbe Ojejoje;
tẹ mu ba adalahụ l'ẹka ndu akirishi.
Gbochitanu mu l'ẹka ndu
anọduje eme madzụ
iphe-kpangangangu;
mbụ ndu achọ ụzo, ẹphe
e-shi chikota mu ọkpa.
5 Ndu eku onwẹphe ekuku
gbawaru mu ọnya.
Ẹphe gebetsuaru ụgbu; kwabẹru mu;
gbashịa ọnya; dooru mu l'ụzo.
6 Iphe mu ekfujeru;
nggụbe Ojejoje bụ l'ọo
nggu bụ Nchileke mu.
Nggụbe Ojejoje; genua nchị
lẹ mkpu ono, mu echiku ngu ono.
7 Nggụbe Ojejoje, bụ Nnajiufu mu;
nggụbe onye ike, adzọfutaje mu nụ;
nggụbe onye egbochitaje mu teke ọgu darụ;
8 Nggụbe Ojejoje;
be emekwaru ndu akirishi
iphe ono, agụ ẹphe ono.
Be ekwekwa t'idzu ree l'ẹge ẹphe achị iya.
Ọdumeka; bẹ ẹphe
a-watakwa ọhu dụlingu.
9 T'iphe a-dakfuta ndu ono,
gbaru mu mgburumgburu ono
bụkwaru iphe-ẹhuka,
ẹphe gude ire ẹphe kpataru onwẹphe.
10 Tẹ icheku-ọku, ata
kfukfukfu kpụkwaa ẹphe ishi.
T'a chịkwaru ẹphe ye l'ọku, enwu phophopho;
mbụ l'ime nsụ, ẹphe ta alụfutadu alụfuta.
11 Tẹ iphe ndu ẹjo-okfu eme;
be ekekwaru ekeru l'alị-a.
Tẹ iphe dụ ẹji chịkwaa nta
ndu ono, anọduje eme madzụ
iphe-kpangangangu ono.
12 Mu makwaru-a lẹ Ojejoje
ahajẹru ndu ụkpa enge;
l'emejekwaphu tẹ ikpe laaru
ndu ẹ-te nwedu ẹge ọ haru iya.
13 Tẹ mu rakwaa ya arara;
ndu doberu ẹka ndoo
a-jakwa ngu ajaja;
a-jakwa ngu ajaja;
ndu obu ẹphe gụru iphoro eburu lẹ nke ngu.