6
Ụnwanyi Jerúsalemu asụ:
1 Nwanyi mbeke;
?Bu awe bẹ 'a -phụ-mini;
'e -me ẹkfu ngu jeru;
?Bụ awe b'o cheberu ifu;
k'ọphu ayi achọ-ede ngu iya?
Kẹ nwanyi asụ:
2 Nwoke ono jeru lẹ mgbabu iya;
mbụ l'ẹke ọ dzashiru iphe eshi mkpọ.
O jeru oche atụru iya lẹ mgbabu ono;
ẹge oomekokwaphu okfukfulike.
3 Mu bụ kẹ nwoke ono;
nwoke ono abụru nke mu.
Oochekwa atụru iya l'ẹke okfukfulike nọ.
Kẹ nwoke asụ:
4 Nwanyi mbeke; ịima mma l'ọ bụ mkpụkpu Tíza;
dụ ùgvù l'ọ bụ Jerúsalemu.
Ịidzo girimu gadamu l'ọ bụ
ndu sọja, pa ẹkwa-ọgu ẹphe.
5 Wofu ẹnya ngu l'ẹke mu nọ;
kẹ l'ọolo mu ẹka lẹ meji.
Ẹgbushi ngu dụlephu l'ọ bụ ẹji eghu, dzeberu;
shi l'eli ugvu Gíledu
awụ-zita.
6 Eze achalẹ ngu phụ
pemu-pemu l'ọ bụ ikpoto atụru,
shi l'ẹke a ghụru iya ẹhu wụfuta.
Ẹphe l'ẹphe ha achịgbaa ụnwu ẹbo ẹbo;
to nwe ẹphe m'ọo nanụ, gba ẹka.
7 Ishi agbagba nchị ngu,
i gude ụlari-ifu kpuchia
dụlephu l'ọ bụ
ụtara-okumu, e gbujahuru ẹbo.
8 Unyomu eze a-dụkwaru ụkporo ẹto;
nnufu iya phẹ adụ ụkporo ẹno;
ndu k'ụnwu-mgbọko abụru 'agụta agụta.
9 Obenu l'ọ bụ nggụbe nwa ndo mu;
bụ onye dụ-geru nụ.
Ị dụ iche; bụru onye tụbaru nne iya l'ẹnya;
bụru onye ẹ-te nwedu
ẹkworo l'ẹnya nne iya;
Ụnwu-mgbọko phụru iya;
kua ya onye a gọru ọnu-ọma.
Unyomu eze; mẹ ndu ọphu
bụ nnufu iya phẹ aphụa ya; jaa ya ajaja.
10 ?Bu onye, bụ onye ono,
dụ l'ọ bụ iphoro
nchi-abọhu ono?
?Bụ onye egbu
pemu-pemu l'ọ bụ ọnwa;
chaa too l'ọ bụ ẹnyanwu;
mbụ dụ biribiri l'ọ bụ ndu
sọja, chị ẹkwa-ọhubama?
11 Mu jeru lẹ mgbabu,
a dzashịru oshi, amịje
akpụru tẹ mu gbaphee iphe
efushitsua k'ọphungu;
tẹ mu maru mẹ oshi vayịnu;
?o meshiwaru mgbịrigba;
makwarụphu mẹ
ụtara-okumu; ?ọotsuwa igu.
12 Tẹ mu kwaa marụ;
bẹ mu gbe nọduwanu l'ụgbo-ịnya ono,
ndibe mu gudeje dulataru
mu nwamgbọko mu ono.
Ndu ọnya
13 Latanụ azụ! Latanụ azụ;
nggụbe nwanyi Shulemu!
Latanụ azụ! Latanụ azụ t'ayi chịa ngu ẹnya!
?Bụ ngụnu meru iphe unu
a-nọdu ele nwanyi Shulemu kpakpakpa;
l'ọ bụ onye, ele ẹke ndu
Mahanemu ete egvu?

© 2014 WBT