1 Nachitōlag si Solomon di Paraon a āri no Egipto do nakakabahay naw so pōtot ni Paraon. Insabat na do syodad ni Dabid ranan na mapatayokaw palasyo naw kan timplowaw ni ĀPO, kan iyaw ahadaw do omdibon no Jerosalem. 2 Ki siraw tawotawowaw, ki myan sa pa a mangidāton do altaraw no matatarek saw a logar a pagdaydayāwan, ta ari pad abo napatnek a timplo a pagdaydayāwan so ngaran ni ĀPO.*3:2 Sigon do Linteg ni Moyses, tabo animal a dāton di ĀPO, ki machita a iyangay da do salapen ni ĀPO do altaraw no tabirnakolo do Jerosalem. 3 Chadaw ni Āri Solomon si ĀPO, kan tinongpal na saw pangeddeng ni āmang na a si Dabid, ki nangidāton kan nangsosoh so insinso a para di ĀPO dyirad logar saw a pagdaydayāwan.

4 Do asa karaw, nangay si Āri Solomon do Gibeon†3:4 Dawriw sīgod a yanan tabirnakolo. Jos. 10:2 a mangidāton, ta dawriw kasisītaan a logar a pagdaydayāwan. Indāton ni Āri Solomon asaw a rībo a binyay a sinosohan na do dawri a altar. 5 Do Gibeon napaboya si ĀPO di Solomon do dāwri a ahep do tayēnep na, kan inyahes na dya a kāna, “Mangyahes ka so aran āngo dyaken, kan itoroh konchi dyimo.”

6 Tominbay si Āri Solomon a kāna, “Inpaboya mo rakoh a kadaw mo di āmang ko a si Dabid a pachirawatan mo maynamot ta mapodno, malinteg, kan masingpet do salapen mo. Nāw mo a tinongtong iyaw rakoh a kadaw mo dya, kan tinorohan mo so pōtot a mahakay a maydisna do trono na sicharaw.

7 “Changori, O ĀPO a Dyos ko, pinayparin mo yaken a pachirawatan mo a āri a tādi ni āmang ko a si Dabid. Ki adekey ako pa, kan ari pad abo pādas ko an maynamot do kapagtoray. 8 Yaken a pachirawatan mo, ki myan dyirad pinidi mo saya a tawotawo mo. Sira, ki rakoh a nasyon a taywara so kāro a dya mabidangan. 9 Torohan mo pakono yaken a pachirawatan mo so kapakaāwat a mangitoray so tawotawo mo a mapaytarek so malinteg kan madi. Ta sino paro makaitoray so nya taywara so kāro a tawotawo mo?”

10 Nahwahok si Āpo do dyaya a chindaw ni Solomon. 11 Dawa, binata ni Āpo Dyos dya a kāna, “Maynamot ta inakdaw mo nya a dya iyaw kanaro no byay mo, kinabaknang mana karārayaw dan kabōsor mo, basbāli a inakdaw mo kapakaāwat a mangitoray so kinalinteg, 12 itoroh ko chindaw mwaya. Torohan koymo so kasīrib kan kapakāawat tan abanchi a polos akma dyimo so kinasīrib, kan arabanchi a polos masirsīrib kan imo. 13 Otro, itoroh ko pa dyimo dyi mwaya chindaw dyaken, iyaw kinabaknang kan kadāyaw da dyimo tan abanchi a polos matarek a āri a machiyengay dyimo do ōnos no kabyay mo. 14 As an maybibyay ka do chakey ko, kan tongpalen mo saw pangeddeng kan bilbilin ko a akma di āmang mo a si Dabid, ki torohan ko pa imo so manaro a byay mo.” 15 Do nakayokayaw ni Āri Solomon, natonngan na a nachisisirin si Āpo Dyos dya do tayēnep na.

Sinpangan na, somnabat do Jerosalem, kan nangay a naytēnek do salapenaw no lakāsanaw no tōlag ni ĀPO. Nangidāton so masosohan saw a dāton kan dāton saw a pachikapya. Katayoka na, ki namarin so pasken a para dyirad tabo opisyalis na.

16 Do asa a karaw, myan saw dadwa a balangkantis a nangay a naytēnek do salapen ni Āri Solomon. 17 Binata no asaw a mabakes a kāna, “Mo āpo ko, iyaw nya mabakes kan yaken, ki omyan kami do asa bahay. Naymanganak ako ranan no kayan na dyaken do bahayaw. 18 Do chatatdo naw a karaw no nakapaymanganak kwaw, aran nya mabakes, ki naymanganak. Abaw matarek do dawri a bahay an dya yamen lang a dadwa.

19 “Do asa a kahep, nadiman iyaw tagībyaw no nya mabakes, ta nakaychehan na a nagpidan. 20 Dawa, naybangon do kaabak no mahep, as nakahap nas tagībi kwaw a myan do bīt kwaw do nakapaynepdep kwaw a pachirawatan mo. Pinangay naw nadimanaw a tagībi na do barōkong kwaw, as inhap naw tagībi kwaw a pinangay do barōkong na. 21 Do kamabekasan na, naybangon ako a mapasoso so tagībi kwaw, ki nadiman dana sawen. Do nakabigbig kwaw sya, ki nailāsin ko a iyaba sawen tagībi kwaw.”

22 Ki inatbay no asaw a mabakes a kāna, “Enggaw! Iyaw sibibyayaw, tagībi kwaw! Nadimanaw tagībi mwaw!”

Binata no nanmaw a mabakes a kāna, “Taywaran dya iyaw nadimanaw tagībi mo? Dyaken abawriw sibibyayaya?” Komwan nakapagsopyat da do salapenaw ni āri.

23 Do dāwri, binata ni āri a kāna, “Mayengay kamwaya mangibahey a tagībi nyo sibibyayaya, as abayaw mangrawat dyinyo a dyira naw nadimanaw.”

24 Sinpangan na, inbilin no āryaw dyirad soldādo naw a kāna, “Mangyangay kamo pa dya so ispāda.” Dawa, inyangay daw ispādaw di āri. 25 As binata ni āri a kāna, “Ngay, paycharwahen nyo sibibyaya a tagībi. Itoroh nyo kakchid naw do asaya mabakes, as itoroh nyo bīt naw do asaya.”

26 Iyaw mabakesaw a sibibyay so tagībi, ki napno so kāsi do anak naw, kan binata na di āri a kāna, “Enggam āpo ko! Itoroh nyo na dyaw sibibyayaya a tagībi! Dimanen nyo aba!”

Ki binata no asaw a mabakes a kāna, “Dyaken aba mana dyira mo aba. Sigi, paycharwahen nyo na!”

27 Do dāwri, inatbay no āryaw a kāna, “Itoroh nyo sibibyaya a tagībi do nanmaya mabakes, ta iyaw oyod a ānang na. Dimanen nyo pabaw tagībyaya.”

28 Do nakadāmag daw a tabo no tawotawo no Israel so maynamot do nakapangokomaw ni āri do dawri a kāso, taywaraw nakaanyib da sya, ta nadlaw da a tinorohan no Dyos so kinasīrib do kapangokom na a nainkalintegan.