1 Sinpangan na, chinpeh ni Āri Solomon do salapen na do Jerosalem panglakayen saw no Israel kan siraw tabo pangpangōlo daw no trībo kan partīdos dan tawotawo no Israel, tan paneknekan da iyaw kapayadis dan papādi saw so lakāsanaw no tōlag ni ĀPO a yapo do Sion a syodad ni Āri Dabid a mangay do timplowaw. 2 Tabo nya sa a mahahakay no Israel, naychichipeh sa do salapen ni Āri Solomon do chimpo no pista*8:2 Nya pista, ki Pistaw no Kapaychabengbengbeng. Eks. 23:16; Leb. 23:34-43; Deot. 16:13-17 do bohan no Etanim do chapapito naw a kabohan.

3 Do nakawara daw a tabo no panglakayen no Israel, inisiw da no papādi saw lakāsanaw no tōlag ni ĀPO, 4 kan inyangay da do timplowaw. Siraw Lebitaw, nangatkat so Toldaw a Pachibayabayatan di ĀPO kan tabo masantwan saw a warawara kan rimīnta na.†8:4 Eks. 25:23-40; 1 Ār. 7:51 5 Si Āri Solomon kan siraw tabo tawotawo no Israel a nachikpeh dya, ki somnalap sa do salapen naw no lakāsanaw, as nakapagidāton da so āro a karniro kan bāka a dyi da mabidangan mana dyi da maitolas.

6 Sinpangan na, pinasdep dan papādyaw lakāsanaw no tōlag ni ĀPO do yanan naw do makatayrahemaw a kwarto a iyaw Kasasantwanaw a Yanan do timplowaw, kan pinangay da do sīrok daw no sinan naypanyid saw a parswa. 7 Siraw naypanyidaw a parswa, ki nabolay panyid daw do anmwaw no lakāsanaw, tan mangsīrong so lakāsanaw kan siraw iisiwaw. 8 Siraw iisiwaw a taywara so kanaro, ki maboyaw tobotobwan da a yapo do Masantwan a Yanan do salapenaw no makatayrahemaw a kwarto, kan maboya aba a yapo do gaganaw. Ari pa sa daw sichangori. 9 Abaw matarek a myan do irahemaw no lakāsanaw malaksid do dadwaya matatāpi a bato a pinangay ni Moyses do Horeb. Dawriw nachitolāgan ni ĀPO dyirad tawotawo no Israel nakatayokan nakahtot da do Egipto.

10 Do nakahtot daw no papādi saw do Masantwan a Yanan, inapno no demdem timplowaw ni ĀPO. 11 As siraw papādyaw, ki naparin dabaw rebbeng daw maynamot do demdemaw, ta iyaw dayagaw ni ĀPO, inapno naw timplowaw.

12 Binata ni Solomon a kāna, “Binata ni ĀPO a iya, ki magyan do irahem no matokpohaw a sari no demdem.‡8:12 Eks. 20:21 13 Mo ĀPO, napatnek ako ngamin so matan-ok a timplo para dyimo a logar a pagyanan mo a abos pandan.”

14 Do kayan daw a nakpekpeh a tabo no tawotawo no Israel a naychatetēnek, minidit āryaw dyira kan binindisyonan na sa. 15 Binata na a kāna, “Madāyaw pakono si ĀPO a Dyos no Israel a do bōkod na kakamay, ki natongpal inkari naw do bōkod na dangoy di āmang ko a si Dabid. Ta inbahey na a kāna, 16 ‘Yapo do arawaw a inihtot ko saw tawotawo kwaw do Egipto, ki namidi akwaba so syodad do aran dino a yanan dan trībo no Israel a pakapatnekan no timplo a pangidaydayāwan so ngaran ko, ki pinidi ko si Dabid a mangitoray siras tawotawo ko.’

17 “Myan do pōso ni āmang kos Dabid iyaw kapamatnek so timplo a pangidaydayāwan so ngaran ni ĀPO a Dyos no Israel. 18 Ki binata ni ĀPO di āmang kos Dabid a kāna, ‘Maynamot ta myan do pōso mo kapamatnek mo so timplo a pangidaydayāwan so ngaran ko, ki maganay nya a myan do pōso mo. 19 Aran komwan, imo abanchiw mapatnek so timplowaw, ki iyanchiw pōtot mwaw a yapo a mismo do asi mo kan raya mo, iyanchiw mapatnek so timplowaya a pangidaydayāwan so ngaran ko.’

20 “Sichangori, tinongpal dana ni ĀPO iyaw inkari na. Yaken machitādi di Dabid a āmang ko, kan maydisna ko na do trono no Israel akmas inkari naw ni ĀPO, kan pinatnek ko timplo a pangidaydayāwan so ngaran ni ĀPO a Dyos no Israel. 21 Napatnek ako pa daw so pagyanan no lakāsanaw a yanan no tolāgaw ni ĀPO a nachitolāgan na dyirad aāmang ta saw do nakaihtot naw sira do Egipto.”

22 Sinpangan na, naytēnek si Solomon do salapen no altaraw ni ĀPO do salapenaw no tabo a tawotawo no Israel a naychichipeh. Naydedpa a nakalongo do hanyit, 23 kan binata na a kāna, “O ĀPO a Dyos no Israel, abaw Dyos a akma dyimo do hanyit a myan do tohosaya mana do tanaya a myan do ibabaya. Imo, ki mangaywan so tōlag mo, kan ipaboya mo iyaw dya mabdibdis a kadaw mo dyirad pachirawatan mo a nainpapōswan a maybibyay do chakey mo. 24 Tinongpal mo kari mo do pachirawatan mo a si Dabid a āmang ko. On, do dangoy mo kan do kakamay mo, ki tinongpal mo do dyaya araw.

25 “Changori mo ĀPO a Dyos no Israel, tongpalen mo pa do pachirawatan mo a si Dabid a āmang ko inkari mo dya do nakaibahey mwaw sya a kon mo, ‘Abanchi a polos dya kapaydisna no kapotōtan mo do trono no Israel, an nāw da lang no kapotōtan mo sa a siaannad do kabibyay da do salapen ko akmas pinarin mo.’§8:25 1 Ār. 2:4 26 As changori mo ĀPO a Dyos no Israel, ipalōbos mo paw chirin mo a inkari mo do pachirwatan mo a si Dabid a āmang ko a maparin pakono.

27 “Ki oyodori a magyan anchiw Dyos do tanaya? No kahanyihanyitan, aran no katotohosan a hanyit, ki mahap naba imo. Pāngo narananchiw nyaya timplo a patneken ko! 28 Aran komwan, O ĀPO a Dyos ko, ikāso mo paw dasal kwaya a pachirawatan mo kan kapangdakdaw kwaya so kāsi. Adngeyen mo paw katanyis kan no kapaydasal no pachirawatan mwaya do salapen mo sichangori a araw. 29 Sichichideb pakono mata mo sa do timplowaya do māraw kan mahep a yanan a nangibaheyan mo a kon mo, ‘No ngaran ko, ki myan anchi daw.’ Tan komwan, madngey monchiw dasal no pachirawatan mwaya a anchan maydasal a somalap do dyaya timplo. 30 Adngeyen mo paw kapangdakdaw no pachirawatan mwaya kan siraw tawotawo mwaya a Israel anchan maydasal sa a somalap do dyaya a yanan. Adngeyen mo pa a makayapo do hanyit a yanan mo, kan anchan madngey mo yamen, ki pakawanen mo yamen.

31 “Myan anchiw kaidarom no asa tawo a nakagatos do karoba na a machita a magsapata, kan mangay do salapenaw no altar mo do dyaya a timplo, 32 adngeyen mo pa a makayapo do hanyit kan mangeddeng ka. Mangokom ka siras pachirawatan mo saw. Dosāen mo nakagatos do kapabidi mo sya dya an āngo pinarin naw. Ikalintegan mo abos gatos sigon do kalinteg na.

33 “Myan anchiw kaābak dan tawotawo mo a Israel do kabōsor da a maynamot ta naygatos sa dyimo. Ki an maybidi sa dyimo, kan bigbigen daw ngaran mo do kapaydasal kan kapangdakdaw da do dyaya timplo, 34 adngeyen mo pa a makayapo do hanyit, kan pakawanen mo paw gatos da, kan paybidihen mo sa do tana a intoroh mo dyirad aāmang da.

35 “Myan anchiw kaaneb no kahanyihanyitan, kan abaw chimoy maynamot ta nakagatos saw tawotawo mo dyimo. Ki anchan maydasal sa a somalap do dyaya a yanan, kan bigbigen daw ngaran mo, kan tadyichokodan daw gatos da maynamot ta pinalidyat mo sa, 36 adngeyen mo pa a makayapo do hanyit, kan pakawanen mo paw gatos da no pachirawatan mo saw. Nanawhen mo pa sa so kosto a kayam do kabibyay, kan manoroh ka pa so chimoy do tanaw a intoroh mo dyirad tawotawo mo a pinakatāwid da.

37 “Myan anchiw kapaychapteng mana pisti do tanaya, kahayo mana kaganyit no mohamoha, kapayrārayaw dan kabaga mana ohed, mana kapanglakob no kabōsor do aran dino do syodad da saya, mana aran āngo a didigra mana ganyit a maparin a mangay. 38 Ki aran sino dyirad tawotawo mwaya a Israel a maydasal mana mangdakdaw, as mabigbig no kāda asa do bōkod na a aktokto iyaw kaynyin no gatos na, kan paydedpahen naw tanoro na a lomongo do dyaya a timplo, 39 adngeyen mo pa a makayapo do hanyit a yanan mo. Pakawanen mo pa kan kedngan mo kāda tawo sigon do tabo a kaparin na, ta chapapatak mo kapangaktokto na. On, ta imo lang makapapatak so tabo kapangtokto no tawotawo. 40 Tan komwan, myan pakono kāmo da dyimo do ōnos no kabyay da do tanaya a intoroh mo dyirad aāmang namen saw.

41 “Siraw gan-ganaet a dyi mo a tawo a Israel, ki mangay sanchi a yapo do mateng a tana maynamot do kalatak no ngaran mo, 42 ta madngey danchiw mabīleg a ngaran mo kan kaparin mo do manakabalin a kakamay kan tachay mo. As anchan mangay sa a maydasal a somalap do dyaya timplo, 43 adngeyen mo pa a makayapo do hanyit a yanan mo, kan parinen mo paw aran āngo a akdawen dyimo no gan-ganaet saya. Tan komwan, tabo no tawotawo do tanaya, ki mapatakan danchiw ngaran mo kan mamo sa dyimo a akma siras tawotawo mo a Israel. As mapatakan da panchi a iyaw nya bahay a pinatnek ko, ki pangidaydayāwan so ngaran mo.

44 “Myan anchiw katoboy mo siras tawotawo mo do aran dino a ngayan da a machigobat dyirad kabōsor da. As anchan maydasal sa a somalap dyimo a ĀPO do syodadaya a pinidi mo kan do timplowaya a pinatnek ko a pangidaydayāwan so ngaran mo, 45 adngeyen mo pa a makayapo do hanyit dasal da kan kapangdakdaw da, as sidongan mo sa pa do akdawen da.

46 “Myan anchiw kapaygatos dan tawotawo mo dyimo, ta abaw aran asa a dya maygatos. Do dāwrinchi, makasoli ka dyira, kan iparawat mo sa do kabōsor a mangikaro sira a sibabahod a isabat do tana dan nya kabōsor do mateng mana masngen. 47 Ki an magbāliw kapagpospōso da do nakabahodan daw a tana, as magbabāwi kan mangdakdaw sanchi dyimo do tanaw a yanan no nangtiliwaw sira, kan ipodno da a kon da, ‘Naygatos kami. Namarin kami so dya kosto. Namarin kami so marahet,’ 48 as an maybidi sa dyimo do tābo pōso kan pahad da do tanaw no kabōsor da a nangikaro sira a sibabahod, as kan an maydasal sa dyimo a somalap do tanaw a intoroh mo dyirad aāmang da, kan somalap do syodadaya a pinidi mo kan do timplowaya a pinatnek ko a pangidaydayāwan so ngaran mo, 49 adngeyen mo pa a makayapo do hanyit a yanan mo iyaw dasal kan kapangdakdaw da, as sidongan mo sa pa do akdawen da. 50 Pakawanen mo paw tawotawo mo a naygatos dyimo. Pakawanen mo pa tabo naygatosan da a naparin da a maikontra dyimo. Ipadidiw mo dyirad nangbahod sira iyaw kāsi dyira. 51 Ta sira, ki tawotawo mo kan pagtawīden mo a inihtot mo do Egipto a akma say nakalsot do hobok no somdesdeb a pogon.

52 “Siiiwang pakono mata mo do kapangdakdaw no pachirawatan mo kan dyirad kapangdakdaw no tawotawo mo a Israel. Adngeyen mo pakono sa do kāda katanyis da dyimo. 53 Ta intatārek mo sa dyirad tabo nasnasyon do tanaya a mayparin a pagtawīden mo a akmas binata mwaw di Moyses a pachirawatan mo do nakaihtot mwaw siras aāmang namen do Egipto mo ĀPO a Dyos.”

54 Do nakatayokaw ni Solomon siras tabo nyaya a dasal kan kapangdakdaw na di ĀPO, ki naytēnek a yapo do salapen naw no altar ni ĀPO do naydogodan naw a naydedpa so nakalongo do hanyit. 55 Naytēnek kan binindisyonan naw tabo a tawotawo no Israel a naychichipeh do nakapakalyak naw a kāna, 56 “Madaydāyaw si ĀPO a nanoroh so inahah dyirad tawotawo na a Israel akmas inkari na. Abaw aran asa a chirin a dya natongpal dyirad tabo magaganay saw a kari na a inpaibahey na di Moyses a pachirawatan na. 57 Myan pakono si ĀPO a Dyos ta dyaten a akmas kayan naw dyirad aāmang ta. Dyi na pakono yaten a karwan mana inonolay. 58 Palongohen na pakono pōso ta dya a maybibyay do tabo a chakey na, kan mangtongpal siras bilbilin na, pangeddeng, kan kapangokom na a intoroh na dyirad aāmang ta. 59 Nya saw chirin kwaya a indasal ko do salapen ĀPO, ki nāw sa pakono a masngen di ĀPO a Dyos ta do māraw kan mahep. Tan komwan, makasidong do akdawen no pachirawatan na kan do kalintegan no tawotawo na a Israel sigon do machita do kararaw. 60 As tan komwan, mapatakan danchi no tabo tawotawo do tanaya a si ĀPO, ki Dyos, kan abaw matarek. 61 Ki inyo, ki machita a oyod a sipopōso kapodno nyo di ĀPO a Dyos ta a maybibyay dyirad pangeddeng na kan magtongpal so bilbilin na a akmas changori a araw.”

62 Sinpangan na, si āri kan tabo tawotawo a Israel a myan dya, ki nangidāton sa do salapenaw ni ĀPO. 63 Nangidāton si Solomon di ĀPO so dāton a pachikapya a 22,000 a bāka kan 120,000 a karniro. Dawa, si āri kan tabo tawotawo a Israel, ki indidikar daw timplowaw ni ĀPO.

64 Do dāwri met lang a araw, intatārek ni āri a para di ĀPO iyaw mamanhobokaw no atataw do salapen no timplowaw. As dawriw nangidātonan na so masosohan a dāton, dāton a irek, kan siraw taba no binyay a dāton no pachikapya. Ta iyaw tombāgaw a altar a myan do salapen ni ĀPO, ki taywaras kadēkey a makahap siras dāton a masosohan, dāton a irek, kan taba a dāton a pachikapya.

65 Dawa, do dāwri, nagpasken si Solomon, as myan dya tabo tawotawo a Israel a taywara so kāro a nakpekpeh. Nairāman saw tawotawo yapo do mabawa do Lebo-hamat kan do Dēkey a Oksong no Egipto. Sinilibrar da do salapen ĀPO a Dyos ta so papito a karaw a para do kaididikasyon no timplo kan papito pa a karaw do Pista no Kapaychabengbengbeng a asa poho kan apat a karaw a tabo. 66 Do somaronwaw a araw, pinayam narana ni Solomon tawotawo saw. Binindisyonan daw āryaw, kan somnabat dana sa do bahabahay da a siraragsak kan masoyosoyot do tabo maganay a pinarin ni ĀPO a para di Dabid a pachirawatan na kan dyirad tawotawo na a Israel.