1 Si Āri Solomon, ki chinadaw naw balāsang naw ni Paraon. Ki chinadaw na pa saw āro a gan-ganaet a mababakes a Moabita, Ammonita, Edomita, Sidonya, kan Heteo. 2 Sira, ki yapo sa do nasyon saw a inbahey ni ĀPO dyirad Israelita saw a kāna, “Machikabahay kamwaba dyira, ta syirto a pasiwalen danchiw pōso nyo a pawnoten do didyosen da sa.”*11:2 Eks. 34:16; Deot. 7:3-4, 17:7 Aran komwan, alit na nāw ni Solomon a nangadaw dyira. 3 Myan papito a gasot a baket na a anak dan matotohos saw so sāad, kan tatdo a gasot a minabakes na. As siraw babbaket na saya, ki siraw nangpatadyichokod na so pōso na do Dyos. 4 Ta do nakapaypalakay dana ni Solomon, pinasiwal dan babbaket naw pōso na do matatarek saw a dyos. As nainpapōswan pabaw kapodno na di ĀPO a Dyos na a akmas kapodno ni Dabid a āmang na. 5 Dinaydāyaw na si Astoret a dyosa dan Sidonyo, kan si Molek a makabābaba a dyos dan Ammonita. 6 Dawa, namarin si Solomon so marahet do kapanyideb ni ĀPO. Nainpapōswan pabaw kawnot na di ĀPO a akmas pinarin ni Dabid a āmang na.

7 Do paytokonan do dayāen no Jerosalem, napatnek si Solomon so pangidaydayāwan para di Chemos a makabābaba a dyos no Moab, kan para di Molek a makabābaba a dyos dan Ammonita. 8 Komwan pinarin na para dyirad tabo gan-ganaet a babbaket na a siraw nangsosoh so insinso kan nangidāton dyirad dyos da sa.

9 Nakasoli si ĀPO di Solomon, ta tomnadyichokod di ĀPO a Dyos no Israel a nagparang dya so naypirwa. 10 Aran inbilin na di Solomon a dya monot do matarek saw a dyos, alit na dyi na tinongpal bilin ni ĀPO. 11 Dawa, binata ni ĀPO di Solomon a kāna, “Maynamot ta inīsad mo nya, kan tinongpal mwabaw tōlag kan pangeddeng ko saw a inbilin ko dyimo, syirtwen konchi a pasyayen do kakamay mo iyaw pagāryanaya,†11:11 Do Hebreo a chirin, ki “syirtwen konchi a piriten do kakamay mo iyaw pagāryanaya”. 1 Ār. 11:30-31 kan itoroh konchi do pachirawatan mo. 12 Aran komwan, maynamot di Dabid a āmang mo, parinen ko abanchiw nyaya do ōnos no kabyay mo. On, pasyayen konchi do kakamay no pōtot mo. 13 Ki pasyayen ko abanchi a golpi iyaw pagāryanaya a yapo dya, an dya itoroh konchi dya iyaw asa a trībo maynamot di Dabid a pachirawatan ko kan maynamot do Jerosalem a pinidi ko.”

14 Sinpangan na, namangon si ĀPO so kabōsor ni Solomon a si Hadad a Edomita a yapo do kapotōtan no āri no Edom. 15 Do nakarahan do nakapachigobat naw ni Dabid do Edom,‡11:15 2 Sam. 8:13-14 si Joab a komander no bōyot na, ki somnonget a mangitābon so nadiman saw a soldādo a Israelita. Do kayan naw daw, diniman na tabo mahahakay do Edom. 16 (Ta nabidin sa Joab kan no bōyot saw no Israel so anem a kabohan mandad nakapatawos da so kāda mahahakay do Edom.) 17 Do dāwri, siraw kadwan saw a Edomita a opisyalis a nagsirsīrbi do āri no Edom, ki inpayyayo da si prinsipi Hadad a adekey pa do dāwri a inikwan do Egipto. 18 Komnaro sa do Midyan kan nangay sa do Paran. Sinpangan na, nanghap sa so kadwan a mahahakay a yapo do Paran a kinayrayay da. Nangay sa di Paraon a āri no Egipto a nanoroh da Hadad so bahay kan tana, as kan nanorotoroh so mākan da.

19 Taywara a nahwahok si Paraon di Hadad. Dawa, inpakabahay na do ipag naw a kakteh ni Reyna Tahpenes a baket na. 20 Iyaw kakteh naw a mabakes ni Tahpenes, ki inyanak naw pōtotaw ni Hadad a mahakay, kan napangaranan so Genobat. Inyangay ni Tahpenes do palasyo ni Paraon, kan dawriw nayrakorakohan ni Genobat a kayrayay na saw pōtotaw a mahahakay ni Paraon.

21 Ki do kayanaw ni Hadad do Egipto, nakadāmag naw a nachipaynahah dana si Dabid dyirad aāmang na saw, kan aran si Joab a komander no bōyot, ki nadiman. Dawa, binata ni Hadad di Paraon a kāna, “Palobōsan mo pa yaken a komaro a maybidi do bōkod ko a tana.”

22 Inyahes ni Paraon a kāna, “Na, āngo paw abo dyimo dya, ta chakey mo nayaw maybidi do bōkod mo a tana?”

Binata ni Hadad a kāna, “Aba, ki palobōsan mo na yaken.”

23 Sinpangan na, namangon danaw Dyos so matarek a kabōsor ni Solomon a si Reson a pōtot ni Elyada. Si Reson, ki nayyayo do āmo naw a si Hadadeser a āri no Sobah. 24 Do nakarahan do nakapangābakaw ni Dabid so bōyot saw ni Hadadeser,§11:24 2 Sam. 8:3-12, 10:18; 1 Kron. 18:3-11 nangpeh si Reson so bonggoy no mahahakay a mangrangraot, kan nayparin iya a pangōlo da. Nangay sa Reson do Damasko a dawriw nagyanan da, kan pinayparin da iya a āri da. 25 Si Reson, ki iyaw asa a kabōsor no Israel do ōnos no kabyay ni Solomon a nachirapa do riribok a pinarin Hadad. Dawa, nagtoray si Reson do Aram, kan nayparin a kabōsor no Israel.

26 Aran si Jeroboam a pōtot ni Nebat, ki nagribīldi di āri. Iya, ki asa dyirad opisyal ni Solomon a yapo do Sereda do Epraim. No ānang na, ki bālo a mayngaran so Serwa.

27 Iyaw nyayaw pakasaritāan no nakapagribīldi na di Solomon. Do kayanaw a mapatnek ni Solomon so Millo,*11:27 2 Sam. 5:9; 1 Ār. 9:15 kan mamon so paytawan no ahadaw no syodad ni Dabid a āmang na, 28 naboya na si Jeroboam a makabael a mahakay. As do kaboyaw sya ni Solomon an maypāngo kagaget na a maytarabāko, tinongdo na a iyaw manyidechideb so tābo napīlit saw a maytarabāko do trībo ni Jose.

29 Do dāwri, do nakahtot naw ni Jeroboam do Jerosalem, nachibayat dya si Ahiha a propīta a taga Silo a nakalaylay so bayo a kagay. Sira dadwa, ki abaw masngen a rārayay da do gaganaw no syodad. 30 Binahas ni Ahiha iyaw bayowaw a kagay a inlaylay na, kan piniripirit na so asa poho kan dadwa kapidāso. 31 As binata na di Jeroboam a kāna, “Manghap ka so asa poho a kapidāso a para dyimo, ta nyaw bata ni ĀPO a Dyos no Israel a kāna, ‘Chiban mo, kwanen konchi a īto a piriten pagāryan do kakamay ni Solomon, kan itoroh konchiw asa poho a trībo dyimo. 32 Ki asanchi a trībo dyira na a maynamot do pachirawatan ko a si Dabid kan no syodad a Jerosalem a pinidi ko a yapo dyirad tabo trībo no Israel. 33 Parinen konchiw nyaya a maynamot ta tinadyichokodan na yaken, kan nagdaydāyaw di Astoret a dyosa dan Sidonyo, di Chemos a dyos dan Moabita, kan di Molek a dyos dan Ammonita. Naybibyay aba do chakey ko, pinarin nabaw kosto do kapanyideb ko, mana tinongpal na sabaw pangeddeng ko sa kan kapangokom ko sa a akmas pinarin Dabid a āmang ni Solomon.

34 “ ‘Aran komwan, pakarohen ko abanchiw tābo pagāryan do kakamay ni Solomon. Ki palobōsan konchi a tongtongen naw magtoray do ōnos no kabyay na a maynamot di Dabid a pachirawatan ko a pinidi ko a nangtongpal so bilbilin ko kan pangeddeng ko. 35 Ahapen konchiw pagāryan do kakamay no pōtot naw, kan itoroh konchi dyimom Jeroboam asa poho a trībo. 36 Ki itoroh konchiw asaw a trībo do pōtot ni Solomon tan si Dabid a pachirawatan ko, ki myan anchiw kapotōtan na a akmay paysohwan a magnanayon do salapen ko do Jerosalem a syodad a pinidi ko a pagdaydāyawan so ngaran ko. 37 Ki payparinen konchi imo a magtoray do tābo a chakey no pōso mo. Imonchi iyaw āri a magtoray do Israel. 38 As an parinen monchiw tabo a ibilin ko dyimo, kan maybibyay ka do chakey ko, parinen mo kosto do kapanyideb ko, kan tongpalen mo saw pangeddeng kan bilbilin ko akmas pinarin ni Dabid a pachirawatan ko, nāw konchi dyimo. Payparinen koymo kan siraw kapotōtan mo a manayon so kapagtoray akmas pinarin kwaw di Dabid, as kan itoroh konchi dyimo Israel. 39 Dosāen ko sanchiw kapotōtan ni Dabid maynamot do gatos ni Solomon, ki magnanayon aba.’ ”

40 Pinādas ni Solomon a dimanen si Jeroboam, ki nayyayo a nangay do Egipto di Sishak a āri, kan nagyan daw nandad nakadiman ni Solomon.

41 Siraw kadwan saw a napariparin do nakapagāri ni Solomon, kan tabo a pinariparin na kan kinasīrib na, ki naitolas sabawri do librowaw no kaparin ni Solomon? 42 Nagāri si Solomon yapo do Jerosalem do tabo Israel so apat a poho a katawen. 43 As nachipaynahah si Solomon dyirad aāmang na saw, kan naitābon do syodad ni Dabid a āmang na. As si Rehoboam a pōtot na, ki nachitādi dya a āri.