1 Do irahem no tatdo a katawen, ki abaw gobat do payawan no Aram kan Israel. 2 Ki do chatatdo naw a katawen ni Jehosapat a āri no Joda, minosok a nangay di Ahab a āri no Israel. 3 Binata no āryaw no Israel dyirad opisyalis na saw a kāna, “Dyaten abawriw Ramot-gilead?*22:3 Jos. 20:8; 1 Ār. 4:13 Ki āngo ta abayaw parinen ta tan mapabidi ta a mirwa yapo do āri no Aram?”

4 As inyahes na di Jehosapat a kāna, “Machangay kawri dyaken a machigobat dyirad Arameowaw do Ramot-gilead?”

Inatbay ni Jehosapat do āryaw no Israel a kāna, “Yaken, ki akma ko dyimo. Siraw tawotawo ko, ki akma say tawotawo mo. Siraw kabalyo ko, ki akma say kabalyo mo.” 5 As binata pa ni Jehosapat do āryaw no Israel a kāna, “Ki manma manahes ka pa so balākad ni ĀPO.”

6 Dawa, pinaychipeh no āryaw no Israel propīta saw a sigōro apat a gasot a mahahakay, kan nanahes dyira a kāna, “Mangay akori a machigobat dyirad Arameo do Ramot-gilead mana engga?”

Inatbay da a kon da, “Mangay ka, ta iparawat nanchi ni ĀPO do kakamay mo, mo āri.”

7 Ki inyahes ni Jehosapat a kāna, “Apabawriw no matarek a propīta ni ĀPO dya a maparin ta pa a panahsan?”

8 Inatbay no āryaw no Israel di Jehosapat a kāna, “Ari paw asa mahakay a maparin ta pa panahsan di ĀPO, ki ipsok ko maynamot ta polos a dya mangipadto so maganay a maynamot dyaken an dya marahet. Iya, ki si Mikayas a pōtot ni Imlah.”

Inatbay ni Jehosapat a kāna, “Komwan abaw ibahey mom āri. Adngeyen ta pa, ah.”

9 Do dāwri, tinawagan āryaw no Israel asaw dyirad opisyal naw, kan binata na a kāna, “Yangay mo dya malisto si Mikayas a pōtot ni Imla.”

10 Iyaw āryaw no Israel kan si Jehosapat a āri no Joda, ki nakalaylay sa so laylay naw no āri a nakadisna sa dyirad trono da saw do pangirkanaw a masngen do asdepanaw no rowangan no Samarya, kan myan sa tabo propītaw a mangipadto do salapen da. 11 As si Sedekyas a pōtot ni Kenaanah, ki myan pinarin na dadwa a pasek a sinan olong, kan binata na a kāna, “Nyaw bata ni ĀPO: ‘Dyirad dya saya, ki akmanchiw olong a maiwekwek dyirad Arameo saya mandan marārayaw sa.’ ”

12 Tabo saw no propītaw, ki nagpadto sa malit a kon da, “Raoten mo Ramot-gilead, kan magballīgi kanchi, ta iparawat nanchi ni ĀPO do kakamay mo.”

13 Iyaw natoboyaw a nangay a nanawag di Mikayas, binata na di Mikayas a kāna, “Chiban mo. Malit saw kadwan saw a propīta a nangipadto so ballīginchi no āri. Maychirin ka met a machitōnos dyira, kan maychirin ka so makahwahok ah.”

14 Ki binata ni Mikayas a kāna, “Akmas kasigorādo no kasibibyay ni ĀPO, ibahey ko di āri iyaw mismo a ibahey ni ĀPO dyaken.”

15 Do nakawara naw, inyahes no āryaw dya a kāna, “Mikayas, mangay namenori a raoten saw Arameowaw do Ramot-gilead, mana engga?”

Inatbay na a kāna, “On, mangay ka, kan magballīgi ka, ta iparawat nanchi ni ĀPO do kakamay no āri.”

16 Ki binata no āryaw dya a kāna, “Naypipira dana a machita koymo a magsapata dyaken do ngaran ni ĀPO a abaw matarek a ibahey mo dyaken an dyi lang a iyaw oyodaw?”

17 Inatbay ni Mikayas a kāna, “Do parmata, naboya ko tabo bōyot no Israel a naychawpit do paytoytokonan saya a akma saw karniro a abo mangipastor sira. As binata ni ĀPO a kāna, ‘Siraw nyaya tawo, ki abaw āmo da. Palobōsan mo kāda asa a somabat do bahay na a sitatalna.’ ”

18 Binata no āryaw no Israel di Jehosapat a kāna, “Inbahey ko abawri dyimo a polos a dya mangipadto so maganay a maynamot dyaken an dya marahet?”

19 Tinongtong ni Mikayas a kāna, “As dawa, adngeyen mo chirin ni ĀPO: Naboya ko si ĀPO a maydisna do trono na karāman tabo bōyot na do hanyit a maytēnek a omdibon sya do kawanan na kan do kaholi na. 20 Kan binata ni ĀPO a kāna, ‘Sino mangsolisog anchi di Ahab tan yangay na raoten Ramot-gilead a komwan do kadimanan na?’

“Myan asa a nangibahey so nyaya, kan myan paw inbahey no matarek. 21 Kapanawdyan na, myan asa ispirito a naypantad a naytēnek do salapen naw ni ĀPO, kan binata na a kāna, ‘Yaken anchiw mangsolisog sya.’

22 “ ‘Na, maypāngo?’ inyahes ni ĀPO.

“ ‘Mangay akonchi, kan mayparin a mabayataw a ispirito do dangoy saw no tabo propīta na,’ binata na.

“ ‘On, maparin kanchi a mangsolisog sya. Mangay ka kan parinen mo,’ binata ni ĀPO.

23 “Dawa, chiban pa. Napangay si ĀPO so maybayataw a ispirito do dangoy da sa no tabo dan nyaya a propīta mo. Si ĀPO, ki nangeddeng so didigra para dyimo.”

24 Sinpangan na, naypasngen si Sedekyas a pōtot ni Kenaanah di Mikayas, kan sinipat naw rōpa naw, as kan binata na dya a kāna, “Taywaran nayam ispirito ni ĀPO a yapo dyaken a maychirin dyimo? Pī!”

25 Inatbay ni Mikayas a kāna, “Mapatakan monchi do arawaw a mangay ka a tomayo do makatayrahemaw a kwarto.”

26 Inbilin no āryaw no Israel do asa dyirad opisyalis naw a kāna, “Tiliwen mo si Mikayas, kan pabidyen mo di Amon a torayen no syodad kan di Joas a pōtot no āri. 27 Ibahey mo a kon mo, ‘Nyaw bata no āri: Ipabahod nyo nyaya tawo, kan pakanen nyo lang so tināpay kan ranom mandan maybidi ako a abos kaparoparwan.’ ”

28 Binata ni Mikayas a kāna, “An makapaybidi ka a abos kaparoparwan, inpaichirin aba ni ĀPO dyaken.” As innāyon na pa a kāna, “Mangadngey kamo so inchirin ko, inyo a tabo a tawotawo!”

29 Sinpangan na, iyaw āryaw no Israel kan si Jehosapat a āri no Joda, ki nangay sa a machigobat do Ramot-gilead. 30 Binata no āryaw no Israel di Jehosapat a kāna, “Magpamarang ako a matarek a tawo a somdep do paggogobatanaw. Imo, ki paylaylay mo laylay mo a āri.” Komwan pinarin no āryaw no Israel kan nangay do paggogobatanaw.

31 Do dāwri, inbilin no āryaw no Aram dyirad tatdo saw a poho kan dadwa do komander saw no loglogan na a pachigobat a kāna, “Machilāban kamo aba do aran sino a soldādo a sinsinan mana matohos so saad, malaksid lang do āri naya no Israel.” 32 Do kaboya daw sya no komander saw no loglogan a pachigobat si Jehosapat, iniktokto da a kon da, “Syirto a iyaw nyayaw āryaw no Israel.” Dawa, somniwal sa a mangdarop sya, ki nangngēngey si Jehosapat. 33 Ki do kaboya dan komander saw a iyabaw āri naw no Israel, insardeng daw nanglakat sya.

34 Ki myan asa a napapana naw dawaw no bai na do kompormi, kan nanaho naw āryaw no Israel do payawanaw no naytapangan no sarāpaw no barōkong na. Binata no āryaw do mangitorotorongaw so logan na a pachigobat a kāna, “Magbira ka, kan ihtot mo yaken do paggogobatanaya. Nanaho ako.” 35 Do dāwri a araw, naypāngay gobat, kan nāw na naipanareng āryaw do irahem no logan naw a nakasalap dyirad Arameo saw. Minoyog iyaw rayaw a yapo do sora naw do rātagaw no logan na, kan do dāwri a mahep, ki nadiman. 36 As do kasdep naw no araw, myan ngengey a nagwaras do intīro a bōyot: “Kāda asa, ki somabat do bōkod na a idi! On, kāda asa, magatras a maybidi do bōkod na a tana!”

37 Dawa, nadiman āryaw, kan naiyangay do Samarya kan intābon da daw. 38 Inoyasan daw loganaw do līnawaw no Samarya a paryosan dan balangkantis. As siraw chitowaw, ki tinapotaposan daw raya no āriyaw a akmas inchirinaw ni ĀPO.

39 Siraw kadwan saw a napariparin do nakapagāri ni Ahab, kan tabo pinariparin na, iyaw palasyowaw a pinatnek na a binistyan na so sōng dan elipanti, kan tabo syodad saw a pinatnek na, ki naitolas sabawri do librowaw no pakasaritāan dan ar-āri no Israel? 40 Nachipaynahah si Ahab dyirad aāmang na saw. Si Ahasyas a pōtot na, ki nachitādi dya a āri.

41 Si Jehosapat a pōtot ni Asa, ki nayparin a āri no Joda do chapataw a tawen a kapagāri ni Ahab a āri no Israel. 42 Nagtawen si Jehosapat so tatdo a poho kan dadima do nakapagāri na, kan nagāri do Jerosalem so dadwa poho kan dadima katawen. No ngaran ānang na, ki si Asobah a pōtot a mabakes ni Silhi. 43 Inonotan naw tābo dadakay ni āmang na, kan nachisyay aba. Pinarin na naw kosto do kapanyideb ni ĀPO. Aran komwan, siraw logar saw a pagdaydayāwan, ki napakaro saba. As siraw tawotawowaw, ki tinongtong daw mangidāton so dāton kan naysosoh so insinso do dawri. 44 Si Jehosapat, ki nachikapya pa do āryaw no Israel.

45 As siraw kadwan saw a napariparin do nakapagāri ni Jehosapat, iyaw kabīlegaw a inpaboya na, kan maypāngo nakapachigobat na, ki naitolas sabawri do librowaw no pakasaritāan dan ar-āri no Joda? 46 Inabo na sa do tanaw nabidibidin saw a mahahakay a balangkantis†22:46 1 Ār. 14:24, 15:12 a magsirsīrbi do pagdaydayāwan daw no didyosenaw a natokos pa daw a aran do katayoka no nakapagtoray ni Asa a āmang na.

47 Do dāwri, abaw āri do Edom. Iyaw pinakainawanaw a naitongdo no āri no Joda, ki nagtoray daw.

48 Napaparin si Jehosapat so barko saw a pagbyahi do Opir a panghap so balitok. Ki polos a dyi sa nakapagbyahi, ta nalasa saw gapor do Esyon-geber.‡22:48-49 Esion-gerber, ki myan do payis no Mabaya a Tāw do Edom, kan mabato do aptan na. Aran do chimpo ni Solomon, ki napatnek saw gapor daw (1 Ār. 9:26). Nalasa saw gapor maynamot do kapachirapa ni Jehosapat di Ahasyas. 1 Ār. 9:26; 2 Kron. 20:35-37 49 Sinpangan na, binata ni Ahasyas a pōtot ni Ahab di Jehosapat a kāna, “Palobōsan mo pa saw tripolanti kwaya a machipagbyahi dyirad tripolanti mwaya.” Ki naskeh si Jehosapat.

50 As nachipaynahah si Jehosapat dyirad aāmang na saw, kan naitābon a nachirapa dyira do syodadaw ni Dabid. Si Jehoram a pōtot na, ki nachitādi dya a āri.

51 Si Ahasyas a pōtot ni Ahab, ki nayparin a āri no Israel do Samarya do chaasa poho na kan papito a katawen no nakapagāri ni Jehosapat a āri no Joda. Nagāri do Israel so dadwa a katawen. 52 Pinarin naw marahet do kapanyideb ni ĀPO, ta inonotan naw dadakay da āmang kan ānang na, kan iyaw dadakay naw ni Jeroboam a pōtot ni Nebat a pinawnot na saw tawotawo no Israel a naygatos. 53 Nagsīrbi di Baal kan nagdaydāyaw dya. Pinasoli na si ĀPO a Dyos no Israel a akmas pinarin naw ni āmang na.