1 As dawa do dāwri, nangay saw tawotawo no Kiryat-jearim, kan inhap daw lakāsanaw ni ĀPO. Inyangay da do bahay ni Abinadab a myan do paytokonanaw, kan intatārek da a para di ĀPO si Eleasar a pōtot na a mangbantay so lakāsanaw ni ĀPO.

2 Nahay a minyan lakāsanaw do Kiryat-jearim. Myan dadwa poho a katawen na daw, kan tabo tawotawo no Israel, ki tomnanyis sa kan nangdaw so sidong ni ĀPO. 3 Inbahey ni Samwel dyirad tabo tawotawo no Israel a kāna, “An oyod a maybidi kamo di ĀPO do tābo pōso nyo, ipoha nyo na saw gan-ganaet saya didyosen nyo kan siraw naikitikitaya a Astarot, kan italek nyo di ĀPO inawan nyo kan iya lang pagsīrbyan nyo, as kan isalākan nanchi inyo dyirad Pilisteo saw.” 4 Dawa, inpoha da no Israelita saw nakitikitan saw a Baal kan Astarot, kan si ĀPO lang nagsīrbyan da.

5 Do dāwri, binata ni Samwel a kāna, “Maychichipeh kamo a tabo a Israelita do Mispa, kan paydasal konchi inyo di ĀPO.” 6 Do nakapaychichipeh daranaw do Mispa, namoranom sa kan pinado da do salapen ni ĀPO. Nagayonar sa do dāwri a araw, kan inpodno daw naygatosan da. Binata da a kon da, “Naygatos kami di ĀPO.” Si Samwel, ki nangipangōlo siras Israelita saw do Mispa.

7 Do nakadngey daw no Pilisteo so nakapaychichipeh daw no Israelita do Mispa, somnonget saw Pilisteowaw tan yangay da sa raoten. Do nakapakadngey daw no Israelita saw so maynamot do dyaya, namo sa dyira. 8 Binata da di Samwel a kon da, “Magsardeng kaba machikakaāsi di ĀPO a Dyos ta para dyaten tan isalākan na yaten do toray dan Pilisteo saya.” 9 Do dāwri, nanghap si Samwel so somoso paw a orbon a karniro, kan simememeh a sinosohan na a indāton di ĀPO. Nachikakaāsi di ĀPO para dyirad Israelita saw, kan inatbay ni ĀPO iya.

10 Do kadama naw ni Samwel a mangidāton so masosohanaw a dāton, maypaypasngen dana saw Pilisteo saw tan raoten da saw Israelita saw. Ki do dāwri a araw, pinayedey ni ĀPO so mayit a nawriw nangtaranta dyirad Pilisteo saw, kan naābak sa do salapen dan Israelita saw. 11 Nakalyalisto saw Israelitaw a komnaro do Mispa, kan linakatan da saw Pilisteo saw a pinaychadimadiman do rarahanaw a manda do mamangketaw do ibaba no Bet-kar.

12 Do dāwri, nanghap si Samwel so rakoh a bato a pinangay na do nagbaetanaw no Mispa kan Sen. Pinangaranan na so Ebeneser*7:12 No chakey na batahen “Ebeneser”, ki “bato no sidong”. Sal. 18:2 a binata na a kāna, “Manda do dyaya, sinidongan na yaten ni ĀPO.” 13 Dawa, naābak saw Pilisteo saw, kan rinaot da paba a mirwaw tana no Israelita. Do ōnos no nakabyay ni Samwel, intopak ni ĀPO dōsa yapo do tanoro na dyirad Pilisteo saw.

14 Siraw idiidyaw do nagbaetan dan syodad a Ekron kan Gat a sinākop dan Pilisteo do Israel, ki napabidi dana dyira. Winawayaan pa no Israel omdibonaw a tana do toray dan Pilisteo saw. Maynamot ta komwan, myan danaw kapya dyirad Israelita saw kan siraw Amoreo saw a omyan pa daw.

15 Indaōlwan ni Samwel Israel do ōnos no nakabyay na. 16 Tinawen a nangay a nangdibon do Betel, Gilgal, kan do Mispa tan iyaw maghwis do dawri sa a logar. 17 Ki kanāyon pa a naybidi do Rama do yanan no bahay na. Aran do dawri, ki iya paw maghwis. Do Rama, ki napatnek daw so altar di ĀPO.