1 Sinpangan na, si Nahas a iyaw Ammonitaw, ki indaōlwan na saw bōyot naw a nanglakob so idi a Jabes do Gilead. Binata da no tabo tawotawo saw no Jabes di Nahas a kon da, “Mamarin ka dyamen so katōlagan, kan magsīrbi kami dyimo.”

2 Ki initbay ni Nahas a Ammonita a kāna, “Mamarin ako lang dyinyo so katōlagan an koyden ko makinkanawan a mata no kāda asa dyinyo tan masnesnekan saw tabo a Israel.”

3 Binata da no panglakayen da saw no Jabes a kon da, “Torohan mo pa yamen so papito a karaw tan makapanoboy kami siras mangay a mangipadāmag do intīro a Israel. An abo mangay a mangisalākan dyamen, magpaitoray kaminchi dyimo.”

4 Do nakapakarapit daw no natoboy saw do Gibea do yanan ni Saulo, inpadāmag daw dāmagaw dyira, as kan nakalyak sa tabo tawotawowaw a tomnanyis. 5 Kosto a kayayapo ni Saulo do hakawan do dāwri, kan sarsaronwen na saw bāka naw. Inyahes na dyira a kāna, “Na, āngo naparin? Āngo itanyis da tabo?” Inbahey da dya iyaw inpadāmag daw no natoboy saw a yapo do Jabes.

6 Do nakadngey naw ni Saulo so nawri, nangay iyaw panakabalin ispirito no Dyos dya, kan taywaraw nakapakasoli na. 7 Nanghap so asa a kaparis a bāka, kan inaktekteb na sa, as kan nanoboy siras mangay a mangyangay so naktekteb saw do intīro a Israel. Ipakatoneng na a kāna, “Komwan anchiw maparin do bāka no aran sino a dya monot da Saulo kan Samwel.” Nagtopak dyirad tawotawowaw nakamo da di ĀPO, kan tabo sa, ki nāsa dana sa a minonot. 8 Do nakapaychipeh naw sira do Besek, siraw mahahakay no Israel, ki myan bidang da a 300,000. As siraw mahahakay no Joda, ki 30,000.

9 Inbahey da dyirad natoboy saw a nangay dyira a kon da, “Ibahey nyo dyirad tawotawo no Jabes do Gilead a anchan mayegen araw an delak, maisalākan sanchi.” Do nakaipadāmag daw no natoboyaw dyirad tawotawo no Jabes, taywaraw nakasoyot da. 10 Inbahey da di Nahas a kon da, “Anchan delak, magpaitoray kaminchi dyimo, kan parinen monchi dyamen aran āngo a chakakey mo.”

11 Do somaronwaw a araw,*11:11 No kairogi no araw dyirad Israelita, ki do kapaysarisari. pinaysisyay sa ni Saulo tawotawo naw do tatdo a gropo. Do kaparbangonaw,†11:11 Iyaw ahep, ki naychacharwa so tatdo. Iyaw kapanawdyan, ki sigōro alas dos a manda do kapaysēsedang. nangay sa do kampo daw no Ammonita saw, kan pinaychadimadiman da sa manda do kayegen danaw no araw. Naychawpit saw nakalāsat saw tan abo mabidin a myan so rārayay.

12 Do dāwri, binata da no tawotawo saw di Samwel a kon da, “Sino saw nakabataw sya a si Saulo, ki machita aba magāri dyaten? Iyangay nyo sa dya, ta dimanen namen sa.”

13 Ki binata ni Saulo a kāna, “Abaw maipadiman sichangori a araw, ta sichangori a araw nakaisalākan ni ĀPO so Israel.”

14 Binata ni Samwel dyirad tawotawo saw a kāna, “Mangay ta do Gilgal, kan pabayohen ta daw iyaw kinaāri ni Saulo.” 15 Dawa, nangay sa tabo tawotawo do Gilgal, kan pinaneknekan da a si Saulo iyaw āri da do salapen ni ĀPO. Do dawri a yanan, nangidāton sa so dāton a pachikapya do salapen ni ĀPO. As si Saulo kan tabo saw Israelita, ki nagsilibrar sa so rakoh.