1 Si Saulo, ki nagtawen so tatdo a poho do nakapagāri na do Israel, kan nagāri so apat a poho kan dadwa katawen.*13:1 Iyaw tawen ni Saulo, ki aba do Hebreo a chirin, kan masigorādo aba. Do Aramid 13:21, naitolas daw a nagāri si Saulo, ki 40 a katawen.

2 Namidi si Saulo so tatdo a rībo a mahahakay dyirad Israelita saw. Iyaw dadwa rībo, ki iyaw rārayay na do Mikmas kan do paytoytokonanaw no Betel. No asa rībo, ki nachangay sa di Jonatan a pōtot na do Gibea a tana ni Benhamin. As siraw kadwan saw, ki pinasabat narana sa do tolda da saw.

3 Rinaot ni Jonatan siraw matokpohaw a bonggoy a soldādo dan Pilisteo saw a myan do Geba, kan nadāmag dan Pilisteo saw. Do dāwri, inpatanggoyob ni Saulo iyaw trompītaw a panawag na so gobat do intīrwaw a tana a mangibahebahey a kāna, “Mangadngey kamo a Hebreo!” 4 Tabo tawotawo no Israel, ki nadāmag da a rinaot sa ni Saulo iyaw kampo daw no Pilisteo, kan nyaw naynamotan na a pinaylaylangetnget dan Pilisteo Israelita saw. Dawa, siraw Israelita saw, ki napatawagan sa a machirapa da Saulo do Gilgal.

5 Naychichipeh saw Pilisteowaw tan gobaten da saw Israelitaw. Myan tatdo a rībo a logan da a pachigobat, anem a rībo a nakakabalyo, kan soldādo sa a akmas kāro no anay do payis no kanayan. Nagkampo sa do Mikmas do dayāen no Bet-aben. 6 Do nakaboya daw sya no mahahakay saw a Israelita a magdilikādo dana sa so kayiyan kan malidyatan dana saw bōyot da, myan saw tomnayo do aschischip saw kan abot saw. Myan saw tomnayo do kalalaytan, do tantanem saw, kan do nakadyan saw a yanan a pangapyan so ranom. 7 Kadwan dyira, ki namtang sa do Oksong a Jordan a kominwan do tana a Gad kan Gilead. Ki si Saulo, ki dinitā na do Gilgal, kan tabo saw bōyot a myan dya, ki maychamirpirpir sa do kāmo da. 8 Nangnanaya so papito a karaw a akmas inbaheyaw ni Samwel, ki nangay aba si Samwel do Gilgal. As siraw soldādo naw, ki maychawpit dana sa. 9 Dawa, binata na a kāna, “Yangay nyo dya iyaw masosohanaw a dāton kan iyaw pachikapyaw a dāton.” Kan indāton ni Saulo iyaw no masosohanaw a dāton. 10 Apāman a natayoka si Saulo a nangidāton so masosohanaw a dāton, nawara si Samwel. Minohtot si Saulo a nangbayat a mapādyos di Samwel.

11 Inyahes ni Samwel a kāna, “Āngo pinarin mwaya?”

Ki initbay ni Saulo a kāna, “Na, nakaboya kwaw sya a maychawpit dana saw tawo ko saya, as do ka dyi mo naw a kawara do inbahey mwaw a araw a kawara mo, as kan do nakakpeh daw no Pilisteo saw do Mikmas a magsagāna a machigobat. 12 Dawa, naktokto ko a kon ko, ‘Raoten darana yaken no Pilisteo saya do dya Gilgal, ki aryak payad nanahes so sidong di ĀPO.’ Dawa, pinīlit ko mangidāton so dāton a masosohan.”

13 Tinbay ni Samwel a kāna, “Iyaw nawri a pinarin mo, ki kabon arang. Inanohdan mwabayaw inbilin na dyimo ni ĀPO a Dyos mo. An pinarin mo aket, namna, patneken anchi ni ĀPO iyaw pagāryan mo do Israel a magnanayon. 14 Ki changori, tomongtong pabaw kayanaya no pagāryan mo. Si ĀPO, ki nachichwasan naw mahakay a mapodno dya kan natongdo iya a mangipangōlo dyirad tawotawo naw, ta inanohdan mwabaw bilinaw ni ĀPO.”

15 Komnaro si Samwel do Gilgal, kan somnonget do Gibea do tana a Benhamin.

As si Saulo, ki binidang na saw mahahakayaw a myan pa dya. No bidang da, ki myan ngataw anem a gasot. 16 Si Saulo kan iyaw pōtot naw a si Jonatan, as kan siraw soldādo da saw a myan dyira, ki minyan sa do Geba do tana a Benhamin. Ki siraw Pilisteowaw, ki nagkampo sa do Mikmas. 17 Siraw taga-raot saw, ki minohtot sa a yapo do kampo dan Pilisteo saw a tatdo a kabonggoyan. No asaw a kabonggoy, ki lomnongo sa do Oprah do tana a Swal. 18 No chadadwa naw a kabonggoy, ki somniwal a lomnongo do Bet-horon. As iyaw chatatdo naw a kabonggoy, ki lomnongo do payawan naw do letteng a maytatalamad do payahosongan no Seboyim a somalap do let-ang.

19 Abaw manyichipo a masarakan do intīro a tana no Israel, ta siraw Pilisteowaw binaywan da a kon da, “Āngwan mamarin saw Hebreo saw so ispāda kan chibot da!” 20 Dawa, sira tabo Israelita saw, ki minosok sa dyirad Pilisteo saw tan ipatarem da saw arado, asāda, wasay, kan sasādyit da. 21 No bāyad no mapatarem so arado mana asada, ki dadwa dēkey a plata. As asa dēkey a plata do mapatarem so pīko kan wasay kan mangipalinteg so kayo a pangābog so bāka. 22 Dawa, do arawaw no kapaggogobat, ki abaw ispāda mana chibot a nachichwasan da dyirad soldādo saw a myan da Saulo kan Jonatan malaksid dyira.

23 Do dāwri, myan matokpoh a bonggoy a soldādo dan Pilisteo a nangay do Ayayamanaw no Mikmas a magbantay daw.