1 Inbahey ni Saulo di Jonatan kan dyirad tabo opisyalis na a machita dimanen da si Dabid. Ki si Jonatan, ki taywaraw kapachisīt na di Dabid. 2 Dawa, binallaāgan na si Dabid a kāna, “Si āmang ko, ki chichiwasen naw gondāway a mangdiman dyimo. Anchan mabekas, magannad ka. Mangay ka a tomayo kan nāw mo pa daw. 3 Mohtot akonchi kan maytēnek akonchi a machitalin di āmang ko do masngenaw do tinaywan mwaw. Ta dawrinchiw pachisarsaritāan ko so maynamot dyimo. An āngonchiw mapatakan kwaw, ki ibahey konchi dyimo.”

4 Nachisarīta si Jonatan di Saulo a āmang na so magaganay a maynamot di Dabid. As inbahey ni Jonatan dya a kāna, “Dyi pakono a mamarin iyaw āri so gatos do pachirawatan naw a si Dabid, ta abaw naygatosan na dyimo, kan no pinariparin na, ki kaganayan mo a tabo. 5 Inposta naw byay na do nakadiman naw so Pilisteowaw, kan inyangay ni ĀPO mabīleg a ballīgi do tabo a Israel. Naboya mo kan nagragragsak ka pa. Āngo paygatos mo changori do kapangdiman so abos gatos a akmas Dabid a abos paynamotan?”

6 Inadngey ni Saulo si Jonatan kan insapata na a kāna, “Ta akmas kasigorādo no kasibibyay ni ĀPO, maipadiman aba si Dabid.”

7 Katayoka na, tinawagan dana ni Jonatan si Dabid kan inbahey na dya tabo iyaw naparin. Do dāwri, inahap dana ni Jonatan si Dabid do yanan ni Saulo, kan nagsīrbi dana minirwa si Dabid di Saulo a akma do kachwaw.

8 Minirwa dana myan gobat, as nangay sa Dabid a nanggobat siras Pilisteowaw. Rinaot da sa kan inābak da sa a mandan nakapaychapayyapayyayo da.

9 Ki do asa karaw, iyaw marahetaw a ispirito a pinalobōsan ni ĀPO, ki nangay di Saulo do kayan na a naydiydisna do bahay naw a siig-igpet so chibot naw. As si Dabid, ki myan a magtoktokar so arpa naw. 10 Pinādas dana ni Saulo a pinalbot di Dabid chibot naw do dyindyinaw, ki nakadichan si Dabid, as nachilabeng chibotaw do dyindyinaw. Nayyayo si David a naglības do dāwri met lang a ahep.

11 Dāwri pa a ahep, nanoboy si Saulo siras mangdāan do bahay ni Dabid tan dimanen da an mabekas. Ki si Mikal a baket ni Dabid, ki binallaāgan na a kāna, “An dyi ka maglības sichahep, ay, sigorādo a madiman kanchi an delak.” 12 Dawa, pinagchin ni Mikal si Dabid a yapo do bintanaw.*19:12 Jos. 2:15; Ara. 9:25 Nayyayo kan naglības. 13 Do nakakaro naw, nanghap si Mikal so asa didyosen, as nakapapoktad na sya do katryaw. Pinongosan na so ayob, kan pinangayan na so boboh no kalding iyaw no ohwanan naw.

14 Do nakapanoboyaw ni Saulo siras mangdāan saw a mangtiliw di Dabid, inbahey ni Mikal a kāna, “Maganyitaw.”

15 Ki minirwa dana nanoboy si Saulo so manyideb di Dabid. Binata daw bilin naw a kāna, “Iyangay nyo dya a sikakatri tan yaken mangdiman sya.” 16 Ki do nakasdep daw no natoboy saw, napatakan da a didyosen lang myanaw do katryaw, kan boboh no kalding ohwanan naw.

17 Binata ni Saulo di Mikal a kāna, “Āngo ta inallīlaw mo yaken so komwan, kan pinalobōsan mwaya nakalības kabōsor kwaw?”

Ki tinbay ni Mikal a kāna, “Naon ata, inamomo naw yaken a an dyi kwa payyayohen, ki dimanen na kono yaken.”

18 Do nakapayyayo kan nakapaglības naw ni Dabid, nangay di Samwel do Rama, kan inbahey na dya tabo pinarin naw ni Saulo dya. Do dāwri, nangay sa Samwel kan Dabid do Nayot,†19:18 Nayot, ki myan mana masngen do Rama (19:19). Batahen no kadwan, ki kampo a pachinanawan dan propīta. kan minyan sa daw. 19 Nadāmag ni Saulo a si Dabid, ki myan do Nayot do Rama. 20 Dawa, nanoboy si Saulo so mangay a mangtiliw sya. Ki do nakapakarapit daw, naboya daw no bonggoy daw no propīta a madama a mangipadpadto, as myan si Samwel a maytēnek a pangōlo da. Iyaw Ispirito no Dyos, ki pinabīleg na saw tinoboy saw ni Saulo, kan aran sira, ki nachipangipadto sa. 21 Do nakadamāgaw ni Saulo so nyaya, nanoboy dana so kadwan pa mangtiliw sya. Aran sira, ki nachipangipadto sa. Naypitdo dana a nanoboy si Saulo, ki nachipangipadto sa a akma siras nanmaw. 22 Sinpangan na, iya dana mismo kominwan do Rama, kan nangay do rakohaw a bobon do Seko. Inyahes na dyira a kāna, “Yanan da Samwel kan Dabid?”

“Na, ari saw dwa Nayot do idi a Rama,” kon da.

23 Dawa, nangay si Saulo do Nayot do Rama. Ki iyaw Ispirito no Dyos, pinabīleg na pa iya. As aran iya, ki nangipadpadto do kayam na a manda do Nayot. 24 Binahas naw laylay na saw, kan nangipadto do salapen ni Samwel. Naypoktad a silalābos a naychasaryan do dāwri a araw kan naychararakan. Ta dawa, batahen dan tawotawowaw a kon da, “Asa pawri si Saulo dyirad propīta saya?”