1 Sinpangan na, nangay saw Sipita*26:1 1 Sam. 23:19 saw di Saulo do Gibea a nangibahey dya a kon da, “Ari abawris Dabid a tomayotayo do paytokonanaya no Hakilah a dayāen Jesimon?”

2 Dawa, minosok si Saulo do Let-ang no Sip a nachirayayan tatdwaw a rībo a napidi a mahahakay no Israel a mangay a mangchichwas di Dabid. 3 Nagkampo sa Saulo do payis naw no rarahan do paytokonan no Hakilah do dayāen no Jesimon, ki nāw da daw da Dabid do let-ang. Do nakapatak naw a inonotan ni Saulo daw, 4 nanoboy so ispya na sa, kan nadāmag na a oyod a nawara si Saulo.

5 Sinpangan na, nangay si Dabid do yananaw no nagkampwan da Saulo. Naboya na a nakapoktad a nakaycheh sa Saulo kan si Abner a komander no bōyot na a pōtot ni Ner a dinibon dan bōyot daw a naynepdep.

6 Inyahes ni Dabid di Ahimelek a Heteo kan di kakteh ni Joab a si Abisay a si ānang na, ki si Seroyas a kāna, “Sino machangay dyaken a mosok dwa yanan Saulo?”

“Na, machangay ako dyimo ah,” kāna ni Abisay.

7 Dawa, naypasngen sa Dabid kan Abisay do bōyot saw ni Saulo do kamahep, kan myan si Saulo a naypoktad a makaycheh do irahem no kampo da. Myan chibot naw a naipatarok do tana a masngen do ohwanan naw. Si Abner kan siraw soldādo saw, ki myan sa nakaycheh a nangdibon sya.

8 Binata ni Abisay di Dabid a kāna, “Changori, inparawat no Dyos kabōsor mwaya do tanoro mo. Palobōsan mo pa yaken a mapabono so chibot naya a mangilansa sya do tana. Machita kwaba pabonohen so maypirwa.”

9 Ki binata ni Dabid di Abisay a kāna, “Engga, dimanen mwaba! Ta sino paro maparin a mangranggas so pinidi ni ĀPO kan nāw na dya makagatos? 10 Ta akmas kasigorādo no kasibibyay ni ĀPO, dosāen nanchi ni ĀPO, mana ītonchiw araw a kadiman na, mana mangay anchi do gobat kan madiman. 11 Si ĀPO pakono mangbayo dyaken a mangranggas do pinidi na. Changori, hapen mo naw chibot naya kan iyaw poranomaya a masngen do ohwanan naya, kan may ta na.”

12 Dawa, inhap ni Dabid chibotaw kan poranomaw do masngenaw do ohwanan naw, kan komnaro dana sa. Abaw nakaboya mana nakapatak so maynamot do dya, mana abaw aran asa nayokay. Nakaycheh sa tabo, ta pinaynepdep sa ni ĀPO.

13 Do dāwri, naysopo si Dabid do tōtok naw no paytokonan kan naytēnek daw do midyowaw a mabawa. Myan rakoh a payawan da. 14 As nakapangngēngey na do bōyot saw ni Saulo kan di Abner a pōtot ni Ner a kāna, “Atbayen mo abawri yaken mo Abner?”

Inatbay ni Abner a kāna, “Sino ka a manawatawag so āri?”

15 Binata ni Dabid a kāna, “Matored kabawri a mahakay? Sino akma dyimo do Israel? Āngo ta dyi mo a gwinardyaan iyaw āpo mwaya a āri? Ta myan tawo a nangay a mangdiman so āpo mwaya a āri. 16 No pinarin mwaya, ki maganay aba. Ta akmas kasigorādo no kasibibyay ni ĀPO, imo kan bōyot mo, ki machita a madiman kamo maynamot ta gwinardyaan nyo abaw āpo nyo a pinidi ni ĀPO. Chiban mo paw omdibon mo. Yanan pan chibot naw kan poranomaw a myan do masngenaw do ohwnan na?”

17 Nailāsin ni Saulo iyaw tīmek naw ni Dabid, kan binata na a kāna, “Tīmek mo nawri, mo Dabid a anak ko?”

Inatbay ni Dabid a kāna, “On, yakenaw, mo āpo ko a āri.” 18 Binata na pa a kāna, “Āngo ta lakatan pa no āpo ko iyaw no pachirawatan na? Āngo pinarin ko ta dawa, kan āngo gatos dyi ko a maikarkāro? 19 Changori, adngeyen pa no āpo ko a āri iyaw no ibahey no pachirawatan na. An si ĀPO iyaw nangkiras dyimo a machikontra dyaken, chasoyot na pakono mangrawat so dāton. Ki an panggep lang no tawotawo, mabay pakono sa do salapen ni ĀPO! Ta pinaksyat da yaken sicharaw do binglay ko a matāwid di ĀPO, kan batahen da a kon da, ‘May ka na a magdāyaw dyirad matarek saw a dyos.’ 20 Dawa, changori, dyi pakono a maytetedted raya ko do gan-ganaet a tana a mateng do yanan ni ĀPO. Ta iyaw no āri no Israel, ki yangay na chichwasen iyaw asaya tīmel a akmas asaw a manganop so boyit do katokotokonan.”

21 Do dāwri, binata ni Saulo a kāna, “Naygatos ako. Somabat ka na, mo Dabid a anak ko. Maynamot ta inbidang mo a mapateg iyaw byay ko sicharaw, paynyinan ko pabaymo a mirwa. Nayparin ako a abos arang, kan marahmet iyaw gatos ko!”

22 Initbay ni Dabid a kāna, “Cha dyaw chibot naw ni āri. Manoboy ka pas asa dyirad mahahakay saya a myan dyimo a may a omhap sya. 23 Gon-gonaan ni ĀPO iyaw kāda tawo maynamot do kinalinteg na kan kapodno na. Si ĀPO, iyaw nangidichan dyimo do tanoro ko sicharaw, ta pinadna kwabaw tanoro ko do pinidi ni ĀPO. 24 Ta akmas kasigorādo a ipateg ko byay mo changori a araw, ipateg na pakono ni ĀPO byay ko kan mangidichan dyaken do tabo a pakariribokan.”

25 Do dāwri, binata ni Saulo di Dabid a kāna, “Mabindisyonan ka pakono, anak ko a Dabid! Āro sanchiw mabīleg a kaparin mo, kan magballīgi ka dyira.”

Dawa, komnaro dana si Dabid. As si Saulo, ki naypabidi dana a somnabat.