1 Do dāwri, ginobat dan Pilisteo saw Israelitaw. As siraw Israelitaw, ki nayayowan da saw Pilisteo. Āro dyiraw nadiman do Tokon a Gilboa. 2 Linakatan dan Pilisteo saw sa Saulo kan siraw pōtot na saw a sa Jonatan, Abinadab, kan si Malkiswa, as kan diniman da sa. 3 Naypāngay paw nakapaggogobat do omdibonaw do yananaw ni Saulo. As nadas dan taga-bai saw si Saulo, kan do nakabai daw sya, ki nabigaran so makāro.

4 Binata ni Saulo do taga-sahabit naw so armas na a kāna, “Asoten mo ispāda mwaya, as kabagkong mo dyaken. Ta āngwan mangay sa dyaw dyi saw a nakōgit a Pilisteo, kan bagkongen kan lalāhen da yaken.”

Ki iyaw taga-sahabitaw so armas na, ki taywara namo kan pinarin naba. Dawa, inasot ni Saulo bōkod naw a ispāda, kan rinokōban na. 5 Do nakaboyaw no taga-sahabit naw a nadiman dana si Saulo, tinōlad na a rinokōban ispāda naw, as nadiman do katalin naw ni Saulo. 6 Dawa, si Saulo, siraw tatdo saw a pōtot na, iyaw taga-sahabitaw so armas na, kan tabo no bōyot na, ki nadiman sa do dāwri met lang a araw.

7 Do nakapakadāmag daw no Israelita saw a myan do ammyanānen no Payahosongan a Jesreel kan siraw myanaw do bīt no Oksong a Jordan a naychapayyapayyayo dana saw soldādo saw a Israelita kan nadiman dana sa Saulo kan siraw pōtot naw, ki ninonolay daranaw idiidi da saw kan nayyayo dana sa met. As siraw Pilisteo saw nachitādi sa a minyan daw.

8 Do somaronwaw a araw, do nakangay daw no Pilisteo saw a mangpeh so dyira daw no nadiman saw, nasarakan da si Saulo kan siraw tatdo saw a pōtot na nadiman do Tokon a Gilboa. 9 Pinotohan daw oho daw da Saulo, kan inahap daw armas da saw. Do dāwri, tinoboy da saw tobotoboyen daw do intīro a tana dan Pilisteo tan mangibahebahey so maganayaw a dāmag do timplo no didyosen da a nadiman dana sa Saulo. 10 Pinangay daw armas daw do timplowaw no dyosa da a Astarot, kan inreppet daw bangkay da saw do ahad no idi a Bet-san.

11 Do nakadngey daw no omidi do Jabes-gilead so pinarin daw no Pilisteo saw da Saulo, 12 tabo san matotored saw a taga-gobat, ki nayam sa a naychararakan a nangay do Bet-san. Pinagchin daw bangkay daw da Saulo kan siraw no pōtot na saw do ahad naw no Bet-san, as nakangay da do Jabes a dawriw nangsosohan da sira. 13 Sinpangan na, inhap daw tohatohang da saw, kan intābon da do sīrok no asa a tamaris*31:13 Gen. 21:33 a kayo do Jabes, as kan nagayonar sa so papito a karaw.