No Manōma A Tolas Ni Apostol Pablo Dyirad Tawotawo Do Tesalonika
No Pakatonngan so Paytābwan no Nya Tolas
Intolas ni Pablo nya tolas dyirad tawotawo saw a nanganohed di Jesos do Tesalonika a asa rakoh a idi do probinsya a Masedonya. Sigon do intolasaw ni Lokas do Aramid 17, do nakawaraw ni Pablo kan si Silas a rārayay na a yapo do Pilipos, ki nangay si Pablo a nangnanawo do sinagoga daw no Jodyowaw tan ipakatoneng na dyira iyaw Maganay a Dāmag a maynamot di Kristo.
Do dawri, myan saw Jodyo a makey a manganohed, ki āro saw naskeh. Dawa, do nakaboya daw no maskeh saw a āro danaw yapo do dyi saw a Jodyo somniknan a nanganohed di Kristo, ki nangimon sa. Do dawri, chinpeh da saw āro saw a rārayay da, as kan namarin sa so rakkoh a riribok kan kapangosokoso do intīrwaw a idi tan pahboten da si Pablo do dawri a idi.
Do dawri a riribok, nanyeng a komnaro sa Pablo a kominwan do idi a Berea. Ki aran komwan, linakatan da sa no Jodyowaw a dya nanganohed. As dawa, tinongtong ni Pablo nangay do Atenas do probinsyaw a Akaya (Ara. 17:13-15). An maynamot da Silas kan Timoteo, ki nabidin sad Berea tan sidongan da saw manganohedaw a maypayit do kapanganohed da. Ki siraw minrārayayaw di Pablo, nachangay sa a nandad Atenas, as nakapaybidi dad Berea ta yangay da ibahey bilinaw ni Pablo a basta miras sa Silas kan Timoteo, kan maybabalay saba. Dawa, iniras das Pablo do Atenas (Ara. 17:15).
Sinpangan na, do kayan da paw daw do Atenas, ki nadāmag da a malidyatan dana saw manganohedaw do Tesalonika. Dawa, tinoboy ni Pablo sa Timoteo a maybidi dyira tan ahwahoken da sa (3:1-5). As si Pablo, ki tinongtong naw nangay do Korinto (Ara. 18:1).
Sinpangan na, do nakarapit danaw no araw a kakaro da Silas kan Timoteo do Tesalonika, iniras das Pablo do Korinto (Ara. 18:5). Inpadāmag da dyaw maganayaw a kayayan kapanganohed dad Tesalonika. Inpadāmag da pad Pablo inyahes daw no manganohed daw do Tesalonika a maynamot dyirad kakakteh saw do kapanganohed a nadiman dana. Myan kono kapagmangamanga da an bindisyonan sanchin Āpo Dyos mana engga anchan maybidi si Jesos.
Dawa, naytolas si Pablo dyira. Oyod a rakoh kapagyāman na do Dyos a maynamot do kapagtalek kan adaw da (3:6). Ki aran komwan, ahwahoken na sa a maypaypangay pa sa do kapanganohed da a aran malidyatan dana sa (2:12-14). Inatbay pan Pablo yahahes daw a maynamot dyirad nadiman saw. Ta inanohdan ni Pablo a siraw nadiman do kayan da a manganohed, ki masigorādo a pagōngaren na sanchin Āpo, as kan masyirto a pachirayayen na sanchid Jesos anchan mirwa a mangay. Dawa, mabakel taba a maynamot dyira.
No Naychakarwan no Nya Tolas
Pakatoneng 1:1
No kapagyāman ni Pablo dyirad manganohed 1:2-10
No kapagsīrbi ni Pablo do Tesalonika 2:1-12
No kalidyatan dan manganohed do Tesalonika 2:13-16
No kangsah ni Pablo dyira do Tesalonika 2:17-20
No katoboy ni Pablo si Timoteo dyira 3:1-13
No kabibyay a makadadaw do Dyos 4:1-12
No kangay ni Āpo Jesos 4:13-18
No kapagsagāna ta do kangay ni Āpo 5:1-11
No kapanawdyan saw a nanawo 5:12-28
1 Tesalonika
1
Pakatoneng
1 Yaken si Pablo kan siraw rārayay ko, ki sa Silas kan Timoteo. Cha dyaw ipaw-it namen a tolas dyinyo do Tesalonika a naibidang dana a tawotawo ni Āpo Dyos a Āmang ta, as kan inyo, ki naibidang kamo na a nachichasa di Āpo Jeso-Kristo. Myan pakono dyinyo parābor kan kaydamnayan no kapangtokto nyo.
No Kapagyāman ni Pablo Dyirad Manganohed Saw do Tesalonika
2 Kāda maydasal kami, ki magyamyāman kami di Āpo Dyos a maynamot dyinyo a tabo. On, pirmi namen inyo a pangdakdaw. 3 Ta pirmi a manakem namen inyo a tabo do salapen ni Āpo Dyos a Āmang tad hanyit a maynamot do maganayaw a tarabāko a inpaboya nyo do kabibyay nyo a maynamot ta myan kapanganohed nyo dya. Manakem namen pa iyaw kagaget nyowaw a maytarabāko a maynamot do adaw kan iyaw dyaw a pakabyoran namnāma nyo di Jeso-Kristo a Āpo ta.*1:3 Siraw tatdo saya a dadakay, ki masisīta sa do byay no Krischano: kapanganohed, adaw, kan namnāma. 1 Kor. 13:13; Gal. 5:5-6; Kol. 1:4-5; 1 Tes. 5:8
4 Inyo a kakakteh a chadaw ni Āpo Dyos, chapatak namen a pinidi naynyo tan payparinen naynyo a tawotawo na.
5 On, chapatak namen nyaya, ta do kapangikasaba namen dyinyo so Maganayaya a Dāmag, ki chirin aba lang inosar namen, an dyi pa iyaw panakabalin no Ispirito Santo. Asa pa, aba polos kapagdwadwa namen a maynamot do kaoyod na, as kan napaneknekan nyo na a iyaw kaparin namen do kayan namenaw dyinyo, ki nagsīrbi kami a para do kaganayan nyo.
6 On, chapatak namen a pinidi naynyo ni Āpo Dyos a maynamot ta tinahatahan nyo yamen kan si Āpo Jesos. Ta aran arwayaw kalidyatan a inibtoran nyo a maynamot do kapanganohed nyo, ki alit na rinawat nyo a siraragsak chirinayan Āpo Dyos. Kan iyaw nya ragsak nyo, ki intoroh dyinyo no Ispirito Santo. 7 Dawa, maynamot do dyaya, nayparin kamo na a panahatahan dan tabo saw a manganohed do probinsya a Masedonya kan Akaya.†1:7 Mana “Gresya” a tanan Griego a tawo. 8 On, ta do probinsya aba lang a Masedonya kan Akaya iyaw nakatoneng so kapanganohed nyo do Dyos, ta naiwaras danaw dāmag a maynamot do kapanganohed nyo dyirad mabawa saya a idiidi. Dawa, masisīta aba a myan paw ibahey namen dyira a maynamot dyinyo, ta napatakan darana sīgod. 9 Sichangori, sira dana mismo nangibahey dyamen a maynamot do nakarawat nyowaw dyamen do nakasarongkar namenaw dyinyo. On, as kan siraw mismo nangipadāmag dyamen a maynamot do nakatadyichokod nyowaw so bolto kan nakapagsīrbi nyo na sichangori do oyod a Dyos a sibibyay. 10 Sira danaw mangibahey a maynamot do kanāw nyowaw a mangnanayas kangayaw no Anak ni Āpo Dyos a yapo do hanyit a iyaw pinagōngar naw a yapo do kadiman, as kan si Āpo Jesos nyaya a mangisalākan dyaten do mangay anchi a soli no Dyos.