3
No Kapachiribīldi Dan taga Moab
1 Do chaasa poho naw kan wawaho a katawen no kapagāri ni Jehosapat do Joda, si Joram*3:1 Mana “Jehoram”. a pōtot ni Ahab, ki nayparin a āri no Israel do Samarya, kan nagāri so asa poho kan dadwa katawen. 2 Pinarin naw marahet do kapanyideb ni ĀPO, ki akmaba so pinarin da āmang kan ānang na, ta pinakaro naw batwaw ni Baal a pinatnek ni āmang na. 3 Ki aran komwan, pinarin naw gatogatos ni Jeroboam a pōtot ni Nebat a nawriw napawnot siras tawotawowaw no Israel a naygatos, kan mayhat aba maygatos.
4 Si Mesa a āri do Moab, ki magtartaraken so karniro. Tinawen a magbāyad so bwis na do āryaw no Israel so asa gasot a rībo a orbon a karniro kan boboh dan asa gasot a rībo a malloko a karniro. 5 Ki do nakadiman ni Āri Ahab, nagribīldi iyaw āryaw do Moab a maikontra do āryaw no Israel. 6 Dawa, do dāwri, minohtot si Āri Joram a yapo do Samarya, a mangay a mangpeh so tabo bōyot no Israel. 7 Nangipayangay pa so minsāhi na di Jehosapat a āri no Joda a kāna “Nagribīldiw āryaw no Moab so maikontra dyaken. Machangay kawri dyaken a machilāban so maikontra do Moab?”
Initbay na a kāna, “Machangay ako dyimo. Yaken, ki akma dyimo. Siraw tawotawo ko, ki pinakatawo mo na. Siraw kabalyo ko, ki pinakakabalyo mo na.” 8 Inyahes pa ni Jehosapat a kāna, “Na, āngo ayaman a angayan ta mangdarop?”
“Do let-ang no Edom,” initbay ni Joram.
9 Dawa, minohtot saw āryaw no Israel, āryaw no Joda, kan āryaw no Edom.†3:9 Do dyaya chimpo, mangitoray āryaw no Joda tana a Edom. 1 Ār. 22:47 As do nakatayokaw no papito a karaw a nakapagmarcha da do ayamanaw a nagrikos a mangay do Moab, apabaw ranom da no bōyot da saw kan binyay da saw a myan dyira.
10 Binata no āryaw no Israel a kāna, “Ay anyan! Si ĀPO, iyaw nanawag dyaten a tatdo a āri a iparawat na do āryaw no Moab.”
11 Ki inyahes ni Jehosapat a kāna, “Abawriw propīta ni ĀPO dya tan mangdaw ta di ĀPO so bagbaga na?”
Initbay no asaw dyirad opisyal naw no āri no Israel a kāna, “Si Eliseo a pōtot ni Sapat, ki myanaw dya a iyaw kasidongaw ni Elyas do nakarahan.”‡3:11 Do Hebreo a chirin, ki “a napado so ranom do kakamay sa ni Elyas.” Nya kaparin, ki asa gagāngay a kaparin no kasidong.
12 Binata ni Jehosapat a kāna, “Myan dyaw chirin ni ĀPO.” Dawa, iyaw āri no Israel kan si Jehosapat kan āryaw no Edom, ki minosok sa nangay dya.
13 Binata ni Eliseo do āryaw no Israel a kāna, “Na, āngo kono bibyang ko dyimo? Mangay ka do propītaw saw ni āmang kan propīta saw ni ānang mo.”
Initbay no āryaw no Israel a kāna, “Engga, ta si ĀPO, iyaw nanawag dyamen a tatdo a āri a iparawat na do āryaw no Moab.”
14 Binata dana ni Eliseo do arīyaw no Israel a kāna, “Akmas kasigorādo no kasibibyay ni ĀPO a Manakabalin do Tābo a pagsirsīrbyan ko, an dyi ko a anyiben iyaw kayan ni Jehosapat a āri no Joda, layen koynyo mana ikaskāso ko abaymo. 15 Ki sichangori, mangyangay kamo dyaken so tomotokar so arpa.”
Do kayanaw a magtokar no tomotokaraw so arpa, naypabīleg iyaw panakabalinaw ni ĀPO di Eliseo,§3:15 Do Hebreo a chirin, ki “napalapaw iyaw kakamay ni ĀPO di Eliseo”. 16 kan binata na a kāna, “Nyayaw bata ni ĀPO: Apnohen konchiw nya mabkoh a payahosongan so āro a līnaw.*3:16 Mana, “Mamarin kamo so āro a kanal do payahosongan.” 17 Ta nyayaw bata pa ni ĀPO: Maboya nyo abanchiw salawsaw mana chimoy. Ki aran komwan, iyanchiw nyaya payahosongan mapno anchi so ranom tan minom kamo kan siraw bāka nyo kan kadwan saw a binyay nyo. 18 Maydamnay nyaya do kapanyideb ni ĀPO, as iparawat na sanchiw Moabita do tanoro nyo. 19 Abāken nyonchiw kāda naahadan a syodad kan kāda rarakoh saw a idi na. Tonghen nyonchiw kāda magaganay a kayokayo na, kan apnetan nyonchiw tabo a pakayapwan no ranom na, as kan rārayawen nyonchiw kāda magaganay a hakawan na so āro a bato.”
20 Do somaronwaw a mabekas, do makalo danaw a ōras no kapangidātonaw, myan ranom a moyog a yapo do mangket do Edom a mandan nalayos no tanaw.
21 Nakadāmag daw no Moabita a nangay saw tatdwaya a āri a machilāban so kontra dyira. Dawa, kāda mahahakay a aran magtotobo mana lomakay a makabael a magarmas, ki natawag sa kan nagpwisto sa do lettengaw. 22 Do nakapaychabangobangon daw no bōyot no Moab do kapaysesēdang, chinyelan no araw hapot naw no ranomaw. As siraw Moabitaw do paysopwanaw, naboya daw ranomaw a nanyibaya akmay raya. 23 Binata da a kon da, “Rayayaw nawri! Siraw nawri a ar-āri, naglalāban sa ngata kan naysindidiman sa do katakatayisa. Sichangori, yaten a Moab, may ta magsamsam!”
24 Ki do nakangay daw no Moabita do kampo daw no Israel, naychahohtot saw Israelitaw kan dinarop da sa a mandad nakapaychapayapayyayo da. Linakatan da san Israelitaw siraw Moabitaw kan diniman da sa. 25 Rinārayaw da saw īdiīdi saw, kan kāda mahakay napagsid so bato do kāda magaganay a hakawan mandad nakawpo na. Inapnetan da saw tabo pakayapwan ranom, kan tinongeh da tabo magaganay a kayokayo. Iya danaw ahadaw a bato no Kir-hareset†3:25 Kir-hareset (mana Kir-heres), ki sintro no Moab. natokos a dya narārayaw. Ki dinibon dan mahahakayaw a taga-palsiit‡3:25 Ok. 20:16; 1 Sam. 25:29 kan dinaraop da sa pa.
26 Do nakaboyaw sya no āryaw no Moab a taywara danaw lāban a dyi narana marawaw mangābak, nanghap so rārayay na a papito a gasot a taga-ispāda a romaranget pinadas da a daropen iyaw āri no Edom tan mayhawos sa a maglības, ki awānen. 27 Sinpangan na, inhap naw matonengaw a pōtot na a machitādinchi dya a āri, kan indāton na iya a sosohan a sakripīsyo§3:27 Nasosohan a sakripīsyo, ki para do Chemos a dyos dan Moabita. do ahadaw no syodadaw. Do dāwri, myan rakoh a kasoli dyirad Israelita.*3:27 Malawag abaw chakey na batahen do chirin a Hebreo do dyaya birsikolo. Batahen dan kadwan a maparin a “insoli dan Israelitaw mismo a inawan da” mana “nakasoli saw taga Joda kan Edom dyirad Israelitaw” a naynamotan na naparin no sakripīsyowaw. Dawa, nagsonod sa kan naychabidibidi sa do bōkod da a tana.
*3:1 3:1 Mana “Jehoram”.
†3:9 3:9 Do dyaya chimpo, mangitoray āryaw no Joda tana a Edom. 1 Ār. 22:47
‡3:11 3:11 Do Hebreo a chirin, ki “a napado so ranom do kakamay sa ni Elyas.” Nya kaparin, ki asa gagāngay a kaparin no kasidong.
§3:15 3:15 Do Hebreo a chirin, ki “napalapaw iyaw kakamay ni ĀPO di Eliseo”.
*3:16 3:16 Mana, “Mamarin kamo so āro a kanal do payahosongan.”
†3:25 3:25 Kir-hareset (mana Kir-heres), ki sintro no Moab.
‡3:25 3:25 Ok. 20:16; 1 Sam. 25:29
§3:27 3:27 Nasosohan a sakripīsyo, ki para do Chemos a dyos dan Moabita.
*3:27 3:27 Malawag abaw chakey na batahen do chirin a Hebreo do dyaya birsikolo. Batahen dan kadwan a maparin a “insoli dan Israelitaw mismo a inawan da” mana “nakasoli saw taga Joda kan Edom dyirad Israelitaw” a naynamotan na naparin no sakripīsyowaw.