1 Initbay ni Eliseo do āryaw no Israel a kāna, “Adngeyen mo paw chirin naya ni ĀPO. Nyayaw bata ni ĀPO: Do komwan a ōras anchan delak, iyaw dadima a kakīlo no kagaganayan a trīgo mana asa poho a kakīlo no sebāda, ki malāko sanchi so asa kapidāso a pirak do rowanganaw no Samarya.”

2 Iyaw opisyalaw a pachinarngan no āryaw, ki binata na do tawowaw no Dyos a kāna, “Aran iniwangan ni ĀPO bintan saya do kahanyihanyitan, maparinoriw komwan? Pī!”

Initbay ni Eliseo a kāna, “Maboya monchi do bōkod mo saya a mata, ki kanen mo abanchi polos!”

3 Do dāwri, myan apat a mahahakay a nagliproso a myan do asdepanaw do rowanganaw no syodad. Binata da do katakatayisa dyira a kon da, “Āngo ta nāw ta dya mandan madiman ta? 4 An batahen ta a somdep ta do syodadaya, myanayaw kapaychapteng daw, kan madiman tanchi. An nāw ta dya, alit na madiman tanchi. Dawa, may ta na do kampo daw no Arameo kan iparawat ta dyira iyaw byay ta. An chāsi danchi yaten, mabyay ta panchi. Ki an dimanen danchi yaten, na āngo pa! Madiman ta nanchi ah.”

5 Do kapaysarisaryaw, naychakatkat sa, kan nangay sa do kampo daw no Arameo saw. Do nakapakarapit daw do payis naw no kampwaw, abaw aran asa tawo daw. 6 Ta si ĀPO, ki pinadngeyan na saw Arameowaw so kalebkeb no loglogan a pachigobat, kabalyo sa kan rakoh a bōyot. Do dāwri, binata da do katakatayisa dyira a kon da, “Chiban nyo, iyayaw āri naya no Israel, ki tinangdanan na saw ar-āri dan Heteo kan Egipto tan daropen da yaten bōyot da saw!” 7 Dawa, naychakatkat saw Arameowaw kan naychapayyapayyayo sa do kapaysarisaryaw, as kinarwan da saw tolda da saw, kabkabalyo kan asno da saw. Nainonolay daw kampo daw do nakapaychapayapayyayo da tan isalākan daw byay da.

8 Do nakapakarapit daw no apataw a mahahakay a nagliproso do payisaw no kampwaw, somindep sa do asaw dyirad tolda daw no Arameo. Komninan sa kan mininom sa, kan nanghap sa so pirak, balitok, kan laylay sa, as nangay da sa intayo. Naybidi saw mahahakayaw kan somindep dana sa do asaw a tolda. Nanghap dana sa siras warawara saw a myan daw, kan intayo da pa.

9 Sinpangan na, binata da do katakatayisa dyira a kon da, “Kosto abayaw pariparinen taya. Iyaw nyaya araw, ki araw a kayan no maganay a dāmag, kan inbahey tabaya. An mangnanaya ta pa mandan maysesēdang, adasen nanchi yaten kadōsa. Ngay, may ta na ipadāmag nyaya dyirad myanaw do palasyo no āri.”

10 Dawa, nangay sa kan tinawagan da saw mangiwaywangaw so rowangan no syodad, kan inbahey da dyira a kon da, “Nangay kamyaw do kampo daw no Arameo, kan abaw aran asa tawo daw. Abaw arimekmek no aran asa a tawo daw. Siraw lang naigalot saw a kabalyo kan asno myan daw, kan siraw toldaw a nakarwan a iyas kayiyan.” 11 Inngēngey daw nyaya dāmag no mangiwaywang saw so rowangan, kan naipadāmag daw nya dyira myanaw do irahemaw no palasyo.

12 Naybangon si āri do kamahep, kan binata na dyirad opisyalis naw a kāna, “Ibahey ko dyinyo an āngo pinarin daya no Arameo saya dyaten. Chapatak da a maychapteng ta na. Dawa, kinarwan daw kampwaw, kan tomnayo sa do bengkag saw a mangiktokto sya a kon da ‘Anchan mohtot sa do syodadaw, tiliwen ta sanchi a sibibyay kan somdep ta nanchi do syodadaw.’ ”

13 Initbay no asaw dyirad opisyals naw a kāna, “Palobōsan mo saw kadwanaya mahahakay a manghap so dadima a kabalyo a nabidin pa do syodadaya. No kayayan da, ki akmas tabo Israelita a nabidin dya. On, akma sa siras nya tabo a Israelita a īto dana dyiraw kadiman da. Dawa, toboyen ta sa, ta yangay da chiban an āngo naparin.”

14 Dawa, myan saw napidi a mahahakay a somnakay do dadwa a logan a pachigobat a ginoyod dan kabalyo, kan tinoboy sa no āryaw a mangononot so takatakad dan bōyotaw no Arameo. Binilin na saw nagsakayaw a kāna, “Yangay nyo a chiban an āngo naparin.” 15 Inonotan da saw Arameowaw manda do Oksong a Jordan. No intīrwaw a rarahan a nangononotan da sira, ki akmay basōra a naychawpitan laylay kan warawara da no Arameo saw a inpoha da do nakapagal-alisto da a naglibas. Maynamot ta komwan, naybidi saw natoboyaw, kan inpadāmag da do āryaw. 16 Sinpangan na, minohtot saw tawotawowaw no Samarya, kan sinamsam daw kampo daw no Arameo saw. Dawa, iyaw dadimaw a kakīlo no kagaganayan a trīgo kan asa poho a kakīlo no sebāda, ki nalāko a akmas inbaheyaw ni ĀPO.

17 Ki dinotokan āryaw opisyalaw a pachinarngan na a iyaw makatoneng do rowanganaw no syodad. Ki do nakapaysinpapasoysoy daw no tawotawo a minohtot do rowanganaw, nalbaw no opisyalaw a nalasalasagan dan tawotawo saw, kan nadiman a akmas binataw ni Eliseo a tawo no Dyos do nakawsokaw no āryaw do bahay na. 18 Naparin akmas binata naw no tawowaw no Dyos do āryaw a kāna, “Do komwan a ōras anchan delak, iyaw dadima a kakīlo no kagaganayan a trīgo mana asa poho a kakīlo no sebāda, ki malāko sanchi so asa kapidāso a pirak do rowanganaw no Samarya.”

19 Do dāwri pa, inyatbay no opisyalaw do tawowaw no Dyos a kāna, “Aran inwangan ni ĀPO bintan saya do kahanyihanyitan, maparinoriw komwan? Pī!” Ki initbay no tawowaw no Dyos a kāna, “Maboya monchi do bōkod mo saya a mata, ki makan mo pabanchi a polos!” 20 As nawriw iksakto a naparin dya, ta linasalasagan dan tawotawo do rowanganaw, kan nadiman.