1 Do chaasa poho naw kan papito a katawen no kapagāri ni Peka a pōtot ni Remalyas, si Ahas a pōtot ni Jotam, ki nayparin a āri no Joda. 2 Nagtawen si Ahas so dadwa poho do nakapagāri na, kan nagāri do Jerosalem so asa poho kan anem a katawen. Pinarin nabaw kosto do kapanyideb ni ĀPO a Dyos na a akmas pinarinaw ni Āri Dabid a kapoonan na. 3 Inonotan na paw dadakay dan ar-āri saw no Israel. Indāton na paw pōtot naw a mahakay a masosohan*16:3 Deot. 12:31, 18:10 sigon do makabābaba a dadakay dan nasnasyon a pinaksyat ni ĀPO do salapen da no tawotawo no Israel. 4 Nangidāton so dāton kan naysosoh so insinso do logar saw a pagdaydayāwan, do tōtok dan paytoytokonan, kan do kāda sīrok no mayayabong a kayo.

5 Sinpangan na, si Resin a āri no Aram kan Peka a pōtot ni Remalyas a āri no Israel, ki nagmarcha sa a somnonget kan nangraot so Jerosalem. Linakob daw Jerosalem a sintro ni Ahas, ki naparin daba inābak si Ahas. 6 (Do dāwri a chimpo, do nakapaksyat ni Resin a āri no Aram siras taga Joda, ki pinaybidi naw idi a Elat†16:6 2 Ār. 14:22 do toray no Aram. Siraw Edomita, ki naydis sa do Elat, kan minyan sa daw manda sichangori.)

7 Nanoboy si Ahas siras mangay a mangibahey di Tiglat-pileser a āri no Assirya a kon da, “Yaken a naibidang dana a pachirawatan kan anak mo.‡16:7 No chakey na batahen “anak mo,” ki ibidang na iyaw āri a akmas āmang na. Somonget ka pa, kan isalākan mo yaken a makakaro do kakamay da no āri no Aram kan āri no Israel, ta raoten da yaken.” 8 Inhap ni Ahas siraw pirakaw kan balitok a myan do timplowaw ni ĀPO kan do pangapyan saw do palasyo no āri, as kan inpaiyangay na a rīgalo do āryaw no Assirya. 9 Inyatbay no āryaw no Assirya iyaw nakaraot kan nakasākop na so Damasko.§16:9 Damasko, ki sintro no Aram mana Sirya. Inkaro na saw omyanaw daw a sibabahod a inikwan do Kir, kan diniman na si Resin.

10 Sinpangan na, nangay si Āri Ahas do Damasko a machibayat di Tiglat-pileser a āri no Assirya. Do kayan naw daw, naboya naw altaraw a myan do Damasko, kan inpaiyangay na di Oryas a pādi iyaw ladāwanaw no altaraw kan no pagtolādanaw a myan iksakto a plāno na a aran do kadedēkeyan a para do nakaparin na. 11 Dawa, pinatnek ni Oryas a pādi iyaw altaraw a mawnotan iksaktwaw a plāno a inpaiyangay ni Āri Ahas a yapo do Damasko. Napatayoka na sakbay do kapaybidyaw ni Āri Ahas. 12 Do nakasabataw no āryaw a yapo do Damasko kan naboya naw altaraw, inasngenan na kan nangidāton. 13 Indāton naw masosohanaw a dāton na kan dātonaw a irek. Pinadwan naw altaraw so palek a inomen a dāton na, kan pinawarsyan na so raya a dāton no kapachikapya. 14 As iyaw tombagaw a altar*16:14 No naibahey do 1 Āri 8:64, iyaw tombāgaw a altar, ki taywaras kadēkey. a myan do salapen ni ĀPO, ki pinakaro ni Ahas a yapo do salapenaw no timplo (a myan do payawanaw no bayowaw a altar kan iyaw timplowaw ni ĀPO), as kan pinangay na do mangket do ammyānan no bayowaw a altar.

15 Inmandar ni Āri Ahas di Oryas a pādi a kāna, “Do bayowaya a altar, idāton mo saw nya: iyaw mabekas a masosohan a dāton, iyaw irek a dāton an mahep, as kan iyaw masosohan a dāton kan irekaw a dāton ko a āri. Idātonan mo paw masosohanaw a dāton, irek a dāton, kan inomen a dāton no tabo tawotawo do dya a tana. Pawarsyan mo pa so tabo rayaw no masosohan saw a dāton kan tabo raya no sakripīsyo saw. As no tombāgaw a altar, ki bōkod ko a osaren.” 16 Pinarin ni Oryas a pādi akmas inmandar naw ni Āri Ahas.

17 Inpararak ni Āri Ahas karison saw, as inpapakaro na saw dyindyinaw no kāda kāha, as kan inpapakaro na saw baldyaw.†16:17 1 Ār. 7:27-31 Pinabodis naw tangkyaw a matawagan so “Tāw” do bokot dan sinan tōrowaw a bāka a tombāga a myan do ohbo no tangki,‡16:17 1 Ār. 7:23-25 kan pinalapaw na do pamadisnanaw a bato. 18 Inpapakaro naw pangsirongaw a osaren da do Araw no Kapaynaynahah a napatnek do irahem no timplo ni ĀPO, kan inpapakaro na paw asdepanaw no āri do gaganaw no timplowaw tan pamagosto do āryaw no Assirya.

19 Siraw kadwanaw a napariparin do nakapagāri ni Ahas kan an āngo saw pinarin naw, ki naitolas sabawri do librowaw no pakasaritāan dan ar-āri no Joda. 20 Nachipaynahah si Ahas dyirad aāmang naw, kan naitābon dyira do syodad ni Dabid. As si Hesekyas a pōtot na, ki nachitādi dya a āri.