1 Do chasyamaw a katawen no kapagāri ni Sedekyas, do chaasa poho naw a karaw do chaasa poho naw a kabohan, nagmarcha si Nebokadnessar a āri do Babilonya so maikontra do Jerosalem kontodo tabo bōyot na. Nagkampo do gaganaw no syodadaw, kan napaytokon so tana do gaganaw do omdibonaw no ahad no syodad tan makakayat sa.*25:1 Jer. 21:1-10; 34:1-5; Esk. 24:2 2 No syodadaya, ki nalakob a nanda do chaasa poho naw kan asa a katawen no kapagāri ni Sedekyas.

3 Do chasasyam naw a karaw do chapat naw a kabohan, naypataywaraw kapteng do irahem naw no syodad. Apaba polos chabyay dan tawotawowaw a kanen da. 4 Sinpangan na, narakrak a nayhawos asaw a partis no mamantadaw a ahad. Do dāwri a mahep, naychapayyapayyo sa Sedekyas kontodo tabo bōyot do rowanganaw do payawanaw no dadwaw a ahad a masngen do hardinaw no āryaw aran komwan a nakadibon taga Babilonya do syodadaw. Nayyayo sa lomnongo do mamangketaw do Araba.†25:4 Araba, ki Payahosongan no Oksong a Jordan. 5 Ki linakatan dan bōyot daw no taga Babilonya iyaw āryaw no Joda, kan nadas da do katanapan saw no Jeriko. Do dāwri, nabogay sa tabo bōyot naw kan pinayaywan da iya. 6 Sinpangan na, natiliw daw āryaw no Joda, kan inyangay da do āryaw no Babilonya do Ribla, as dawriw nangikeddengan da sya naokom. 7 Diniman da saw pōtot ni Sedekyas do salapen na, kan pinīlit da a chichiban na. Sinpangan na, hinawhaw daw mata na saw, as nakakawar da sya a inyangay do Babilonya.

8 Do chapapito naw a karaw do chadadima naw a kabohan do chaasa poho naw kan sasyam a katawen ni Nebokadnessar a āri no Babilonya, ki nangay do Jerosalem si Nebosaradan a kapitan dan gwardyaw no āryaw a opisyal ni āri do Babilonya. 9 Sinosohan naw timplowaw ni ĀPO, iyaw palasyowaw no āryaw, kan tabo bahabahay saw do Jerosalem. Kāda masisīta a bahay, ki sinosohan na.‡25:9 1 Ār. 9:8 10 Tabo dan bōyot saw a taga Babilonya a myan do toray no kapitan daw no gwardya, ki rinakrak daw ahad saw a nangdibon so Jerosalem. 11 Sinpangan na, inakaw sa a inkaro ni Nebosaradan a sibabahod natokos saw a tawotawo do syodadaw magrāman kadwan saw a tawotawo do omdibonaw, kan siraw nangayaw a nachirapa do āryaw no Babilonya. 12 Ki binidin no kapitan daw no gwardyaw kadwan saw a kapopobryan do dawri a tana tan tarabakōhen da saw kaobasanaw kan bengkag saw.

13 Rinakrak da no taga Babilonyaw parey saw a tombāga, siraw karison, kan iyaw tombāgaw a tangki a myan do timplowaw ni ĀPO, as kan inkaro da saw narakrakaw a tombāga a inyangay do Babilonya.§25:13 1 Ār. 7:15-37; 2 Kron. 3:15-17; 4:2-5 14 As inkaro da sa paw kaldiro, pala, panopit saw so pabīlo, longlongan saw a para insinso, kan tabo warawaraw a tombāga a maosar do timplo a pagdaydāyaw.*25:14 1 Ār. 7:45-50; 2 Kron. 4:16 15 Inhap no kapitan daw no gwarya a inkaro pangayanaw so inmaya, siraw sabak saw, kan tabo kadwan pa saw a naparin do pōro a balitok mana pirak.

16 Iyaw tombāgaw a yapo do dadwaw a parey, iyaw tangkyaw, kan siraw karisonaw a inpaparin ni Solomon a para do timplowaw ni ĀPO, ki makīlo aba do karahmet na. 17 Kāda parey, ki dadwa poho kan papito a kadapan so kakarang. Iyaw tombāgaw a pang-oho na a myan do totokaw no parey, ki apat kan godwa a kadapan so katohos. Naartyan so kahwas a nalāga kan granada sa a tombāga a naypadibon. As iyaw asaw a parey, ki machalit pa.†25:17 1 Ār. 7: 15-18

18 Tiniliw pa no kapitan daw no gwardya a binahod si Serayas a matohos a pādi, si Sepanyas a pādi a kasidong na, kan siraw tatdwaw a manggwardya so asdepan do timplowaw. 19 Yapo do irahemaw no syodad, tiniliw naw asaw a opisyal a makatoneng siras soldādo saw kan dadima saw a mamagbaga no āri. Tiniliw na pa iyaw sikritaryowaw no komanderaw a mangpīlit siras tawotawowaw do dawri a tana tan magsoldādo, kan anem pa a poho a tawotawo do dawri a tana a nachichwasan da do syodadaw. 20 Inhap sa ni Nebosaradan a komander, kan inyangay na sa do āryaw no Babilonya do Ribla. 21 Do Ribla, do tana no Hamat, inpadiman sa no āryaw.

Dawa, naakaw saw tawotawowaw no Joda a nakaikaro do tana da.

22 Tinongdo ni Nebokadnessar a āri no Babilonya si Gedalyas a pōtot ni Ahikam a pōtot ni Sapan‡25:22 2 Ār. 22:3, 12 a mayparin a gobirnador dyirad tawotawowaw a tinokos na do Joda. 23 Do nakadāmag daw sya no opisyalisaw kan soldādo da saw a taga Joda§25:23 Sira, ki naychapayyayo do Jerosalem a nachirayay sa di Āri Sedekyas. Tomnayo sa do nakatiliw si Sedekyas. 2 Ār. 25:4-5 a tinongdo no āryaw no Babilonya a gobirnador si Gedalyas, ki nangay sa di Gedalyas do Mispa. On, nangay sa Ismael a pōtot ni Netanyas, si Johanan a pōtot ni Karea, si Serayas a pōtot ni Tanhomet a taga Netopa, si Jaasanyas a taga Maaka, kan siraw soldādo da. 24 Nagsapata dyira si Gedalyas a kāna, “Mamo kamo aba dyirad opisyalis naw no Babilonya. Omyan kamo na do dyaya tana, kan magsīrbi kamo do āri naya no Babilonya tan maganay anchiw kayayan nyo.”

25 Ki do chapapito naw a kabohan, si Ismael*25:25 Jer. 40-41 a pōtot ni Netanyas a pōtot ni Elisama a kaliposan no pamilyaw no āri, ki nangay kan kinayrayay na saw asaw a poho a mahahakay, as kan diniman da si Gedalyas kontodo siraw taga Jodaw kan siraw taga Babilonyaw a myan dya do Mispa. 26 Maynamot do dyaya, tabo tawotawo a masisīta kan sinsinan, magrāman dyirad opisyalis daw no soldādo, ki nayyayo sa a kominwan do Egipto do kāmo da dyirad taga Babilonyaw.

27 Do chatatdo naw a poho kan papito a katawen do nakaakawaw ni Jehoyachin a āri no Joda a naiyangay do Babilonya, ki nayparin si Ebil-merodak a āri no Babilonya. Winayawayaan na si Jehoyachin do pamahodan do chadadwa naw a poho kan papito a karaw do chaasa poho naw kan dadwa a kabohan. 28 Naychirin dya so maganay, kan tinorohan na iya so disnan na a pangipaboya so dāyaw a matwatohos kan siraw kadwanaw a ar-āri a gan-ganaet a myan dya do Babilonya. 29 Do dāwri, sinokatan ni Jehoyachin laylay naw do bahodan, kan do ōnos no panapanawdyan no kabyay na, ki nachakan do lamisaan naw no āryaw. 30 Kararaw a tinorohan no āryaw si Jehoyachin so gagāngay a kwarta kan kanen na mandan pandan byay na.