1 Nahay iyaw no gobat do payawan no mangitetēnek saw di Saulo kan mangitetēnek saw di Dabid. Ranan no nakapaypaypatoray ni Dabid, ki naypaypakapsot saw mangitetēnekaw di Saulo.

2 Siraw pōtot a mahahakay ni Dabid, ki naiyanak sa do Hebron. Iyaw matonengaw, ki si Amnon a inyanak ni Ahinoam a taga Jesreel. 3 Iyaw somnarono, ki si Kileab a inyanak ni Abigail a bālo ni Nabal no Karmel. No chatatdo na, ki si Absalom a inyanak ni Maakah a anak a mabakes ni Talmai a āri no Gesor. 4 No chapat na, ki si Adoniha a inyanak ni Haggit. No chadadima na, ki si Sepatayah a inyanak ni Abital. 5 No chanem na, ki si Itaream a inyanak ni Eglah a baket ni Dabid. Siraw nya tabo, ki naiyanak sa do Hebron.

6 Do kadama naw no gobat do payawan no mangitetēnek saw di Saulo kan mangitetēnek saw di Dabid, pinaypayit met ni Abner bōkod na a toray dyirad minononot saw di Saulo. 7 Myan iyaw minabakes ni Saulo a mayngaran so Rispah a pōtot a mabakes ni Aya. As binata ni Is-boset di Abner a kāna, “Āngo ta inoknod mo minabakes nayan āmang?”

8 Oltimo nakapakasoli ni Abner do inbaheyaw ni Is-boset, kan tinbay na a kāna, “Aysa, manglilipot akori a magsīrbi dyirad taga Joda?*3:8 Do Hebreo a chirin, ki “Yakenoriw oho no chito (a machilagonot dyirad tawotawo) no Joda?” Aran manda sicharaw, mapodno ako do pamilya ni Saulo a āmang mo, dyirad kaliposan na saw, kan dyirad sīt na saw. Chaskeh ko pa a iparawat imo di Dabid. Ki changori, pagatosen mo yaken a maynamot do dyaya a mabakes! 9 Dyos pakono mangbahes dyaken so taywara an dyi kwa sidongan si Dabid a mamarin so insapataw ni ĀPO dya 10 a iyaw kapaydis na so pagāryan ni Saulo, kan kapatnek na so trono ni Dabid do Israel kan Joda a makayapo do Dan a mandad Beerseba.” 11 Tominbay paba si Is-boset di Abner, ta myan kāmo na dya.

12 Nanoboy si Abner siras mangibahey di Dabid do Hebron a kāna, “Sino akin dyira so nya a tana? Machitōlag ka pa dyaken, as sidongan koymo a mangiyangay siras tabo tawotawo no Israel a mangitēnek dyimo.”

13 Tinbay ni Dabid a kāna, “Na, maganay ah. Machitōlag ako dyimo, ki myan asa akdawen ko dyimo. Mapaboya kaba dyaken malaksid an iyonot mo si Mikal a pōtot a mabakes ni Saulo an maybidi ka.” 14 Do dāwri, nanoboy si Dabid siras nangibahey di Is-boset a pōtot ni Saulo so nya, “Pabidihen mo dyaken baket kwaw a si Mikal a nabayādan ko na do asa gasot a pisot dan diniman ko a Pilisteo.”†3:14 1 Sam 18:20-27

15 Dawa, nanoboy si Is-boset so mangikaro sya do lakay naw a si Paltiel a pōtot ni Lais. 16 Inonotan no lakay naw a tomanyitanyis a nanda do Bahorim. Do dāwri, binata ni Abner dya a kāna, “Somabat ka na!” Dawa, somnabat.

17 Do dāwri pa, nachisarīta si Abner dyirad panglakayenaw no Israel a kāna, “Midyo nahay dana a chinakey nyo a payparinen si Dabid a āri. 18 Changori danaw ōras na! Ta inkari ni ĀPO di Dabid a kāna, ‘Maynamot do kabīleg ni Dabid a pachirawatan ko, ki mangisalākan akonchi siras tawotawo no Israel yapo do toray dan Pilisteo saw kan dyirad tabo saw a kabōsor da.’ ”

19 Nangay pa si Abner a nachisarīta dyirad Benhaminita saw. Sinpangan na, nangay do Hebron a mangibahey di Dabid so chakey daw a parinen no tabo a tawotawo no Israel kan Benhamin. 20 Do nakangay danaw ni Abner di Dabid do Hebron kontodo dadwa poho saw a mahahakay a rārayay na, insaganāan ni Dabid so pista para dyira. 21 Do dāwri, binata ni Abner di Dabid a kāna, “Palobōsan mo pa yaken ta bēbelan ko komaro tan akpehen ko tabo no tawotawo no Israel para dyimo mo āpo a āri ko. Tan komwan, maparin sa a machitōlag dyimo, kan maparin a magāri ka do tabo a chakey mo.” Dawa, pinayam ni Dabid si Abner, kan komnaro a sitatalna.

22 Sinpangan na, nawara si Joab kan bonggoy na saw a mahahakay ni Dabid a yapo do nangraotan daw, kan nanabat sa so āro a nasamsam da. Ki apaba si Abner do yanan Dabid do Hebron, ta pinayam ni Dabid, kan komnaro dana a sitatalna. 23 Do nakawara daw da Joab, naibahey dya a nangay si Abner a pōtot ni Ner do āryaw, kan pinayam no āri, as komnaro a sitatalna.

24 Dawa, nangay si Joab do āryaw, kan binata na a kāna, “Āngo pinarin mwaya? Chiban mo, nangay sawen si Abner dyimo. Āngo ta tōd mo a pinayam tan komnaro a sitatalna? 25 Chapatak mo si Abner a pōtot ni Ner, ki nangay a nangallīlaw dyimo, kan sintiren naymo an dino kokwanan mo kan tabo pariparinen mo.”

26 Kinarwan ni Joab si Dabid kan nanoboy siras nangay di Abner. Pinaybidi da a yapo do bobonaw do Sirah. Ki chinapatak naba ni Dabid iyaw nyaya. 27 Do nakawara naw ni Abner do Hebron, inhap ni Joab do payis naw no rowangan a akmaw myan ibahey na dya a sililimed. Ki dawriw namahsan na sya do nakadimanaw no kakteh naw a si Asahel. Binagkong ni Joab bodek naw ni Abner, kan nadiman.

28 Do nakadāmag ni Dabid so maynamot do dyaya, binata na a kāna, “Yaken kan iyaw no pagāryan ko, ki nāw na abos gatos do salapen ni ĀPO a maynamot do nakadimanaya ni Abner a pōtot ni Ner. 29 Maitopak pakono dōsa di Joab kan do tabo pamilya na! Do kāda somarono a kapotōtan na, ki myan pakono maykolad mana magliproso mana maypipiday a maysarokod mana madiman do ispāda mana maptengan!” 30 Binata ni Dabid nyaya, ta diniman dan maykaktehaw a sa Joab kan Abisay si Abner a nangdiman so kakteh daw a si Asahel do gobataw do Gibeon.

31 Sinpangan na, binata ni Dabid di Joab kan do tabo tawotawo saw a myan dya a kāna, “Paychapiripiriten nyo laylay nyo! Maylaylay kamo so makersang, as kan magdongdong-aw do kawnot nyo so bangkayaw ni Abner.” Aran si Āri Dabid, ki minonot do dichodan no bangkayaw do kaiyangay daw sya a itābon. 32 Intābon da si Abner do Hebron, kan tomnanyis so malyak āryaw do tanemaw ni Abner. Tabo sa no tawotawo saw, ki nachitanyitanyis sa pa.

33 Kinanta no āryaw nyaya dongdong-aw para di Abner a kāna,

Tomnanyis sa tabo no tawotawowaw a minirwa a maynamot dya.

35 Sinpangan na, tabo saw tawotawo, ki nangay sa a mangahwahok di Dabid a koman so tināpay ranan na a māraw pa. Ki insapata ni Dabid a kāna, “Dosāen pakono yaken no Dyos so taywara an tahaman ko tināpay mana aran āngo sakbay a somdep araw!”

36 Siraw tabo tawotawo, ki nadlaw daw nya kan naay-āyo sa. On, tabo no pinarin no āryaw, ki chinahwahok da. 37 Dawa, do dāwri a araw, sira tabo tawotawo no Joda kan tabo tawotawo no Israel, ki natonngan da a abo polos nakairāman no āryaw do nakadiman ni Abner a pōtot ni Ner.

38 Sinpangan na, inbahey no āryaw dyirad bonggoy na saw a mahahakay a kāna, “Chapatak nyo abawri a iyaw mabigbigbig a tawo kan mabīleg a komander, ki nadiman sicharaw do Israel? 39 As kan sichangori, aran napidi ako a āri, madidiw ko a makapsot ako. Siraw nya dadwa a anak a mahahakay ni Seroyas a sa Joab kan Abisay, ki sobra sa so karanggas para dyaken. Si ĀPO pakono mamahes do mamarinaw so marahet sigon do karahet a pinarin na!”