1 Do nakasdep dana no āryaw do palasyo naw, as kan intoroh dana ni ĀPO iyaw inahah na dyirad nakadibon saw a kabōsor na, 2 binata no āryaw di Natan a propīta a kāna, “Cha kwaya dya a omyan do mapintas a palasyo a naparin do sidro a kayo, ki iyaw no lakāsanaw no Dyos, ki ari payad tolda.”

3 Tinbay ni Natan iyaw āryaw a kāna, “Na, mangay ka ah, kan parinen mo aran āngo a maktokto mo, ta myan si ĀPO dyimo.”

4 Ki do dāwri met lang a ahep, ki inpakatoneng ni ĀPO chirin naw di Natan a kāna, 5 “Mangay ka kan ibahey mo di Dabid a pachirawatan ko a kon mo, ‘Nyaw bata ni ĀPO: Imo abanchiw mangpatnek so bahay a pagyanan konchi. 6 Minyan akwaba do bahay a nakayapo do nakaihtot kwaw siras Israelita saw do Egipto mandas changori a araw. Nāw kwaya mayadiyadis so yanan do toldaw a pagyanan ko. 7 Aran dino nayadisan ko kontodo tabo saw Israelita, aryoriw inbahey ko do aran sino dyirad pangōlwen saw a binilin ko a mangipaspastor siras tawotawo ko a Israel a kon ko, “Āngo ta dyi nyo yaken a pamatnek so bahay a naparin do sidro?” ’ ”

8 Tinongtong ni ĀPO naychirin di Natan a kāna, “Changori, yangay mwa ibahey do pachirawatan kwaw a si Dabid a kon mo, ‘Nyaw batahen ni ĀPO a Manakabalin: Inkaro koymo yapo do pagpaspastwan kan yapo do kawnonot mo siras karniro saw, kan pinayparin koymo a pangōlo dan tawotawo ko a Israel. 9 Myan ako dyimo aran dino a kinokwanan mo, kan inopas ko saw tabo kabōsor mo do salapen mo. Changori, parinen ko ngaran mo a malatak akmas ngarangaran dan malalatak saw a tawotawo do tanaya. 10 As mangitongdo akonchi so yanan a para dyirad tawotawo ko a Israel, kan pagyanen ko sanchi daw tan omyan sa do bōkod da a yanan a arabaw mangriribok sira. Idadanes da pabanchi no mararanggas saw a tawotawo a akmas pinarin da do nakarahan a 11 nakayapo pa do chimpo a tinongdo ko saw okom a nangipangōlo siras tawotawo ko a Israel. Torohan ko panchimo so inahah makayapo dyirad tabo kabōsor mo saw.

“ ‘Otro, ibahey pa ni ĀPO dyimo a si ĀPO mismo mangpatnek anchi so bahay para dyimo.*7:11 Chinakey ni Dabid mangpatnek so bahay mana timplo a para di ĀPO (7:5-7), ki changori, si ĀPO danaw mangpatnek so bahay. No chakey na batahen a “bahay” dya, ki siraw magāri a kapotōtan ni Dabid. 12 Ta anchan marapit danaw ōras mo kan machipaynahah ka na dyirad aāmang mo saw, patneken konchiw asa dyirad mismo a pōtot mo a somarsarono kan imo. On, patneken konchi iya do pagāryan na. 13 Iyanchi iyaw mangpatnek so bahay a pangidaydayāwan so ngaran ko, as patneken konchiw trono no pagāryan na a abos pandan. 14 Yaken anchiw āmang na, kan iyanchiw anak ko. An maygatos, yaken anchiw mangdōsa sya a akmas kapangdisiplīna no āmang so pōtot na. 15 Ki iyaw kanāw no kadaw ko, ki mapakaro aba polos dya a akmabas pinarin kwaw di Saulo a pinakaro ko do kapagāri na tan mayparin ka a āri. 16 Siraw kapotōtan mo kan iyaw pagāryan mo, ki nāw da abos pandan do salapen ko. Iyaw trono mo, ki mapatnek a abos pandan.’ ”

17 Inbahey ni Natan di Dabid tabo saw nya chirin sigon do tābo nya a parmata.

18 Sinpangan na, somindep si Āri Dabid kan naydisna do salapen ni ĀPO, kan naydasal a kāna, “O ĀPO a Dyos, sino ako, kan āngo sa lang pamilya ko tan komwan pinarin mo para dyaken mandan changori? 19 Aran komwan, ki akmayaw dedeng nyaya do kapanyideb mo, mo ĀPO a Dyos. Inbahey mo payaw maynamot do masakbayan no pamilya no pachirawatan mwaya, kan inpalōbos mwaya mapatakan dan tawo nyaya, mo ĀPO a Dyos.

20 “Āngo paw maibahey ko dyimo? Chapapatak mo naw pachirawatan mwaya a si Dabid, mo ĀPO a Dyos. 21 Maynamot do kari mo kan sigon do pagayatan mo, pinarin mo tabo nyaya a makaskasdāaw, as kan inpakatoneng mo do pachirawatan mo.

22 “Āngwa kabīleg mo, mo ĀPO a Dyos! Abaw akma dyimo, kan abaw matarek a Dyos an dya imo a akmas nadngedngey namen do mismo a tadyinya namen. 23 Aryoriw matarek a nasyon do tanaya a kapayngay no tawotawo mo a Israel? Imom Dyos, aryoriw matarek a nasyon a yangay mo a sinobbot a nayparin a tawotawo mo? Pinarin mo nya tan magdindināmag ngaran mo, kan namarin dyira so mabibīleg kan makaskasdāaw saw do nakapaksyat mo do salapen tawotawo mo so nasnasyon kan siraw dyos da. 24 On, pinayparin mo tawotawo mo a Israel a dyira mo lang a abos pandan. As imom ĀPO, ki nayparin a Dyos da.

25 “Changori, mo ĀPO a Dyos, ipasigorādo mo a abos pandan iyaw inchirin mwaw maynamot dyaken a pachirawatan mo kan dyirad kapotōtan ko. Tongpalen mo pakono inchirin mo, 26 tan iyaw no ngaran mo, ki maidāyaw anchi a abos pandan. Tan komwan, batahen danchi no tawotawo a kon da, ‘No ĀPO a Manakabalin do Tābo, ki Dyos a mangitoray do Israel!’ As no kapagāri dan kapotōtan no pachirawatan mo a si Dabid, ki matongtong anchi a abos pandan do salapen mo.

27 “O ĀPO a Manakabalin do Tābo, iyaw Dyos no Israel, inpakatoneng mo nyaya do pachirawatan mo a kon mo, ‘Patneken konchiw bahay para dyimo.’ Dawa, nya pachirawatan mo, ki myan danaw tored na a maydasal dyimo so nyaya a dasal. 28 O ĀPO a Dyos, imo, ki Dyos! Siraw no chirin mo, ki oyod sa, kan inkari mo saw nyaya magaganay a bānag do pachirawatan mo. 29 Changori, mahwahok ka pakono a mangbindisyon so pamilya no pachirawatan mwaya tan tomongtong a abos pandan do kapanyideb mo. Ta imom ĀPO a Dyos, ki naychirin, as kan maynamot do bindisyon mo, nāw pakono a marawat no pamilya no pachirawatan mwaya a abos pandan.”