No Somarono A Tolas Ni Apostol Pablo Dyirad Tawotawo Do Tesalonika
No Pakatonngan so Paytābwan no Nya Tolas
Nahay aba a chimpo do nakatayokaw ni Pablo a naytolas so nanomaw a tolas na dyirad nanganohed saw di Jesos do Tesalonika, ki minirwa naytolas so chadadwa a tolas na dyira. No paynamotan na a naytolas, ki nadāmag na a nāw da nalidyatan kan nāw da nariribokan a maynamot do kapaybidi ni Kristo do tanaya. Myan saw kadwan dyira a nangiwaras so dāmag a natongpal danaw kangay ni Kristo (2:2). No binata da kono, ki yapo di Pablo nyaya dāmag. Ki no atbay ni Pablo, ki engga, ta mabayataw sa.
Myan paw matarek a nadngey ni Pablo a maynamot dyirad kadwan saw a nanganohed a naychichwas pa saba so chabyay da. Imbes a maytarabāko sa, ki engga, ta masadot sa kan ririboken da paw kapayngay da saw a manganohed (3:11). Naychawaw sa, ta no myan do aktokto da sigoro, mangbayo kapaychichwas so chabyay da a maynamot ta īto danaw kangay ni Āpo.
Do dyaya tolas, inlawlawag ni Pablo dyiraw no masisīta saw a mapariparin sakbay no kapaybidi ni Kristo. Pinaydabdab na saw masadotaw tan mangay sa a maychichwas so bōkod da a chabyay. Ki inahwahok na saw nanganohedaw tan payiten daw kapanganohed da do aran āngo a kayayan da kan tan tolāden das Pablo a magaget a maytarabāko.
No Naychakarwan no Nya Tolas
Pakatoneng 1:1-2
No kapangokom do kangay ni Jesos 1:3-12
No bagbaga a maynamot do kangay ni Jesos 2:1-7
No bagbaga a maynamot do dasal kan sadot 3:1-15
No kapanawdyan na 3:16-18
2 Tesalonika
1
Pakatoneng
1 Yaken si Pablo kan siraw rārayay ko, ki sa Silas kan Timoteo. Cha dyaw inpaw-it namen a tolas dyinyo do Tesalonika a naibidang dana a tawotawo ni Āpo Dyos a Āmang ta a inyo a manganohed di Āpo Jeso-Kristo.
2 Myan pakono dyinyo parābor kan kaydamnayan no kapangtokto nyo a yapo di Āpo Dyos a Āmang ta kan yapo di Āpo Jeso-Kristo.
No Kapangokom Anchan Mangay si Jeso-Kristo
3 Kakakteh, kosto nyaya parinen namen a machita a pirmi a magyāman kami di Āpo Dyos maynamot dyinyo. On, magyāman kami di Āpo Dyos, ta naypaypangay kapanganohed nyo, as kan naypaypadekket paw kapaysin-aadaw nyo do katakatayisa dyinyo. 4 Dawa, pagpangas namen inyo dyirad iglisya saw no Dyos maynamot do ānos nyowaya kan kanāw naya no kapanganohed nyo di Āpo Dyos. On, ta aran myan saw omlidyalidyat dyinyo kan aran myan saw pakariribokan nyo, ki nāw nyod kapanganohed nyo.
5 Tabo nyaya, ki nyaw pakaboyan a sililinteg iyaw kapangokom no Dyos. Ta iyaw payparinan nanchi no nawri, ki ibidang nanchinyo no Dyos a maikari a machirāman do pagtorayan na. On, nyaw paynamotan na a nāw nyo a mangdidiw so lidyat sichangori.*1:5 Pilp. 1:28-30; 1 Ped. 2:21 6 Oyod a malinteg kapangokom ni Āpo Dyos, ta siraw manglidyalidyataw dyinyo, ki syirto a palidyaten na sanchi. 7 Yaten a malidyalidyatan sichangori, ki paynahahen nanchi yaten ni Āpo Dyos. On, parinen naw nyaya anchan mangay si Āpo Jesos a yapo do hanyit magrāman dyirad manakabalinaw a anghilis na.†1:7 1 Tes. 4:17; Heb. 10:27; 2 Ped. 3:10-14; Pal. 16:18 8 Myan panchiw somdesdebaw a apoy a pangdōsa na dyirad maskehaw a mangbigbig so Dyos kan siraw dyaw a manganohed do Maganay a Dāmag a maynamot do kaisalakānan da a yapo di Āpo ta a Jesos.‡1:8 Isa. 66:15-16 9 Madōsa sanchi do abos pandan a lidyat, as kan machisyay sanchi a abos pandan di Āpo. On, polos a dyi da maboya iyaw no makaskasdāawaw a panakabalin na. 10 Matongpal nya saya do arawaw anchi a kapaybidi ni Jeso-Kristo. Ta do dawrinchi a araw a kapaybidi na, ki rawaten nanchiw kapagdāyawaw kan kapanganyib dan tabo a tawotawo na a manganohed dya. Sichangori, ki aran inyo, ki mairāman kamo na a maynamot ta nanganohed kamo na do innanawo namenaya dyinyo.
11 Dawa, nyaw panghapan na pirmi kami a maydasal a maynamot dyinyo. On, pirmi kami a mangdakdaw do Dyos tan ibidang naynyo a maikari do bayowaw a byay, ta nawriw nanawagan na dyinyo. Maynamot do kasidong no panakabalin na, ki tongpalen nyo pakono tabo no maganayaw a panggep nyo, as kan ipatongpal nyo tabo iyaw no maganayaw a kaparin nyo a maynamot do kapanganohed nyo. 12 Tan an komwan, maidāyaw anchi si Āpo Jesos a maynamot dyinyo, as kan maidāyaw kamonchi a maynamot dya. On, maparin anchiw nyaya a maynamot do parābor no Dyos ta kan Āpo ta a si Jesos.