1 Kapakāsi nyo pa, inyo a maydamnay dana so kabibyay do Sion kan inyo a omyan do Samarya a maimas danas kayayan. On, kapakāsi nyo pa, inyo a mabigbigbig a pangpangōlo do dyaya a mabīleg a nasyon a napidi kan kwanan da no tawotawo do Israel an makachita sa so sidong. 2 Mangay nyo a chiban syodad no Kalneh, as kapaypakwan nyo do mabīleg a syodad no Hamat, kan maypawsok kamo pa do Gat a syodad dan Pilisteo. Maganaganayoriw pagāryan da kan iyaw pagāryan Joda kan Israel? Maraharahawawriw tana da kan tana nyo? 3 Chaskeh nyo a rawaten iyaw ītonchi a kayan didigra. Ki maynamot do kaparin nyo, paypasngenen nyo paw kangay no nawri a araw no kinaranggas. 4 Kapakāsi nyo pa inyo a maylolonat do nabistyan saw so sōng no elipanti a paydisnan, kan michaychan so karni a nadām a orbon a karniro kan bāka. 5 Chadaw nyo mamarin siras kankanta a kankanta a akmas pinarin ni Dabid do kaychowa, kan tokaran nyo sas arpa. 6 Minom kamo so sinabasabak a palek, kan magosar kamo siras kangingināan naw a bangbanglo, ki pinagmamayo nyo abaw karārayaw no Israel. 7 Dawa, inyonchiw manma maakaw kan maiyangay do matarek a tana. Machipanda sanchiw pista kan pasken nyo.

8 Si Āpo DYOS a Manakabalin do Tābo, nangisapata syay do mismo a kinadyos na a kāna, “Ipsok ko kapangas da no tawotawo no Israel kan siraw mangingīna a palasyo*6:8 Mana “kōta”. da. Itoroh konchi do kabōsor da iyaw syodad da kan tabwa myan daw.”

9 An asa poho a mahahakay nabidin do asa pamilya, madiman pa sanchi. 10 An mawaraw kabagyanaw a myan so rebbeng a mangihtot so bangkay saw a yangay na sosohan, kan manahes do nakalāsataw do bahay an myan paw tomayotayo daw a kāna, “Aryoriw rārayay mo?”

Atbayen nanchi a kāna, “Aba!”

Do dāwri, batahen no kabagyan naw a kāna, “Maylilyak kaba! Machita dyi ta ichirin ngaran ni ĀPO.”

11 Anchan magmandar si ĀPO, rakraken na sanchiw rarakohaw a bahay, kan homhomken na sanchiw dēdekey saw. 12 Makapayyayo sawriw kabalyo do rarakoh a bato? Aryoriw magarado a bāka do tāw? Aba! Ki pinayparin nyo a binīno iyaw kinalinteg, kan pinayparin nyo a kosto iyaw madi!

13 Chasoyot nyo nakasākop nyo so idi no Lo-debar.†6:13 No chakey na batahen do Hebreo a chirin, ki “abo”. 2 Sam. 9:4 Pagpangas nyo a kon nyo, “Sinākop tabawriw Karnaim‡6:13 No chakey na batahen do Hebreo a chirin, ki “dadwa olong.” As iyaw olong, ki mangisimbolo so ayit. do bōkod ta a ayit?”

14 Si ĀPO Dyos a Manakabalin do Tābo, makabata sya a kāna, “Inyo a tawotawo no Israel, manoboy akonchi so gan-ganaet a nasyon a mangsākop so nasyon nyo. Lidyalidyaten danchinyo a yapo do asdepan do Hamat do ammyānan a manda do dēkeyaw a oksong no Araba do abagātan.”