8
No Parmata ni Daniel do Karniro kan Kalding
1 Do chatatdo naw a katawen no kapagāri ni Āri Belsassar,*8:1 Nya, ki maparin a 551 a katawen sakbay no nakayanak ni Āpo Jeso-Kristo. As si Daniel, ki makey dana 69 a katawen do dāwri. yaken a si Daniel, ki myan danaw parmata a somnarono do nagparangaw dyaken do nanma. 2 No naboya ko do parmata, ki myan ako do naahadan a syodad a Sosa a sintro do probinsya no Elam. Do parmata, ki mayteytēnek ako do payis no oksong a Olay. 3 Tomnangay ako, ki naboya ko iyaw asa a malloko a karniro†8:3 No “malloko a karniro,” ki paninyalan no pagāryan no Persia. a maytēnek do payis naw no oksong. Myan dadwa manaro a olong na. Iyaw asaw a olong na, ki mananaro kan asaw. Iyaw manarwaw, ki nanawdyi a tomnobo. 4 Binoybōya ko iyaw mallokwaw a domarop do lāod, ammyānan, kan abagātan. Abaw no animal a makaābak sya, kan abaw makaisalākan yapo do panakabalin na. Pinarin na iyaw chinakakey na, kan pinabīleg naw inawan na.
5 Do nakaiktokto kwaw so nya, nyiknyīnan a myan minohtot a asa malloko a kalding‡8:5 No “malloko a kalding,” ki paninyalan no pagāryan no Gresya. a yapo do lāod a lināsat naw hapot no intīrwaya a tana. Do taywara a kataray na, akmaw dya domnaw kokod na saw do tana. Myan rakoh a olong na do payawanaw no dadwa a mata na. 6 Nangay nya kalding do yananaw no malloko a karniro a myan so dadwa a olong a naboya ko a naytēnek do payis naw no oksong, as kan nayyayo nya kalding a nangdarop so karnirwaw do taywara a kasoli na. 7 Binoybōya ko a dinarop naw karnirwaw a sirorongsot do taywara a kasoli na, as kan pinotot naw dadwaw a olong no karnirwaw. Aba iyaw no ayit no karnirwaw a nachilāban dya. Inalba no kaldingaw karnirwaw do tana, kan tinokatokapan na. Abaw makaisalākan so karnirwaw a yapo do panakabalin na.
8 Iyaw kaldingaw, ki naypaypāngay kabīleg na. Ki do kataywara naw no kabīleg na, napotot iyaw rakohaw a olong na. As no tādi na, ki myan tomnobo a apat a olong na a rarakoh a nachitongdo do mangket dyirad apat saw a salawsaw no hanyit.
9 Yapo do asa dyira do apataw a olong na, ki minohtot asaw a dēkey a olong na. Naypabīleg do mangket do abagātan kan do dāya, kan do mangket do mapintas a tana.§8:9 No “mapintas a tana,” ki tana a Israel. Dan. 11:16, 41 10 Naypaypāngay bīleg no dēkeyaw a olong na a makarapit do bōyot no kahanyihanyitan.*8:10 No batahen dan kadwan a maynamot do “bōyot,” ki siraw bitohen a ladāwan dan anghilis no Dyos. Ok. 5:20; Job 38:7; Isa. 40:26 Siraw kadwan a bitohen, ki inpoha na sa do tanaya, as nakatokatokap na sira. 11 Pinatnek naw inawan na a machiyengay do Prinsipi†8:11 No “Prinsipi,” ki si Āpo Dyos mana iyaw anghil a si Migel. no bōyot no kahanyihanyitan. Pinasardeng na saw tawotawo do kararawaw a kapangidāton da di ĀPO, as kan rinakrak naw masantwanaw a yanan ni Prinsipi. 12 Maynamot dyira dyaya, siraw bōyot ni ĀPO kan iyaw kararaw a kapangidāton da, ki inpaipaitoray da do olongaw. As naipoha iyaw kaoyod do tanaya. Do dāwri, nagballīgi iyaw olongaw do tābo a kaparin na.
13 Sinpangan na, nadngey ko a maychiychirin asa anghil, as kan myan matarek a anghil a binata na dya a kāna, “Maypāngo pas kahay iyaw katongpal no parmataya a maynamot do karārawaya a kapangidāton, iyaw kapachiribīldi a pakayapwan no kapayrārayaw, iyaw kaiparawat so masantwanaw a yanan, kan iyaw kapanokatokap so bōyot no Dyos?”
14 Initbay na dya a kāna, “Mapahabas anchiw 2,300‡8:14 Do bidang a 2,300 a dāton, an taydodwa do kararaw, ki myan 1,150 a karaw a mapahabas mana tatdo a katawen kan dadwa kabohan. a mahep kan mabekas. Katayoka na, makapya anchiw no masantwanaw a yanan do sīgod a malinteg a kayiyan na.”
Iyaw Kailawlawag no Parmata
15 Do kayan ko a si Daniel a nangbōya so parmataw kan pinādas ko a awāten, nyiknyīnan a myan naytēnek a asa do salapen kwaw a akmay langa no tawo. 16 Nadngey ko bosis no asa tawo a yapo do hobok naw no Oksong a Olay a nanawag a kāna, “Gabriel,§8:16 Gabriel kan Migel, ki sira lang a anghilis a myan so ngaran do Biblya. No Hebreo a chirin, no chakey na batahen “Gabriel,” ki “tawo no Dyos” (Dan. 8:16; 9:21; Lk. 1:19, 26). As no chakey na batahen “Migel,” ki “(iyaw) akmay Dyos” (Dan. 10:13, 21; 12:1; Jod. 9; Pal. 12:7). ilawlawag mo do dyaya tawo iyaw no chakey naw a batahen parmataw a naboya na.”
17 Do nakapaypasngen naw do naytēnekan kwaw, ki taywaraw nakamo ko kan naysasakeb ako do tana. Binata na dyaken a kāna, “Anak no tawo, awāten mo a iyaw parmataya, ki maynamot do chimpo no panongpalan.”
18 Do kadama naw a maychirichirin dyaken, naynepdep ako a naysasakeb do tana. Ki yinokay na yaken, as nakapaytēnek na dyaken.
19 Do dāwri, binata na a kāna, “Ipakatoneng ko dyimo iyaw maparin anchi do panongpalan a ōras no kasoli no Dyos. Ta no parmataya, ki maynamot do naitongdo a chimpo no pachipandan. 20 Iyaw dadwaw so olong a malloko a karniro a naboya mo, ki iladāwan na saw ar-āri no Midya kan Persya. 21 As iyaw mallokwaw a kalding, ki iyaw āryaw no Gresya. As iyaw rakohaw a olong do payawanaw no dadwa mata na, ki iyaw dāmwaw a āri. 22 Siraw apataw a olong a tomnobo a yapo do nanmaw a olong na a napotot, ki iladāwan da siraw apataw a pagāryan a mohtot anchi a yapo do nasyon na. Ki mabīleg pa saba a akmas dāmwaw a pagāryan.
23 “Anchan masngen danaw no pandan no kapagāri da, as marapit kararahetan danaw a kapachiribīldi da, myan anchiw magparang a asa āri a maranggas so kapagroprōpa, kan manangallīlaw. 24 Bomileg anchi, ki maynamot aba do bōkod na panakabalin. Iyanchiw pakayapwan makam-amak a kapayrārayaw, kan magballīginchi do aran āngo a parinen na. Abohen na sanchiw mabīleg saw a aran siraw tawotawo no Dyos. 25 Maynamot do kasīkap kan kapangallīlaw na, ki magballīgi anchi dyirad kaparin na. Pagpangas nanchiw no inawan na, kan ipadiman na sanchiw āro a tawotawo do dyi da a hahawen. Karīten na panchi iyaw Prinsipi dan prinsipi. Marārayaw anchi, ki yapo abanchi do bīleg no tawo.
26 “Iyaw parmata no kapangidāton do mahep kan mabekas a naibahey dyimo, ki oyod. Ki ilīmed mo parmataya, ta mahay panchiw no katongpal na.”
27 Yaken a si Daniel, ki nahah ako, kan naypoktad ako a naganyit so papere a karaw. Sinpangan na, naybangon ako, kan tinongtong ko iyaw tarabāko kwaw a intoroh no āri dyaken. Ki taywara a nakamikamya akwaba a maynamot do parmataya a dyi ko a maawātan.
*8:1 8:1 Nya, ki maparin a 551 a katawen sakbay no nakayanak ni Āpo Jeso-Kristo. As si Daniel, ki makey dana 69 a katawen do dāwri.
†8:3 8:3 No “malloko a karniro,” ki paninyalan no pagāryan no Persia.
‡8:5 8:5 No “malloko a kalding,” ki paninyalan no pagāryan no Gresya.
§8:9 8:9 No “mapintas a tana,” ki tana a Israel. Dan. 11:16, 41
*8:10 8:10 No batahen dan kadwan a maynamot do “bōyot,” ki siraw bitohen a ladāwan dan anghilis no Dyos. Ok. 5:20; Job 38:7; Isa. 40:26
†8:11 8:11 No “Prinsipi,” ki si Āpo Dyos mana iyaw anghil a si Migel.
‡8:14 8:14 Do bidang a 2,300 a dāton, an taydodwa do kararaw, ki myan 1,150 a karaw a mapahabas mana tatdo a katawen kan dadwa kabohan.
§8:16 8:16 Gabriel kan Migel, ki sira lang a anghilis a myan so ngaran do Biblya. No Hebreo a chirin, no chakey na batahen “Gabriel,” ki “tawo no Dyos” (Dan. 8:16; 9:21; Lk. 1:19, 26). As no chakey na batahen “Migel,” ki “(iyaw) akmay Dyos” (Dan. 10:13, 21; 12:1; Jod. 9; Pal. 12:7).