No Libro A Eklesiastes
No Pakatonngan so Paytābwan no Nya Libro
No mimyan no libro a Eklesiastes, ki kapangtokto sa no “Mangnanawo’’.*1:0 Iya, ki bata da a si Āri Solomon kono. Iya, ki inamīris naw kanyid kan kariribok no byay no tawo a napno so kaopāyan kan dya kaipatongpal no kinalinteg. No nachipandan na, ki iniktokto na a kāna, “No byay, ki abos sinpaspangan’’. Maawātan nabaw kaparin sa no Dyos a mangig-igpet so pachipandan tawo. Aran komwan, binagbagaan na saw tawotawo a ipasnek daw maytarabāko, kan nanāmen daw intoroh saya no Dyos a mandad kāya da.
Karwan no kapangtokto no nya Mangnanawo, ki akma say makaoōpay kan makalidliday. Ki no kayan no nya libro do Biblya, ki ipaboya na a aran siraw maop-ōpay kan magdwadwa, ki nairāman sa tabo. Āro saw nahwahok do nakaispiho da so inawan da do dyaya libro. Natonngan da pa iyaw Biblya a mangipaboya siras nya kapangtokto, ki manoroh pa so namnāma do Dyos a itoroh naw mangamangay pa a chakey a batahen no byay. Dawa, taywara a masisīta a manganyib kan magdāyaw do Dyos, kan maybibyay ta a magtalek dya. No tawo a mamarin so nya, ki mangnānam anchi siras bindisyon no Dyos do byay na do tanaya.
No Naychakarwan no Nya Libro
Aryoriw sinpaspangan no byay? (1:1-2:26)
Panyinyirin a maynamot do byay (3:1-11:8)
Manawdyi a bagbaga (11:9-12:8)
Paytābwan na (12:9-14)
Eklesiastes
1
No Kabo no Sinpaspangan no Tābo
1 Siraw nyaw chirin no Mangnanawo†1:1 Mana “iyaw Pangōlo no kakpekpehan’’. a pōtot ni Dabid, iyaw nagāriyaw do Jerosalem.
2 “Abos sinpaspangan! Abos sinpaspangan!”
kāna no Mangnanawowaw.
“On, polos a abos sinpaspangan!
Tābo, ki abaw sinpaspangan na.”
3 Āngo mahāhap no tawo do tabo nayhohopagan naw
a naybibilagan a tinarabāko na?
4 Mawara kan komaro kapkapotōtan,
ki alit naya a nāw no tanaya.
5 Domadaw araw, kan kasdep na,
as kapakalyalisto na maybidi do dinadan naw.
6 Magpaabagātan salawsaw,
as kairikos na a magpaammyānan.
Maydidibon a maybibidi do nakayapwan naw.
7 Tabo ok-oksong a moyog a mosok do tāw,
ki mapno daba polos tāw.
Maybidi sa do nakayapwan daw,
kan dawriw oyogan darana mirwa.
8 Tabo saw nya, ki makahopag
a dya mailawlawag no tawo.
Iyaw mata, ki maōma aba manyideb.
Iyaw tadyinya, ki mapnek aba mangadngey.
9 An āngo myan do nakahabas, ki myan dananchi.
An āngo tayoka a naparin, ki maparin dananchi.
Aba polos bayo do lōbongaya.
10 Aryoriw makabata sya a,
“Chayaw bayo”?
Ki am-āmang dana myan.
Nanmanma pa adayo kan yaten.
11 Abaw kanaknakman dyirad nayam saw a kapotōtan.
Aran siraw īto panchi,
abanchiw kanaknakman da
dyirad somarsarono pa a kapotōtan.
No Kabo no Sinpaspangan no Kinasīrib
12 Yaken iyaw Mangnanawowaw a nagāri do Israel do Jerosalem. 13 Inpasnek ko a adālen kan chichwasen do kinasīrib tabo mapariparin do lōbongaya.‡1:13 Do Hebreo a chirin, ki “do ohbo no hanyit”. No napatakan ko, ki inparara no Dyos taywara a karahmet do tawotawo. 14 Naboya ko tābo napariparin do lōbongaya, kan aba polos sinpaspangan da tabo a akmas manglakataw so salawsaw.
15 An āngo madyidwaw, ki maparin aba mapalinteg.
An āngo kōrangaw, ki maparin aba maibidang.
16 Binata ko do inawan ko a kon ko, “Inakpeh ko marahem a kinasīrib, as inābak ko sa tabo nagtotorayaw do Jerosalem a nanmanma kan yaken. Taywara sanay ako do kinasīrib kan kapakatoneng.” 17 Inpasnek ko pa a adālen iyaw kinasīrib. Masaw kapakatoneng ko so kaattit kan kabo no arang, ki bāli, akmakay manglakat so salawsaw.
18 Ta an maypāngay kinasīrib, ki ad-adda paw mamayo.
An maypāro kapakatoneng, ki mangamangay paw liday.