9
No Kālit a Kapachipanda no Tabo
1 Dawa, inamīris ko a tabo nyaya a siraw malinteg kan masīrib kan tabo parinen da, ki myan do tanoro no Dyos. Ki abaw aran sino a tawo a makapatak do masakbayan an kapangadaw mana kapangipsok mangay dya. 2 No tabo, ki malit pachipandan da siraw malinteg kan marahet, siraw maganay kan madi, siraw madalos kan dya madalos, siraw manorohaw so dāton da kan siraw dyaw a manoroh.
Akmas maparin do maganay a tawo,
komwan do maygaygatos a tawo.
Akmas maparin do magsapata,
komwan met do māmo a magsapata.
3 Iyaw nyaw marahet do tabo a mapariparin do lōbongaya: malit sa tabo so pachipandan. Siraw tawotawo, ki napno sa so karahet do kapangtokto da, as kan myan paw inaattit do pōso da ranan da mabyay. Katayoka na, ki mangay sa do yanan da no nadimanaw. 4 Ki no aran sino a machirapa dyirad sibibyayaw, myan namnāma na. Ta no sibibyay a chito, ki maganaganay kan nadiman a lion.
5 Ta siraw sibibyayaw, ki chapatak da a madiman sanchi.
Ki siraw nadimanaw, ki aba polos chapatak da.
Apabaw magon-gona da.
As aran iyaw pakanaknakmanaw dyira, ki nawayakan dana.
6 Iyaw kadaw da, iyaw kapangipsok da,
kan iyaw kapangīmon da, ki nahay dana nabo.
Apabanchiw pinakabinglay da
do aran āngo a mapariparin do lōbongaya.
7 Ngay, koman ka so kanen mwaw a siraragsak, kan inomen mo palek mwaw a masoyosoyot, ta sichāngori dana a mahwahok no Dyos do dya a parinen mo. 8 Pirmi ka maylaylay so maydak, kan kanāyon mwa padwan oho mwayas lana.*9:8 Maylaylay sa so maydak an silibraren da. No chakey na batahen no kapado so lana do oho, ki mangipaboya so bindisyon no Dyos kan iyaw kasoyot no nya kaparin. Sal. 23:5 9 Do tabo a araw do dyaya abos sinpaspangan a kabyay a intoroh no Dyos dyimo do lōbongaya, nanāmen nyo byay kan si baket mo a chadaw mo. On, nanāmen mo do tabo iyaw abos sinpaspangan a araw mo, ta nyaw kayayan pa no byay mo kan nayhohopagan mo do lōbongaya. 10 Aran āngo a madongso mo a parinen, ki parinen mo do tābo a kayit mo. Ta do tanem a kwanan monchi, apabaw kapaytarabāko mana kapagplāno mana kapakatoneng mana kinasīrib.
11 Myan paw naboya ko do lōbongaya:
Do kapachilomba, ki dyira naba no matarayaw ballīgi,
mana do kapachigobat, ki dyira naba no mayitaw kapangābak,
mana do kapaychichwas so makan, ki dyira naba no masīribaw,
mana do kahap so kinabaknang, ki dyira naba no makaāwataw,
mana do kaidāyaw, ki dyira naba no makapatakaw.
Paripariho sa tabo a myan so ōras kan chansa.
12 Otro, abaw tawo a makapatak so naikeddeng a ōras na:
Akmas amongaw a nasigāyan
mana manomanok a nasdok,
komwan tawotawo a natolo do marahet danaya chimpo
a maychehat a mawara dyira.
No Maganaganay Kasīrib kan Kabon Arang
13 Ari paw naboya ko a kaparin kinasīrib do lōbongaya a maganay dyaken. 14 Myanaw asa dēkey a syodad a papere iyaw omyan a tawo. Dinarop no mabīleg a āri kan bōyot na. Linakob da kan pinatnek daw palapala do ahad no syodad. 15 Ki myan masīrib a pobri a mahakay a omyan do dya syodad, kan insalākan naw nya syodad do kinasīrib naw. Ki apaba polos nakanakem so nawri a pobri a mahakay. 16 Dawa, binata ko a kon ko, “No kinasīrib, ki maganaganay kan kayit.” Ki no kinasīrib no mapobri a tawo, ki mairoromen. As siraw chirin na, ki maikaskāso sa paba.
17 Maganaganay a adngeyen madomi saw a chirin no masīrib a tawo
kan kapangēngey no magtoray dan abos arang.
18 No kinasīrib, ki maganaganay kan armas do gobat,
ki do asa maygaygatos, rārayawen naw āro a maganay.
*9:8 9:8 Maylaylay sa so maydak an silibraren da. No chakey na batahen no kapado so lana do oho, ki mangipaboya so bindisyon no Dyos kan iyaw kasoyot no nya kaparin. Sal. 23:5