No Libro A Ester
No Pakatonngan so Paytābwan no Nya Libro
Naparin nyaya do palasyo no impirador do Persya no tabo mimyan librwaya ni Ester. As no paytābwan nya, ki maynamot do asa mabakes a Jodyo a si Ester as kan maynamot do katored no kapangtokto na kan kadaw na siras Jodyo saw a kapayngay na, ki insalākan na sa do kadiman da a tabo.
Ilawlawag pa no nya libro no Ester an maypāngo a nangrogi kan āngo chakey na batahen no pistaen dayan Jodyo a “Pista no Porim.”
No Naychakarwan no Nya Libro
Pakatoneng (1:1-2)
No kapidi ni Ester a rēyna (1:1-2:23)
No panggep ni Haman a kadiman siras Jodyo saw (3:1-5:14)
No kabītay ni Haman (6:1-7:10)
No kaābak dan Jodyo saw so kabōsor da saw (8:1-10:3)
Ester
1
No Kasōkir ni Rēyna Basti si Āri Ekserses
Siraw nyaw naparin do chimpo ni Āri Ekserses.* 1:1 Mana Ahasweros, kan nangitoray do 485-465 B.C. Esra 4:6 Iyaw nya Ekserses, ki nangitoray so asa gasot, dadwa poho, kan papito a probinsya makayapo do Indya a mandad Etiopya. 1:1 Etiopya mana Kos, ngaran na do kaychowa. Do dāwri a chimpo, no naydisnan no trono ni Āri Ekserses, ki do Sosa a sintro no pagāryan no Persya. As do chatatdo naw a katawen no nakapagtoray na, namarin so pista a para do tabo magtotoray na kan tabo opisyalis na. Nachipista saw totorayen da saw no soldādo do Persya kan Medya 1:3 Persya kan Medya, ki asa a pagāryan. kontodo gorbirnador saw kan siraw matotohos saw so saad a yapo do probinsya saw. Do irahem no anem a kabohan, inpaboya naw kinabaknang no pagtorayan na, dayag, kan kapintas na.
Sinpangan na, do nakatayoka danaw no nya pista, namarin paw āryaw so pista a para dyirad tabo tawotawo a omidi do Sosa, mabaknang mana mapobri. Iyaw nya pista, ki papito a karaw a naparin do minoyongan no atataw no palasyo. Iyaw minoyonganaw, ki nabistyan so kortina saw a mapīno a tela, maydak kan asol. Nachipong sa do hobid saw a mapīno a tela, maydak kan obi so kīta, kan nailōdyit sa yapo do sinan singsing saw a pirak. Marmol saw parey saw a nakaikapetan da. Myan saw manaro a paydisnan a naparin do balitok kan pirak a napangay do atataw. No nya atat, ki naar-artyan so marmol, perlas, kan matatarek a kīta no mangīna a bato. Naitawoy palek do bāso saw a balitok kan matatarek nakasokog da, as kan maboslon palek maynamot do kadadam ni āri. Sigon do mandar ni āri, abaw mamīlit dyira a minom, ta inbilin ni āri dyirad katalek naw a magsirsīrbi a nolay da a minom kāda asa sigon do chakey na.
Ranan na, aran si Rēyna Basti, ki namarin met so pista na a para dyirad mababakes saw do palasyo ni Āri Ekserses.
10 Do chapapito naranaw a araw no pista, taywaraw kasoyot ni āri, ta nadinyat dana. Dawa, tinawagan na saw papitwaw a yonoko na a magsirsīrbi dya. Siraw nya sa: Mehoman, Bista, Harbona, Bigta, Abagta, Setar, kan Karkas. 11 Inbilin na dyira a yangay da hapen si Rēyna Basti a iparang do salapen na a sikokorona tan ipabōya naw taywaraw a kapintas ni baket na dyirad opisyalis naw kan tabo bisīta na. 12 Ki do nakaibahey daw no yonoko saw so inbilin naw ni āri di Rēyna Basti, chinaskeh naw nangay. Do dāwri, oltimo soli ni āri, kan mapenpen na paba.
13 Maynamot ta dadakay no āryaw mangdaw so kapangtokto dan mamagbaga saw maynamot do linteg kan kapangokom, nachisarīta dyirad mamasīrib naw a makapatak so kosto a parinen. 14 No masanyib a pachisngenan āri, ki sa: Karsena, Setar, Admata, Tarsis, Meres, Marsena, kan Memokan. Siraw nyaw papito a opisyalis do pagāryan no Persya kan Medya. 15 Binata na dyira a kāna, “Sigon do linteg, āngo maganay a parinen di Rēyna Basti? Inanohdan nabaw yaken a āri do nakaibilin kwaw sya dyirad tinoboy ko saw a yonoko dyaken.”
16 Ki tominbay si Memokan di āri do kasalasalapan daw no opisyalis saw a kāna, “Ay pakawanen! Madiw nya pinarin Rēyna Basti. Moyboh aba si āri iyaw inasnesnekan na an dyi pa tabo a opisyalis kan siraw tawotawo do intīro a pagāryan ni āri. 17 Ta iyaw nya pinarin ni rēyna, ki komayab anchi do tabo a mababakes, kan paynamotan darana dya omanyib siras lalakay da. Batahen danchi a kon da, ‘Inbilin naw ni Āri Ekserses si Rēyna Basti a mangay do salapen na, ki nangay abaw.’ 18 Iyaw naparinaya sicharaw, madāmag danchi no mababakes saw a mabigbigbig do Persya kan Medya, as tolāden darananchiw nya pinarin ni rēyna dyirad tabo a opisyalis saya ni āri. An komwan, machipandabaw kabon anyib kan kapaysin-iipsok. 19 As dawa, an makahwahok dyimo mo āri, mangibilin ka pakono so pangeddeng a dya mabaliwan a maitolas do linteg saw no Persya kan Medya tan si Basti, ki maparin na paba polos magparang do salapen mo. As iyaw nawri a saad na rēyna, ki itoroh mo na do matarek a mabakes a mangamangay a maikari kan iya. 20 Anchan maipakatoneng pangeddeng mwaya do intīrwaya pagāryan mo a marahawa, anyiben dananchin tabo mabakes kabahay da makayapo do kabobodisan mandad katotohosan.”
21 Chinadaw ni āri kan opisyalis na saw nyaya kapangtokto. Dawa, pinarin āryaw akmas inbaheyaw ni Memokan. 22 Maynamot do dyaya, nangipaw-it so tolas sa dyirad tabo probinsya a itorayan na, sigon do kapaychirin kan kapaytolas do kāda probinsya. No naibahey, ki kāda mahakay, ki iya pakono magtoray do bōkod na pamilya kan chirin na pakono matongpal.

*1:1 1:1 Mana Ahasweros, kan nangitoray do 485-465 B.C. Esra 4:6

1:1 1:1 Etiopya mana Kos, ngaran na do kaychowa.

1:3 1:3 Persya kan Medya, ki asa a pagāryan.