1 Katayoka dan nya saya napariparin, pinadayāwan ni Āri Ekserses si Haman a pōtot ni Hammedata a kapotōtan ni Agag.*3:1 Si Agag, ki iyaw āri dan Amalekita. 1 Sam. 15:8, 33; Eks. 17:8-16 Pinayparin na a iya danaw katotohosan a opisyal do intīro a pagāryan. 2 As inbilin ni āri dyirad tabo opisyalis na saw a myan do rowanganaw no palasyo a ipaboya daw anyib di Haman maynamot do kapaydogod da a magdāyaw dya. Pinarin da tabo. Ki si Mordokeo, chinaskeh naw maydogod mana magdāyaw dya. 3 As dawa, inyahes dan opisyalis saw a myan do rowanganaw no palasyo di Mordokeo a kon da, “Āngo ta nagtongpal kaba do bilin naw āri?”

4 Kararaw a paychirinan das Mordokeo, ki akmaw abo tadyinya na. “Yaken, ki Jodyo,” initbay ni Mordokeo dyira. As dawa, inbahey dad Haman, ta chiban da an ipalōbos naw komwanaya pariparinen Mordokeo. 5 Do nakaboyaw sya ni Haman a dya maydogod si Mordokeo mana magdāyaw dya, oltimo nakapakasoli na. 6 As do nakatoneng naw sya a si Mordokeo, ki Jodyo, chanawob naba do aktokto na a si Mordokeo lang madōsa. Dawa, naychichwas so pamosposan tan ipadiman na sa tabo tawotawowaw a Jodyo do intīro a pagāryan no Persya.

7 Do chaasa poho naw kan dadwa a katawen a kapagtoray ni Āri Ekserses, do manōmaw a bohan a mayngaran so Nisan, inbilin ni Haman iyaw kapagbibinōnot a iyaw pangaranan daw so Por.†3:7 No chakey na batahen chirin a Por, ki “bōnot” (Porim, ki āro), as nakayapwan no ngaran no Pista no Porim do Ester 9:20-32. Iyaw nyaw mangikeddeng an āngo a araw kan bohan katongpal so panggep naw a kadiman siras Jodyo saw. Napidi iyaw chaasa poho naw kan tatdo a karaw, do chaasa poho naw kan dadwa a kabohan no mayngaran so Adar.

8 Sinpangan na, binata ni Haman di Āri Ekserses a kāna, “Ari saw tawotawo a naychawpit a napatawa so inawan da dyirad kadwan saya a tawotawo do tabo probprobinsya do pagāryan mwaya. Sira, ki machitarek sa so dadakay dyirad kadwan saya tawotawo kan dya manganohed do linteg mo saya. An komwan, palobōsan moriw nyaya? 9 An makahwahok dyimo mo āri, mangikeddeng ka pakono so linteg a maipadiman sa. An parinen mo nya aket, manoroh ako so tatdo a gasot papito a poho kan dadima tonilāda pirak do pangapyan naw no āri so kwarta a maosar a para do pagāryan.”

10 Do dāwri, pinakaro ni āri iyaw pangsilyo naw a singsing do kakamay na, as nakaitoroh na sya do kabōsor daw no Jodyo a si Haman a pōtot ni Hammedata a kapotōtan ni Agag. 11 Sinpangan na, inbahey ni āri di Haman a kāna, “Sigi, siraw tawotawo saw kan kwarta daw, ki dyira mo na. Parinen mo naw chakey mo dyira.”

12 Do chaasa poho naw kan tatdo a karaw no manōma a bohan, tinawagan san Haman sikritaryo na saw ni āri. As inbahey na dyiraw bilinaw tan maytolas sa dyirad opisyalis saw, gobirnador saw, kan siraw magtotoray saw do tabo probprobinsya. Naiyōlog nya bilin do kāda kapaychirin kan sigon do kāda kapaytolas do intīro a pagāryan, as kan naitolas do ngaran ni Āri Ekserses kan nasilyowan so singsing naw. 13 Inwaras dan natoboy saw nya bilin dyirad tabo probinsya saw do pagāryan ni āri. Naitolas do bilinaw a maipadiman sa tabo Jodyo, magtotobo kan matotoneng, mababakes kan adedekey. On, maipadiman sa tabo do asa karaw, do chaasa poho naw kan tatdo a araw, do chaasa poho naw kan dadwa bohan a mayngaran so Adar. Maipadiman sa a abo kāsi, kan masamsam paw dyira da saw. 14 Iyaw kopya no nya bilin, ki maitoroh do kāda probprobinsya kan maibahebahey a pamakatoneng do tabo a tawotawo tan makasagāna sa do dāwri a araw.

15 Do bilin ni āri, in-godegodes daw nangay no natoboy saw, kan inpakatoneng daw nya bilin do Sosa a sintro no pagāryan. Chinariribok da do syodad no Sosa. Ki sa āri kan Haman, ki myan sa minom so palek.