1 Siraw tabo Israelita, ki nagrobwat sa a yapo do let-ang a mayngaran so Sin, kan nanakenakey sa a nayadiyadis so yanan sigon do bilin naw ni ĀPO. Nagkampo sa do Repidim, ki abaw inomen da a ranom no tawotawo saw. 2 As dawa, nachidiman sa di Moyses, as nakabata da sya dya a kon da, “Torohan mo yamen so ranom a inomen namen.”

Ki tinbay sa ni Moyses a kāna, “Āngo ta machidiman kamo dyaken? Āngo ta soōten nyo si ĀPO?”

3 Ki nawaw saw no tawotawo saw daw, kan naydabadabay a maikontra di Moyses. Binata da dya a kon da, “Āngo ta inkaro mo yamen a yapo do Egipto, as kainonolay mo dyamen kan anak namen saya kan binyay namen a madiman do kawaw?”

4 Do dāwri, tomnanyis si Moyses di ĀPO a kāna, “Āngo paro parinen kod tawotawo saya? Sisasagāna dana saya mangobor dyaken.”

5 Ki inatbay ni ĀPO si Moyses a kāna, “Akmahen mo saw tawotawo saya, kan kayrayay mo papere dyirad panglakayen daya no Israel, as kan iyonot mo sarokodaw a inosar mod oksong a Nile. 6 Maytēnek akonchi do salapen mwaw do hapotaw no batwaw do Horeb.*17:6 Do kadwan a naiyōlog, ki “Tokon a Sinai”. Eks. 3:1 Baōtan monchiw batwaw so sarokod mwaw, as mohtot anchiw ranom a para inomen dan tawotawowaya.” As dawa, pinarin ni Moyses nyaya do salapen daw no panglakayen saw no Israel. 7 Pinangaranan naw nawri a yanan so Massa kan Meriba†17:7 Do chirin Hebrew no chakey da batahen “Massa” kan “Meriba,” ki “kasōot” kan “kapachidiman”. maynamot ta nachidiman saw Israelita saw kan sinōot da si ĀPO a kon da, “Aryori si ĀPO dyaten mana abo?”

8 Sinpangan na, nangay saw Amalekitaw, kan ginobat da saw Israelitaw do Repidim. 9 Ki binata ni Moyses di Joswe a kāna, “Mamidi kas kadwan dyirad mahahakay ta saya, as kangay nyo a manggobat siras Amalekita saya. Anchan delak, maytēnek akonchi dwa totokayan paytokonan a mangigpet so sarokodaw ni Āpo Dyos.”

10 As dawa, nachigobat sa Joswe a akmas inbilinaw ni Moyses, as sa Moyses, si Aaron, as kan si Hor, komnayat sa do tōtokaw no paytokonan. 11 Ranan ni Moyses a mapatohos so tanoro naw, mangab-ābak saw Israelita saw. Ki an mapabodis naw tanoro naw, mangab-ābak saw Amalekita saw. 12 Do nakarapidaw no tanoro saw ni Moyses, nanghap sa Aaron kan Hor so bato a naydisnan ni Moyses. As sa Aaron kan Hor, naybītan da a pinatohos tanorwaw ni Moyses tan nāw na manda do kasdep no araw. 13 Maynamot ta komwan no naparin, inābak da Joswe saw no Amalekita saw do kaosar da so ispāda.

14 Sinpangan na, binata ni ĀPO di Moyses a kāna, “Itolas mo nya do nahon a libro tan mayparin a pakanaknakman, kan ibāsa mo a ipadngey di Joswe, ta paypisahen konchi a abohen Amalekita saya do tanaya tan abo makanakem sira.” 15 As nangpatnek si Moyses so altar a pangidatōnan, as kan pinangaranan na so “Si ĀPO, bandera ko,” 16 ta binata na a kāna, “Patohosen nyo bandera ni ĀPO!‡17:16 Malawag aba do chirin Hebreo. Dawa, myan kadwan a naiyōlog so “Sitotored a pinatohos dan Amalekita tanoro daw a maikontra di ĀPO.” Si ĀPO, nāw nanchi a gobaten saw Amalekita a abos pandan!”