4
No Kapachikontra do Kapirwa a Kapatnek so Timplo
1 Do nakadāmag daw no kabōsor saw no tawotawo no Joda kan Benhamin a naybidi dana sa do nakaakawan daw, as kan mirwa darana patneken timplowaw ni ĀPO a Dyos no tawotawo do Israel, 2 nangay sa di Serobbabel kan dyirad pangpangōlwaw dan partīdos no Israel, as kan binata da dyira a kon da, “Palobōsan nyo pa yamen a machipaytarabāko dyinyo. Ta aran yamen, ki dayāwen namen iyaw Dyos nyo a akma dyinyo, kan nāw namen dana a mangidāton do Dyos so binyay namen a yapo pa do chimpwaw do nakaiyangay na dyamen dya ni Esar-haddon a āri do Assirya.”
3 Ki inatbay da Serobbabel, Joswe, kan siraw pangpangōlo daw no pārtidos no Israel a kon da, “Abaw bibyang nyo dyamen a mapatnek so timplowaw a para do Dyos namen. Yamen lang mangpatnek sya para di ĀPO a Dyos no Israel, sigon do bilinaw dyamen ni Syros a impirador do Persya.”
4 Do dāwri, siraw omidyaw do omdibonaw, ki pinadas da sa a opāyen kan amomohen tawotawo saw no Joda tan dyi da tongtongen a patneken timplowaw. 5 Pinasoksokan da paw opisyalis saw no gobyirno no Persya tan machikontra sa kan sopyaten daw panggep daw no tawotawo no Joda. Nāw da pinarin komwan do kadama no kapagtoray ni Impirador Syros a mandad kapagāri ni Impirador Daryos.
No Kadwan a Kapachikontra do Kapirwa a Kapatnek so Jerosalem
6 Do nakasiknan no nakapagāri ni Impirador Ekserses,*4:6 Mana Ahasweros, kan nangitoray do 485-465 B.C. Est. 1:1 naytolas saw kabōsor saw so pangidarom das tawotawo saw a omyan do Joda kan do Jerosalem. 7 As do chimpo ni Artaekserses a impirador do Persya, sa Bislam, Mitredat, Tabeel, kan siraw kadwanaw a rārayay da, ki naytolas sa di Artaekserses. Iyaw tolas daw, ki naitolas do kapaytolas kan kapaychirin a Aramaik kan naiyōlog.†4:7 No chirin a Aramaik mana Hebreo, ki iyaw chirin a naosar do intīro a pagāryan Persya. 8 Si Rehom a gobirnador kan si Simsai a sikritaryo, naytolas sa di Impirador Artaekserses so machikontra dyira do Jerosalem, so komwan: 9 Si Rehom a gobirnador kan Simsai a sikritaryo, kontodo rārayay da saw a hwis, magtotoray, kan opisyalis saw, sikritaryo saw, siraw taga Erek, siraw taga Babilonya, kan siraw taga Sosa a siraw Elamita. 10 Mairāman paw kadwan saw a tawotawo a inakaw ni Asorbanipal a iyaw mabīlegaw kan nagdindināmagaw a āri do Assirya. On, inakaw na sa kan pinayadis na sa do syodad a Samaria kan do kadwan saw a loglogar no probinsya a Laōden no Oksong a Oprates.‡4:10 Mana “probinsya do Kabtang no Oksong”.
11 Nyaw kopyaw no tolas a inpaw-it da dya.
“Dyimom Āpo Artaekserses a Āri, yapo dyamen a pachirawatan mo a omyan do probinsya a Laōden no Oksong a Oprates:
12 “Chakey namen a mapatakan mom Āpo Impirador a siraw Jodyowaw a nangay dyamen a yapo do pagāryan mo, ki magyan dana sa do Jerosalem. Sichangori, madama dana sa a mirwa a mapatnek so nachiribīldyaw kan marahetaw a syodad kontodo siraw ahad naw kan pondasyon na saw.
13 “Maganay mo Āpo Impirador an mapatakan mo pa a an mirwa dana mapatnek nyaya a syodad, as kan mirwa dana mabangon saw ahad na, magbāyad sabanchiw tawotawo siras matatarek a kapagbwis da, as kan maksay dananchi do pangapyan so kinabaknang no impirador do pagāryan na. 14 Sichangori, maynamot ta myan karbengan namen mo āpo āri, as kan maganay aba a maboya namen a dyi ka maanyib, inpaw-it namen dyimo nyaya a dāmag, 15 tan myan mangchichwas do pangapyanaw siras nahonaw a tolas a nakaitolasan dan napariparin saw do pagāryan dyirad aāmang nyo. Do dyaya naitolas, matonngan monchi a no tawotawo do nyaya a syodad, ki nagribīldi a syodad. Nangriribok sa dyirad ar-āri kan pangpangōlo saw no probinsya sa. Dyaw nakayapwan masōkir a tawotawo kan namyay saw so riribok yapo do kaychowa pa. Dawa, naiparārayaw nya syodad. 16 Ipakatoneng namen dyimom Āpo Impirador a an minirwa dana napatnek nyaya syodad, as kan minirwa dana nabangon ahad na saw, apabanchiw toray mo do probinsya a Laōden no Oksong a Oprates.”
17 Nyaw inpaw-it ni impirador a atbay na a kāna:
“Dyinyom Gobirnador Rehom kan Simsai a sikritaryo, kan tabo rārayay nyo a omyan do Samaria kontodo tabo a loglogar do probinsya a Laōden no Oksong a Oprates.
“Kablāawan ko inyo.
18 “Iyaw tolasaw a inpaw-it nyo, ki naiyōlog kan naibāsa dana do salapen ko. 19 Naikeddeng ko kan naimbistigaran nya, as kan natonngan a yapo do kaychowa pa, nagribīldi saw tawotawo do dyaya syodad dyirad ar-āri, as kan logar a nakayapwan riribok kan namyay so riribok. 20 Mabibīleg saw ar-āri a nagtoray do Jerosalem kan do intīro a probinsya a Laōden no Oksong a Oprates, as kan nagpabāyad sa so matatarek a kapagbwis. 21 Dawa, mamarin kamo so pangeddeng a pagsardengen daw tarabāko daya tan dyi dana mirwa a mapatnek nyaya a syodad a mandanchan myan bayo a pangeddeng ko. 22 Paybabalay nyo aba. Nonolay nyo aba a mayparakoh a mandanchan dilikādo dana do pagāryan ko.”
23 Do nakabāsa daw so atbayaw ni Impirador Artaekserses di Rehom, Simsai a sikritaryo, kan siraw rārayay da saw, ki binebelan daw nangay do yanan daw no Jodyo saw do Jerosalem, as kan pinīlit da inpapasardeng tarabāko daw.
24 Do dāwri, nagsardeng iyaw tarabākwaw a kapatnek so timplo no Dyos do Jerosalem a nanda do somaronwaw a tawen do kapagāri ni Daryos a impirador no Persya.