6
No Pangeddeng ni Impirador Daryos
1 Sinpangan na, nangikeddeng si Impirador Daryos, kan naparin kapaychichwas do Babilonya do pangapyanaw siras nahonaw a tolas a nakaitolasan dan napariparin saw do pagāryan. 2 Nachichwasan da do Ekbatana a sintro no probinsya a Medya iyaw nahon a tolas a nakaitolasan nya:
“Pakanaknakman:
3 “Do manōma a tawen no kapagāri ni Impirador Syros, inkeddeng ni impirador iyaw pangeddeng a maynamot do timplo no Dyos do Jerosalem:
“Nonolay nyo sa a mirwa mapatnek so timplo a pagyanan a pakaiparawatan dan sāgot kan paysosohan so dāton, as kan nonolay nyo sa a mapangay so pondasyon na. Iyaw katohos na, ki sasyam a poho a kadapan, kan sasyam a kadapan so kawbong.*6:3 1 Ār. 6:2; 2 Kron. 3:4 4 Do kāda tatdo a katoon a rarakoh a bato, mapakatayhapotan so toroso a sidro. No gastos, ki bāyadan a yapo do pangapyan so kwarta no pagāryan. 5 Asa pa. Nonolay nyo a siraw warawara a balitok kan pirak a yapo do bahay no Dyos a pinakaro ni Nebokadnessar do timplo a myan do Jerosalem kan inyangay na do Babilonya, ki mapaybidi a iyangay do timplo a myan do Jerosalem. On, maposek sa do bahay no Dyos.”
6 Sinpangan na, nyaw inpaw-it ni Impirador Daryos a kāna:
“Dāwa, inyom Tattenai a gobirnador do probinsya a Laōden no Oksong a Oprates kan imom Setar-bosenai kan siraw rārayay nyo a opisyalis do dawri a probinsya, machiditdit kamo daw. 7 Nonolay nyo tarabākwaya a bahay no Dyos. Palobōsan nyo gobirnador daw no Jodyo kan siraw panglakayen saw a mirwa a mapatnek so nya bahay no Dyos do yanan na.
8 “Yaken mangikeddeng so rebbengen nyo para dyirad panglakayen saw no Jodyo do kapatnek no nya bahay no Dyos. No gastos dan nya saya tawo, ki bayādan a tabo yapo do pangapyanaw so kwarta no pagāryan a yapo do bwis a nakpeh do probinsya a Laōden no Oksong a Oprates tan dya magsardeng iyaw katarabāko na. 9 Aran āngo a akdawen dan papādi saw do Jerosalem a machita da do kararaw, mapalōbosan a dya maiyimot a itoroh dyira siraw orbon a tōro a bāka, tōro a karniro, malloko a orbon a karniro a masosohan a dāton para do Dyos no hanyit, kan trīgo, asin, palek, mana lana. 10 Tan komwan, maparin sa mangidāton so makahwahok saw a dāton do Dyos no hanyit, kan paydasal daw kaganayan no byay no āri kan siraw pōtot na.
11 “Ikeddeng ko pa a an sino mangbaliw so nya pangeddeng, mabagot wananaw no bahay na, as maibāyog a mailansa do dawri a wanan iyaw akin bahayaw sya. Iyaw bahay naw, ki maparin a yanan basōra. 12 Si Āpo Dyos pakono a napatnek so magdindināmag a ngaran na daw, mangābak so aran sino a āri mana tawotawo a mangpadas a mangbaliw so nya pangeddeng mana mangrārayaw so nya bahay no Dyos do Jerosalem.
“Yaken si Daryos, mangikeddeng so nya. Matongpal pakono a sipapasnek.”
No Katayoka kan Didikasyon no Timplo
13 Sinpangan na, sigon do pangeddeng a inpaw-it ni Impirador Daryos, si Tattenai a gobirnador do probinsya a Laōden no Oksong a Oprates, si Setar-bosenai kan siraw rārayay daw, nagtongpal sa a sipapasnek. 14 As siraw panglakayen daw no Jodyo, tinongtong daw mapatnek, kan maboya a maypaypalisto do kahwahok daw do kapangipadtwaw ni propīta Haggeo kan si Sakaryas a apoko ni Iddo. Tinayoka da a pinatnek timplowaw sigon do mandar no Dyos no Israel kan no pangeddeng dan impirador do Persya a sa Syros, Daryos, kan Artaekserses 15 Iyaw timplo, ki natayoka do chatatdo a karaw no bohan a Adar do chanem a katawen no kapagāri ni Impirador Daryos.
16 Sinpangan na, siraw tawotawo no Israel a siraw papādi, Lebita, kan tabo naybidi saw a naakaw, sinilibrar daw didikasyon no bahay no Dyos a masoyosoyot. 17 Do dyaya didikasyon no nya bahay no Dyos, nangidāton sa so asa gasot a tōro a bāka, dadwa gasot a tōro a karniro, apat a gasot a malloko a orbon a karniro a masosohan. As no dāton para do gatogatos no tabo Israel, indāton daw asa poho kan dadwa a malloko a kalding. Kāda asa, ki pinakainawan da do kāda trībo no Israel. 18 As pinatnek da saw papādi kan siraw Lebita do bonggoy da a para do kapagsīrbi da do Dyos do Jerosalem sigon do naitolas do librowaw ni Moyses.
No Pistan Pakanaknakman so Nakahabas no Anghil
19 Do chaasa poho naw kan apat a karaw do manōma a bohan, sinilibrar dan naybidi saw a naakaw iyaw Pista no Pakanaknakman so Nakahabas no Anghil. 20 Siraw papādi kan Lebita, dinalosan darana a tabo inawan da. Siraw Lebita, ki diniman da saw orbon a karniro a pasohen a simememeh†6:20 Eks. 12:8-9 a pagpista para dyirad tabo tawotawo a naybidi, dyirad papādi, kan dyirad inawan da mismo. 21 Siraw tawotawo no Israel a naybidi a naakaw, kinan daw karnyaw. As nachihanghang saw tabo sīgod a omyan daw a nachibawa dyirad dyaw a madalos so dadakay a tawotawo do tanaw a karoba da tan magdāyaw di ĀPO a iyaw Dyos no Israel. 22 Sinilibrar daw Pistaw no Tināpay a Abos Libadora do papito a karaw a siraragsak. Ta si ĀPO, ki pinasoyot na sa do nakapagbaliw no kapangtokto no impirador do Assirya tan sinidongan na sa do tarabāko do bahay no Dyos a Dyos no Israel.