1 Do nakapagtawen Abram so sasyam a poho kan sasyam, napaboya si ĀPO dya, as nakabata na sya a kāna, “Yaken, ki iyaw Dyos a Manakabalin do Tābo. Manganohed ka dyaken, kan nāw mo a maybibyay do kinalinteg tan abo pakapilāwan mo. 2 Tan iyaw nakapachitōlag ko dyimo do nakarahan, ki oyod a tongpalen ko, as kan torohan konchimo so taywara so kāro a kapotōtan.”*17:2 Gen. 15:18-19 3 Nagrōkob si Abram do tana, ki binatan Āpo Dyos dya a kāna, 4 “Nyaw itōlag ko dyimo: Imonchiw pakayapwan āro a nasnasyon. 5 Abram pabaw ngaran mo sichangori, an dya Abraham,†17:5 Iyaw ngaran “Abraham,” ki yapo do tatdo a chirin no Hebreo. No “Ab,” ki āmang. No “ram,” ki maidāyaw, as kan no “ham,” ki āro. maynamot ta payparinen koymo a āmang no āro saw a nasnasyon. 6 On, torohan konchimo so taywara so kāro a kapotōtan, as kan siranchiw pakayapwan āro a nasnasyon. Siranchiw kadwanaw, ki payparinen konchi a āri.

7 “Tongpalen konchiw nyaya abo pandan a tōlag ko dyimo kan sira panchiw somarsaronwaya kapotōtan mo. Nāw na ikari ko dyimo a yaken danaw Dyos mo, as kan Dyos no kapotōtan mo saw. 8 Gan-ganaet kamo do dyaya tana a yanan nyo sichangori, ki itoroh konchi dyimo nyaya kan siraw kapotōtan mwaw. On, tabo nya tana a Kanaan, ki dyira danchi a abos pandan, kan yaken anchiw Dyos da.”

9 Tinongtong no Dyos naychirin di Abraham a kāna, “As imom Abraham kan siraw kapotōtan mo saya a somarsarono, ki machita nāw nyo a magtongpal do tōlag kwaya. 10 Nyaw itōlag ko dyimo a machita a magtongpal ka kan siraw tabo kapotōtan mo a machisarono dyimo. Kāda mahakay dyinyo, ki basta makōgit. 11 On, machita makōgit ka, ta nawri danaw pakaboyan a oyod a manganohed ka dyaken kan tongpalen mo tōlag kwaya. 12 Yapo sichangori, kāda maiyanak mahakay a myan danas wawaho a karaw do kāda kapotōtan, machita makōgit. Masaw adedekey a mahahakay do adīpen mo saw a naiyanak do bahay mo kan siraw adīpen a ginātang mod gan-ganaet a dya kapotōtan mo, machita makōgit sa. 13 On, machita makōgit tabo mahahakay a aran adīpen saw a naiyanak do bahay mo mana nagātang mo, tan myan sinyal do inawan nyo a pakaboyan so abos pandan a tōlag ko dyinyo. 14 No mahakay a dya makōgit, ki machita nyo a pasyayen, ta mairāman paba tawo ko. Nawriw pakaboyan a dyi na tinongpal tōlag ko, iyaw dyi na kapagkōgit.”

15 Sinpangan na, minirwa binata no Dyos di Abraham a kāna, “Sarai pabaw panawag mod baket mo. Ta sichangori, Sara‡17:15 No chakey na batahen “Sara,” ki “prinsisa”. danaw ngaran na. 16 Bindisyonan konchi, as maymanganak anchi so asa mahakay a mismo a pōtot mo. On, bindisyonan konchi, tan mayparin a ānang no āro a nasnasyon, kan myan panchiw kadwan a mayparin a āri do kamanganakan na saw.”

17 Do dāwri, nagrōkob si Abraham do tana, as nakamyeng na, ta anohdan naba. Binata na do aktokto na a kāna, “Namna! Makapōtotak pawri a asa gasot danayaw tawen ko, kan maymanganak pawri si Sara a sasyam a poho danayaw tawen na?” 18 Ki binata ni Abraham do Dyos a kāna, “Si Ismael pakono bindisyonan mom ĀPO a magtāwid anchi so tabwaya warawara ko!”

19 Ki tominbay Dyos a kāna, “Engga, ta maymanganak anchi si Sara a baket mo so asa mahakay a mismo a pōtot mo, as pangaranan monchis Isaak.§17:19 No chakey na batahen “Isaak,” ki “mamyeng”. Tabo a naitōlag ko do nakarahan, ki tongpalen konchi di Isaak kan siraw kapotōtan na saw nyaya abos pandan a tōlag. 20 As si Ismael, ki nadngey kwaw inakdaw mwaya maynamot dya. Dawa, bindisyonan ko, as torohan ko so āro a pōtot kan taywaras kāro a kapotōtan na. Ki iyanchiw āmang no asa poho kan dadwa pangōlo,*17:20 Gen. 25:12-18 kan payparinen ko sanchi a rakoh a nasyon. 21 Ki tongpalen konchiw tōlag ko di Isaak a iyanak anchi ni Sara do somaronwaya tawen a akmas nyaya chimpo.” 22 Do nakatayoka no Dyos a naychirin di Abraham, komnaro dana dya.

23 Do dāwri a araw, kinōgit ni Abraham si Ismael a pōtot na. Kinōgit na paw tabo mahahakay do bahay na kan siraw adīpen na saw a naiyanak do bahay na, as kan siraw ginātang na saw akmas inbaheyaw ni Āpo Dyos dya. 24 Ki aran mismo na inawan, ki nagkōgit si Abraham do kapagtawen nas sasyam a poho kan sasyam. 25 As si Ismael, ki nagtawen so asa poho kan tatdo do nakapagkōgit na. 26 Do dāwri a araw, nakōgit sa Abraham kan Ismael a pōtot na a 27 nakairamānan da tabo no adīpen naw a mahahakay a naiyanak do bahay na mana nagātang na.