1 Ki do dāwri, do nakahabasaw no inkeddeng na chimpo, binindisyonan ni ĀPO si Sara, kan tinongpal na akmas inkari naw. 2 As dawa, nabōgi si Sara, kan naymanganak so asa mahakay a aran baket dana kan malkem dana si Abraham. On, naiyanak sigon do chimpwaw a inbahey no Dyos.*21:2 Gen. 17:21; 18:10 3 Pinangaranan ni Abraham so Isaak adekeyaw a pōtot na di Sara, 4 as kinogit ni Abraham si Isaak a pōtot na do chawawaho naw a araw a akmas bilinaw no Dyos. 5 Do nakaiyanakaw ni Isaak, nagtawen dana si Abraham so asa gasot. 6 Binata ni Sara a kāna, “Tinorohan yaken no Dyos so pakayapwan kwa masoyot kan mamyeng,†21:6 No chakey na batahen “Isaak” do chirin Hebreo, ki “mamyeng”. Gen. 17:17-19 kan aran sinonchi a tawo a makadngey, mamyeng sanchi a maynamot do soyot da dyaken.” 7 Binata na pa a kāna, “Ay samna! Sigorādo a abaw manghahaw kan mangibahey di Abraham a mapasoso akos adekey do nakapaymanganak kwaya bakbaketan dana. Ara, ta cha dya inyanak ko nya pōtot na mahakay a aran malkem dana.”

8 Nayparakoh adekeyaw, as naposin. Do dāwri a araw a nakaposin na, namarin si Abraham so rakoh a pasken.

9 Do asa karaw, naboya ni Sara si Ismael a anak ni Agar a taga Egipto, ki myan na roroden a pachigtalan si Isaak a anak na. 10 Dawa, binata ni Sara di Abraham a kāna, “Payyayohen mo may-ānang saya a adīpen, ta maparin aba machipagtāwid anak naya do anak taya a si Isaak.”‡21:10 Gal. 4:30 11 Taywaraw nakariribok ni Abraham do inbaheyayan Sara maynamot ta pōtot na pa si Ismael.

12 Ki inbahey no Dyos di Abraham a kāna, “Chabakel mwabaw may-ānang saya a sa Ismael kan Agar a adipen mo. Parinen mo aran āngo a ibahey ni Sara, ta si Isaak pakayapwan kapotōtan mo saw a inkari ko. 13 As maynamot ta pōtot mo pas Ismael a anak ni Agar a adīpen, parohen konchiw kapotōtan na, as mayparin sanchi a asa nasyon.”

14 Do kamabekasanaw, minhep a naybangon si Abraham, ta pinarobwatan na sa Agar kan Ismael.§21:14 Adekey paba si Ismael do dāwri, ta baro dana. Gen. 16:15-16; 17:25; 21:5 Tinorohan na si Agar so kanen da kan asa sopot a lālat a napno so ranom, as nakaipakachin na sya di Agar. Sinpangan na, pinayam narana sa. Komnaro sa Agar, as nangay sa minidibidi do let-angaw do Beerseba. 15 Do nakatawosaw no bahon daw a ranom, tinokos naw anak naw do sirokaw no mabodis a kayo, 16 as naypabawa so asa gasot ngata kamitros, as nakapaydisna na. Binata nad aktokto na a kāna, “Maitored kwaba chiban anak kwaya a madiman.” Ki do kayan naw a maydisna, tomnanyis si Agar. Aran si Ismael, ki tomnanyis.

17 Ki nadngey no Dyos katanyis no anak naw. Dawa, yapo do hanyit naychirin iyaw anghil no Dyos*21:17 Iyaw anghil no Dyos, ki asaba a naparswa, an dya Dyos a mismo. Gen. 16:7 di Agar a kāna, “Āngo chabakel mom Agar? Mamo kaba, ta nadngey no Dyos katanyisayan anak mwaya. 18 Maytēnek ka, ta mangay mwa kadayen kan ahwahoken anak mwaya. Payparinen konchi a rakoh a nasyon kapotōtan na.”

19 Do dāwri, inpaboya dya no Dyos asaw a akbod. Dawa, yangay ni Agar a inporanom lālataw, as nakapaynom nas anak naw. 20 Binindisyonan no Dyos anak naw do kayan naw a mayparakoh. Minyan do let-ang a Paran, kan nayparin a maganay a mangosar so bai a panganop. 21 Do kayan naw do let-ang a Paran, inpakabahay dya ni ānang na iyaw asaw a taga Egipto.

22 Do dāwri a chimpo, nangay di Abraham sa Āri Abimelek kan si Pikol a iyaw komander dan bōyot na saw. Nakabata na sya a kāna, “Myan Dyos dyimo do tabo parinen mo. 23 Dawa, akdawen ko dyimo a isapata mo do salapen Dyos a dyi mo yaken a loklōkwen kan siraw pōtot ko mana siraw kapotōtan ko. Parinen mo pakono dyaken kan siraw tawotawo ko saya a omyan do tana kwaya a nachiyanan mo a akmas nakāsi ko dyimo.”

24 “On, isapata ko,” tinbay ni Abraham.

25 Sinpangan na, nagriklamo si Abraham di Abimelek maynamot do bobon naw a ināgaw dan adīpenaw ni Abimelek. 26 Ki tinbay ni Abimelek a kāna, “Chapatak kwaba an sino namarin syay. Āngo ta dyi mwa inbahebahey dyaken? Changori paya natonngan ko nya.” 27 Do dāwri, tinorohan ni Abraham si Abimelek so kadwan a karniro kan bāka na, as nakapagtōlag da. 28 Sinpangan na, napatawa si Abraham so papito a mabinayi a orbon do karniro na saw.

29 Ki inyahes ni Abimelek a kāna, “Anghen mo saw pinatawa mwaya a papito a orbon a karniro a mabinayi?”

30 Ki binata ni Abraham a kāna, “Rawaten mo saw papito saya orbon a karniro a mabinayi, as do karawat mwaya sya, paneknekan mwa yaken naychadi so nyaya bobon.”

31 Dawa, napangaranan nawri a tana so Beerseba,†21:31 No chakey na batahen “Beerseba” do chirin Hebreo, ki “Bobon a Nagkaryan” mana “Bobon no Papito”. Gen. 26:33 ta dawriw nagtolāgan da Abraham kan Abimelek.

32 Katayokan nakapagtōlag daw do Beerseba, naybidi dana si Abimelek kan si Pikol a komander dan bōyot na saw do tana dan Pilisteo. 33 Naymoha si Abraham so tamaris‡21:33 Manaro byay no nya kīta a kayo, kan matwa pa. a kayo do Beerseba, as dawriw nagdaydayāwan na si ĀPO a Abos Pandan a Dyos. 34 Nahay a minyan si Abraham do Pilisteo a tana.