1 Do dāwri, minirwa myan kapaychapteng do tana no Kanaan akma do kachimpwaw ni Abraham. Dawa, nayadis sa Isaak do Gerar, do tana ni Abimelek a āri dan Pilisteo saw. 2 Ki napaboya si ĀPO dya, as binata na a kāna, “Mangay kaba do Egipto. Omyan kad tanaya a ibahey konchi a yanan mo. 3 Omyan ka do dyaya tana, ta karwan ko abanchimo, as bindisyonan konchimo. Itoroh konchi a tabo nyaya tana dyimo kan siraw kapotōtan mo. Tongpalen konchiw insapata kwaw di āmang mo a si Abraham. 4 Paypārohen ko saw kapotōtan mo a akmas kāron bitohen do tohos, as itoroh ko dyira a tabo nyaya tana. As maynamot do kapotōtan mo, mabindisyonan sanchiw tabo tawotawo do tanaya.*26:4 Gen. 12:3; 22:18 5 Bindisyonan koymo maynamot ta manganohed dyaken si āmang mo, kan tinongpal naw inbilin ko. On, tinongpal na saw bilbilin, pangeddeng, kan linteg ko saw.”

6 Dawa, minyan sa Isaak do Gerar. 7 Do kaiyahes daw syan mahahakay a taga Gerar an baket nas Rebekka, ki binata na a kakteh na. Inbayataw na, ta mamo an dimanen da, as kahap das baket na. Ta si Rebekka, ki oyod nas kapintas a mabakes.

8 Do kahay daranaw daw da Isaak, naylalawong do bintan si Abimelek a āri dan Pilisteo, ki naboya na a myan a kepkepen ni Isaak si Rebekka a baket na. 9 Dawa, pinatawag na si Isaak, as nakaibahey na sya a kāna, “Namna! Baket mo sawen! Āngo ta batahen mwa kakteh mo?”

Ki tinbay ni Isaak a kāna, “On, mo āri, ata, bata ko an dimanen nyo yaken an ibahey kwa baket ko.”

10 Binata ni Āri Abimelek a kāna, “Ay! Āngo ta komwan pinarin mo dyamen? An myan sawen nangoknod so baket mwaya aket, imo napaygatos dyamen.” 11 Dawa, inbilin ni Abimelek dyirad tawotawo na saw a kāna, “Ipadiman ko aran sino a mamarin so marahet dyirad dyaya maychabahay.”

12 Do dawri a tana, ki naymohamoha si Isaak, as kan do dāwri a tawen, nakaāpit so taywara so kāro, ta binindisyonan ĀPO. 13 Naypāypabaknang a nandad oltimo narana so kabaknang. 14 Maynamot ta āro karniro kan bāka na, as kan āro saw adīpen na, inapālan dan Pilisteo saw si Isaak. 15 Dawa, pinonan daw tabo a bobon a kinadyan no adīpen saw ni āmang na a si Abraham do kabyay na paw.

16 Sinpangan na, binata ni Abimelek di Isaak a kāna, “Maganaganay an karwan mo naw yanan namenaya, ta matortoray ka naya kan yamen.” 17 Do dāwri, komnaro sa Isaak, as nangay a nagtolda do Payahosongan a Gerar. 18 Pinirwa na sa inpakadiw bobon saw a inpakadi ni simna āmang na do kachwaw, ta do nakadiman āmang na, pinonan dan Pilisteo saw. Pinangaranan na saw bobonaw so akmas inpangaranaw ni āmang na.

19 Naychadi saw adīpen na saw so bayo a bobon do payahosonganaw, ki nakakadi sa daw so mayit a akbod. 20 Sinpangan na, nachidiman saw magpaspastoraw a taga Gerar dyirad pagpaspastoren saw ni Isaak, as nakabata da sya a kon da, “Dyamen nyaya ranom!” Nawriw paynamotan na a pinangaranan Isaak so bobon a “Nagsosopyatan.”

21 Somarono, naychadi dana saw adīpenaw ni Isaak so matarek a bobon. Ki alit na, naydidimanan darana. Nawriw nakayapwan na a pinangaranan danan Isaak so “Naydidimanan.” 22 Dawa, komnaro sa Isaak daw, as nakapaychadi nas matarek a bobon na. Do dāwri, apabaw nachidiman. Dawa, pinangaranan nas “Marahawa,” ta binata na a kāna, “Ay, changori dana tinorohan na yaten ĀPO so marahawa a yanan tan maypāro ta dya.”

23 Komnaro daw sa Isaak, as nakangay da do Beerseba. 24 Do dāwri a ahep, napaboya si ĀPO di Isaak, as nakabata na sya dya a kāna, “Yaken Dyosaw ni āmang mo a si Abraham. Mamo kaba, ta rārayayan koymo. Bindisyonan koymo, kan paypārohen ko saw kapotōtan mwa maynamot do kari ko di Abraham a magsirsīrbi dyaken.” 25 Dawa, namarin daw si Isaak so pangidātonan, as nagdaydāyaw di ĀPO. Sinpangan na, nagtolda dana sa daw, as naychadi sa daw adīpen naw so bobon.

26 Sinpangan na, yapo do Gerar, nangay si Abimelek di Isaak. Rinārayayan da si Abimelek da Ahossat a mismo na a mamagbaga kan si Pikol†26:26 Gen. 21:22 iyaw komander dan bōyot na saw. 27 Ki naychirin si Isaak dyira a kāna, “Āngo ta nangay kamo dya? Chapatak ko a ipsok nyo yaken, ta pinakaro nyo yaken do yanan nyo.”

28 Ki initbay da a kon da, “Naon, ata, malawag a naboya namen a oyod a myan dyimo si ĀPO. Dawa, no bata namen, ki maganay pakono an myan tōlag ta a pagkinaryan ta. On, yamen pakono machitōlag dyinyo. 29 Chakey namen a ikari mo a dyi nyo yamen a ranggasan akmas dyi namenaw a nakaranggas dyinyo, ta maynana maganay pinariparin namen dyinyo. On, oyod a pinakaro namen imo, ki aryoriw marahet a pinarin namen dyinyo daw? As sichangori, ki binindisyonan naymo ni ĀPO.” 30 Do dāwri, namarin si Isaak so pasken para dyirad bisīta naw, as komninan kan mininom sa. 31 Do kamabekasanaw, ki nagsapataw katakatayisa dyira a dyi sa maglalāban. Katayoka no nawri, pinarobwatan san Isaak, as naysisyay dana sa a sikakapya.

32 Do dāwri a araw, nangay sad Isaak adīpen na saw, as nakaibahey da sya di Isaak so maynamot do kinadi daw a bobon. Binata da a kon da, “Nakakadi kami naw so ranom!” 33 Pinangaranan Isaak nawri a bobon do chirin da so “Siba.” Yapo do dāwri a araw, nayngaran nawri a syodad so Beerseba.‡26:33 No chakey na batahen “Siba,” ki “kari” mana “papito.” As no chakey na batahen “Beerseba,” ki “Bobon a Nagsapataan” mana “Bobon no Papito”. Gen. 21:31

34 Do nakapagtawen ni Esaw so apat a poho, nangabahay so dadwa mababakes a Heteo§26:34 Siraw sīgod a tawotawo a Heteo, ki yapo sa di Kanaan a pōtot ni Ham a pōtot ni Noyi. Gen. 10:15; 1 Kron. 1:8, 13 a tawo a sa Jodit kan Basemat. Si Jodit, ki pōtot ni Beeri, as si Basemat, ki pōtot ni Elon. 35 Siraw nya dadwa manōgang da, ki siraw nanoroh so rakoh a mamayo da Isaak kan Rebekka.