1 Do dāwri, nadngeyan ni Jakob iyaw riklāmo dan pōtotaw ni Laban a kon da, “Taywara danayas Jakob, ta apīten naranaya tabo dyiran āmang, as kan si āmangayaw nakayapwan tabo kinabaknang na!” 2 Nadlaw pa ni Jakob a tomnabang dana dya si Laban, ta akma pabas kasngen na dya do nakarahan. 3 Do dāwri, binata ni ĀPO di Jakob a kāna, “Maybidi ka na do tana da āmang kan āpong mo, kan dyirad kakabagyan mo saw, as kan myan ako a mangay-aywan dyimo.”

4 As dawa, nanoboy si Jakob so mangay a mangibahey dyirad dadwaw a baket na a sa Rakel kan Lea a mayboboya sa do pamaaraban naw siras binyay na saw. 5 Do kawara da do yanan naw, binata na dyira a kāna, “Natonngan ko a matabang dana si āmang nyo dyaken, ta akma paba do kachwaw. Ki aran komwan, ki nāw na aywanan yaken no Dyosaw a daydayāwen ni āmang ko. 6 Chapatak nyo na an maypāngo kagaget ko do kapaytarabāko ko di āmang nyo. 7 Ki kinōsit na yaken, kan pirmi*31:7 Do Hebreo a chirin, ki “pinay-asa poho”. na binalbalīwan pinakadyira ko a tangdan ko. Ki bāli, ta inpalōbos aban Dyos a rinanggasan na yaken. 8 Ta do kaibahey naw a mabochibochit iyaw binyay a dyira ko a tangdan ko, ki naymanganak sa tabo binyay na so mabochibochit. As do kaibahey naw a orit-oritan iyaw binyay a tangdan ko, ki naymanganak dana sa tabo so orit-oritan. 9 Dawa, oyod a sinidongan ni Āpo Dyos yaken, ta inhap na saw pinakadyira kwaw do dyira saw ni āmang nyo a pinabidi dyaken.

10 “Do naypisa do chimpo no kapagdadakep dan kalding, tinayēnep ko. Ki naboya kwaw do tayēnep ko a siraw tōro a kalding a mangdakep so mabinayi saw a kalding, ki maynana orit-oritan, mabochibochit, kan malabalabang. 11 Sinpangan na, do tayēnep ko, nagparang iyaw anghil no Dyos†31:11 Gen. 16:7; 21:17; 22:11 a nachisarsarīta dyaken, as kan naychirin dyaken a kāna, ‘Jakob.’ Ki inatbay ko a kon ko, ‘Ari ako dya, mo ĀPO.’ 12 Binata na pa, ‘Chiban mo saw tabo tōro saya a kalding a mangdakep. Maynana sa orit-oritan, mabochibochit, kan malabalabang. Yaken akin plāno so nyaya, ta naboya ko tabo marahet a pinarin ni Laban dyimo. 13 Yaken iyaw Dyosaw a napaboya dyimo do Betel a napatnekan mo so pakanaknakman a bato a pinadwan mo so lana, as kan do dawriw, nagsapataan mo dyaken. Changori, karwan mo naw tanaya dya, as kan maybidi ka do nakayanakan mo a tana.’ ”

14 Katayoka no nakapaychirin Jakob, tominbay sa Rakel kan Lea a kon da, “Na, ari pawriw matāwid namen di āmang? 15 Inbidang nabawri yamen a istranghiro sichangori? Pī! Akma naya yamen inlāko, as iyaw kwartaw a pagbāyad mo dyamen, ki nagasto narana. 16 An komwan, masyirto danaw tabo a kinabaknang a inhap no Dyos di āmang namen, ki dyamen dana kan siraw anak namen saya. Dawa, sichangori, parinen mo iyaw inbahey no Dyos dyimo.”

17 Sinpangan na, do nakapakarobwat daranaw da Jakob, pinasakay naw pōtot na saw kan dadwaw a baket na do kamilyo saw. 18 Do dāwri, pinanma na sa a tinoyo tabo reprep saw a binyay na, kan inhap na sa tabo warawara naw a nakpeh na do kayan nad Mesopotamya, as kapaybidi narana do Kanaan a tana ni āmang na a si Isaak.

19 Do kakaro daranaw da Jakob, aba daw si Laban, ta nangay na sa a ginogodan naipastor saw a karniro na. Dawa, nangay pa si Rakel a nanakaw siras didyosen saw ni āmang na. 20 Asa pa, sinikāpan ni Jakob si katogāngan na a si Laban a asa Arameo, ta inbahey naba dyaw nakayam na. 21 Dawa, inhap naw tabo saw a dyira na, as nakapaglības na. Inabtang na iyaw Oksong a Oprates, kan tinongtong naw nayam a kominwan do katokotokonanaw do tana a Gilead.

22 Do chatatdo naranaw a karaw do nakapakakaro daranaw da Jakob, nadāmag ni Laban a naglības si Jakob. 23 Do dāwri, nanyeng na inhap kadwan saw a kakabagyan na, as nakalakat da sa Jakob. Papito a karaw da a nanglakat sira, as nakadas da sira do katokotokonanaw do Gilead. 24 Ki do ahepaw a sakbay a kadas da sira, pinaytayēnep no Dyos si Laban a taga Aram a binata na dya a kāna, “Magannad kam Laban, ta salsalyan mwabas Jakob. Maychirin kaba so aran āngo a maganay mana madi dya.”

25 Ki do dāwri, nadas ni Laban si Jakob. Nagtolda dana sa Jakob do katokotokonanaw do Gilead. As aran sa Laban kan siraw kakabagyan naw, do nakapakarapit daw daw, ki nagtolda sa.

26 Do nakapayboya daw, inyahes ni Laban di Jakob a kāna, “Barok, āngo ta pinarin mo komwan? Sinikāpan mo yaken a tod mo sa inkaro pōtot ko saya a akma say mababakes a natiliw do paggogobatan. 27 Āngo ta linibāsan mo yaken a inkorimed mo komnaro a dya nagpakada? An inbahey mo dyaken, aysa, siraragsak ako a nangparobwat dyinyo so piknik a makankantaan kan matoktokaran so tamborin kan arpa saw. 28 Dyi mo paya yaken a tinorohan so chimpo ko a nangiliw siras apoko ko kan siraw anak ko saya. Samna! Oltimo a makwan nyaya a pinarin mo dyaken! 29 Myan panakabalin ko a mangdōsa dyimo. Ki kahep do nakapaytayēnep ko, naychirin dyaken Dyosaw a daydayāwen ni āmang mo a kāna, ‘Magannad kam Laban, ta salsalyan mwabas Jakob. Maychirin kaba so aran āngo a maganay mana madi dya.’ 30 Chapatak ko a komnaro ka, ta taywara danaw kangsah mo a maybidi do yanan āmang mo. Ki āngo ta tinakaw mo pa saw didyosen ko saw?”

31 Tominbay si Jakob dya a kāna, “On, mo āmang, nayyayo ako, ata, mamo ako ngamin. Ta no myan do aktokto ko, ki āngwan ibabāwi mo saw pōtot mo saya an matonngan mo a komaro ako. 32 As no didyosen mo saw, taywaran yaken nanakaw? Do salapen dan kabagyan ta saya a sistīgo ta, yay mo a chichwasen dyira mo saya bata mo do dya, as hapen mo, as kan dimanen taw nawri a tawo a pakadongswan mo so didyosen mo saya.” Komwan binata ni Jakob, ta chapatak naba a tinakaw ni Rakel didyosen saw ni Laban a āmang na.

33 Maynamot ta komwan inbahey ni Jakob, nangay si Laban do toldaw ni Jakob a naychichwas. Komwan pa a naychichwas do toldaw ni Lea kan siraw dadwaw a adīpen a mababakes, ki abaw nachichwasan na didyosen daw. Do nakahbot naw do toldaw ni Lea, somindep do toldaw ni Rakel. 34 Ki nasakbay nakahap ni Rakel so didyosen saw ni āmang na, as nakaitayo na sira do bolsaw no pasangaw no kamilyo na, as nakadisna na sya. Naychahel si Laban do tabo irahemaw no tolda naw, ki abaw naboya na. 35 Binata ni Rakel di āmang na a kāna, “Makasoli kaba, mo āmang, do dyi kwaya paytēnekan, ta marodit akwaw.” Dawa, tinongtong ni Laban naychichwas, ki abaw naboya na dyirad didyosen na saw.

36 Do dāwri, maynamot ta komwan napariparin, nakasoli dana si Jakob di Laban. Dawa, pinaydabdab nas katogāngan na a kāna, “Aysa! Āngo marahet a pinarin ko dyimo ta dawa? Āngo nakagatosan ko tan lakatan mo yaken, mo Āmang? 37 Changori a tayoka danaw kapaychahel mo do tabo warawara ko, aryoriw naboya mo a dyira mo? An myan, ngay, pangayen mo do kasalasalapan taya tan maboya da no kakabagyan ta saya an sino kosto dyaten. 38 Dadwa poho a katawen a minyan ako dyimo a nagsīrbi. Kinapya ko sa inaywanan karniro kan kalding mo saw tan abo nasday a anak dan pangganakan mo saw, kan abaw inichan ko aran asa malloko a binyay mo. 39 An myanaw dimanen maranggas a animal a binyay mo, ki tod ko a binayādan. Inyangay kwaba inpaneknek dyimo a abo gatos ko. An myan natakaw aran māraw mana mahep, inpapīlit mo a bayādan ko. 40 Āro napadas ko a lidyat do kapangaywan ko siras binyay mo. An māraw, inanōsan ko iyaw kohat no araw. An mahep, inibtoran ko hanebneb. Abaw īmas no kapakaycheh ko, ta napohaw ako pa. 41 Komwan lidyat ko do dadwa poho a katawen a kayan ko dyimo. Nagikāro ako so asa poho kan apat a katawen tan makabahay ko saw dadwaya pōtot mo. Anem pa katawen a inaywanan ko saw binyay mo saw tan myan pinakadyira ko dyirad orbon saw a karniro kan kalding a tangdan ko yapo dyimo. Ki alit na pa pirmi mo a binalbalīwan pinakadyira ko a tangdan. 42 An dyi na sinidongan yaken no Dyos ni simna Abraham a daydayāwen ni āmang ko a si Isaak, pinayam mo yaken a sibahabahas. Ki naboya ni Āpo Dyos an māngo lidyat ko kan kagaget kwa naytarabāko. As dawa, kahep pinaydabdab naymo do tayēnep mo.”

43 Do dāwri, maynamot ta komwan inbahey ni Jakob, tominbay si Laban a kāna, “Tabo myan saya dya sichangori, ki dyaken saw nawri. Ta siraw baket mo saya, ki pōtot ko sabawri? Siraw pōtot mo, ki apoko ko. Tabo binyay mo, ki yapo do binyay ko. Ki aran komwan, maparin kwaba a tod a ahapen saw pōtot kwaya a paybidi sichangori. Masaw dyirad apoko ko saya. 44 Sichangori, ki maganay an magtōlag ta so bayo, as kan pawpohen taw batobato saya a pangpaneknek ta so dyi ta kapagbabāwi do nagtōlagan taya.”

45 Do dāwri, nanghap si Jakob so rakoh a bato, as pinaytēnek na. 46 Sinpangan na, inbahey na dyirad kakabagyan naw a tongtongen daw manghap so bato a pawpohen dad omdibonaw no pinatnek naw a rakoh a bato. Do katayoka daw, naychakakan sa do bītaw no inopo daw a bato. 47 Pinangaranan ni Laban nyaya nawpo a bato so Jegar-Sahadota do chirin na Arameo. As si Jakob, ki pinangaranan na so Galeed do chirin na Hebreo.‡31:47 No chakey na batahen “Jegar-Sahadota” mana “Galeed,” ki “atoy a mangipaneknek”.

48 Binata ni Laban di Jakob a kāna, “Magsīrbiw nya a mangipaneknek so nagtōlagan taya.” Nyaw naynamotan na a napangaranan nya nawpo a bato so Galeed. 49 Binata pa ni Laban di Jakob a kāna, “Si ĀPO pakono pirmi a omchidechideb dyaten do kapaybawa taya.” Dawa, nayngaran paw nawri a nawpo a bato so Mispa.§31:49 No chakey na batahen “Mispa,” ki “panyidechideban”. 50 Tinongtong ni Laban naychirin a kāna, “An ranggasan mo saw pōtot ko saya a baket mo, mana an mangabahay ka pas matarek, aran dyi kwa maboya mana chapatak, naknakmen mo a chichiban na yaten no Dyos a iyaw makapaneknek so nagtōlagan taya. 51 Cha dyaw inopo ko saya a bato kan pinatnek ko a rakoh a bato do payawan tayas changori. 52 Dawa, dyi ta pakono a kawayakan nyaya mohon ta a pamaneknek so tōlag ta. Nya pakono akmay balat an myan marahet a panggep no katakatayisa dyaten. 53 Iyaw Dyos pakono a dinaydāyaw ni simna Abraham, Nahor, kan āmang daw mangokom dyaten an sino dyaten mangrārayaw so tōlag taya.”

Sinpangan na, nagsapata si Jakob do salapen no Dyos a daydayāwen āmang na a si Isaak. 54 Do katayoka da nagtōlag, sinosohan ni Jakob do dawri a tokon asaw a binyay a indāton na do Dyos. Sinpangan na, tinawagan na saw kakabagyan naw a machakan dya.*31:54 No kapangidātonaya ni Jakob, ki tan magyāman sa do Dyos mana tan masigorādo danaw tinōlag da Jakob kan Laban. Sigon do dadakay da, tinawagan ni Jakob siraw rārayay naw a koman tan ipaboya na a tayoka danaw kapagtōlag da kan Laban kan maparin paba tadyan. Sinosohan naw kadwan a partis no binyay a indāton na do Dyos. As no kadwanaw, ki inichan da. Katayoka da, minisan dana sa daw. 55 Do kamabekasanaw, minhep a naybangon si Laban a nangdadek siras apoko naw kan siraw dadwaw a pōtot na a mabakes, as binindisyonan na sa. Katayoka na, komnaro dana sa Laban daw a somnabat do tana da.