1 Do kakaro naranaw ni Jakob do Penwel do napabtangan naw siras pamilya naw, naboya na a tominyitinyi sa Esaw a kakteh na a kontodo apat saw a gasot a mahahakay a rārayay na. As dawa, bininglay na saw pōtot na saw di Lea kan Rakel kan siraw dadwaw a adīpen na a mabakes. 2 Pinanma na saw dadwaw a mababakes a adīpen kontodo anak da saw, as nakasarono ni Lea kan anak na saw. Kapanawdyan na, ki si Rakel kan Jose a anak na. 3 Ki si Jakob, iyaw kapanoman a nangay a minbayat di Esaw. Naypapito a nagrōkob do tana do kapaypasngen naw do yananaw ni ākang na.

4 Ki do nakaboyaw sya ni Esaw, nakapayapayyayo na a nangay a minbayat sya. Kinepkep kan dinadek ni Esaw ādi naw. Tomnanyis sa a dadwa. 5 Do nakabangon naw ni Esaw so oho na, naboya na saw mababakes saw kan siraw adedekeyaw a minonot di Jakob. As dawa, inyahes na di Jakob a kāna “Sino saw nyaya a tawo a nachirayay dyimo?”

Ki tominbay si Jakob dya a kāna, “Ay, siraw nya adedekey, ki pōtot ko sa a intoroh no Dyos dyaken a tobotoboyen mo maynamot do kāsi na.” 6 Do dāwri, naypasngen saw dadwaw a adīpen ni Lea kan Rakel kontodo saw anak da saw, as nakapagrōkob da a nangipaboya so kapagdāyaw da di Esaw. 7 Somnarono, naypasngen sa Lea kan anak na saw, as nakapagrōkob da. Nanawdyi sa Jose kan si Rakel a nagrōkob a nangipaboya so kapagdāyaw da.

8 Sinpangan na, inyahes ni Esaw dya a kāna, “Aysa! Āngo chakey a batahen no bonggoy saw no binyay a pinanma mo a nabayat namen?”

Ki nyaw inbahey ni Jakob a kāna, “Na, dyira mwaw, aram pa yaken a marawat, mo āpo.”

9 Ki initbay ni Esaw a kāna, “Namna, manawob dana saw myanaw dyaken, mo Ādi. Hapen mo na, ta dyira mo na sa.”

10 “Engga ah!” kāna ni Jakob. “An chasoyot mo na yaken, rawaten mo saw panangpet kwaya dyimo. Ta do nakaboya kos kasoyot mo do rōpa mo, ki akma ko nayaw naboyaw parabor no Dyos dyaken do siaadawaya nakarawat mo dyaken. 11 Dawa, rawaten mo pakono panangpet ko saya, ta rakoh kāsi dyaken no Dyos, as kan apabaw pagkorāngan kod machita ko.” Inibhes aba ni Jakob mandan rinawat ni Esaw iyaw sāgot na dya.

12 Do nakatayoka dan may-ākangaw a nagsarita, binata ni Esaw a kāna, “Na, magrobwat ta na, as machirayay ako na dyinyo.”

13 Ki do dāwri, tominbay si Jakob dya a kāna, “Naon, mo āpo ko, ki chapatak mo a mabalabalay kami a mayam, ta makakapsot saw adedekey kwaya. Asa pa, mabakel ako an madiman sa tabo orbon sayan karniro kan bāka an makalokalo sa do asa karaw a mayam. 14 Dawa, maganaganay danāno an imo manma, mo āpo ko? Mononot ako na a adīpen mo sigon do kalisto dan binyay kwaya kan siraw pōtot ko saya. Rapiten namen dananchi imo, mo āpo ko, do Edom.”

15 Ki binata ni Esaw a kāna, “Na, an komwan, bidinen ko saw kadwan saya a mahahakay a rārayay ko a machirayay dyinyo.”

Ki inbahey ni Jakob a kāna, “Aran engga dana. Manawob dana dyaken iyaw kāsi mwaya dyaken mo āpo.”

16 Dawa, do dāwri a araw, komnaro sa Esaw a naybidi do Edom. 17 Ki sa Jakob, nangay sa a nagkampo do Sokkot. Namarin daw so bahay a panarasan na kan sapaw da no binyay na saw. Nyaw paynamotan na a nayngaran so Sokkot, ta no chakey na batahen, ki sapaw.

18 Naynam saba do Sokkot, as nakatongtong da a nayam. Do dāwri, nakarapit sa Jakob a dya naan-ano a yapo do Mesopotamya a nandad idi a Sikem do tanaw a Kanaan. Nagtolda sa do mangket do dāya do dawri a idi. 19 Sinpangan na, ginātang naw nawri a tana a nagtoldaan da. Binayādan nas asa gasot a plata a pirak dyirad kapotōtan saw ni Hamor a āmang ni Sikem. 20 Namarin sa Jakob so asa a pangidātonan do Dyos, as pinangaranan na so El-Elohe-Israel.*33:20 No chakey na batahen “El-Elohe-Israel,” ki “No Dyos, ki Dyos ni Israel” mana “Mabīleg iyaw Dyos ni Israel.” Gen. 32:28