1 Naynam aba do dāwri a chimpo, komnaro si Joda do yanan daw no kakakteh na saw a mahahakay, as nangay a nachikaaroba di Hira a asa mahakay a taga Adollam. 2 Dawriw nakaboyan ni Joda so asaw a mabakes a taga Kanaan a pōtot ni Swa. Kinabahay ni Jodaw nawri a mabakes. 3 Sinpangan na, nabōgi, kan naymanganak nawri a mabakes so asa mahakay a pinangaranan ni Joda so Er. 4 Minirwa nabōgi si baket ni Joda, kan nangyanak so mahakay a pinangaranan nas Onan. 5 As minirwa pa naymanganak so asa mahakay a pinangaranan na so Sela. Do nakayanakaw ni Sela, ki omyan sa Joda do asa yanan a mayngaran so Kesib.

6 Sinpangan na, do nakapaypahabas no āro a tawen, inpakabahay ni Joda si Er a matoneng a pōtot na do asaw a mabakes a mayngaran so Tamar. 7 No pinarin ni Er a matoneng a pōtot ni Joda, ki taywara a marahet do kapanyideb ni ĀPO. Dawa, binitos ni ĀPO byay na. 8 Sinpangan na, binata ni Joda di Onan a adyen Er a kāna, “Kabahayen mos Tamar a ipag mo a nabālo. Basta tongpalen mo dadakay taya an āngo rebbeng mo do ipag mo a nabālo a abos anak, tan makapōtot ka so mayparin a pōtot no nadimanaw a ākang mo.” 9 Ki chapatak ni Onan a maibidang aba pōtot naw maipōtot naw. Dawa, kāda kaoknod na si Tamar a ipag na, ki ipoha naw mayparin naw a adekey, tan dya makapōtot so maibidang a pōtot ni simna Er a ākang na. 10 No pinarin ni Onan, ki taywara a marahet do kapanyideb ni ĀPO. Dawa, aran si Onan, ki binitos ni ĀPO byay na.*38:10 Deot. 25:5-10

11 Maynamot do dyaya naparin, binata ni Joda di Tamar a manōgang na a kāna, “Maybidi ka pa di āmang mo, kan mangabahay kaba mandan makarakoh si Sela a pōtot ko.” Inbahey naw nyaya, ta mamo an madiman si Sela a akma siras pōtot na saw a dadwa. Dawa, nangay si Tamar di āmang na.

12 Sinpangan na, homnabas āro a chimpo, as nadiman iyaw baketaw ni Joda, iyaw pōtotaw ni Swa. Do katayokaw no kapagmamayo naw, nagrobwat si Joda a mangay do Timnat do panggogogodan daw so karniro na saw. Nayrayay sa kan Hira a sīt na a taga Adollam. 13 Do dāwri, myan nakaibahey so nyaya di Tamar a kāna, “Nagrobwat kono si katogāngan mo a mangay do Timnat a manggogod siras karniro na saw.” 14 Dawa, tinādyan ni Tamar laylay naw a laylay no bālo, as nakaabōngot nas oho naw kan rōpa naw tan abo makailāsin sya. Sinpangan na, nangay a naydisna a nanala do asdepanaw do idi a Enaim, ta dawriw rarahan a mangay do Timnat. Pinarin Tamar akma syay maynamot ta chinapatak na a rakoh dana si Sela, ki inpakabahay aba ni Joda dya.

15 Do nakaboyaw sya ni Joda, bata nan asa mabaybayādan a mabakes maynamot ta nataloban iyaw rōpa naw. 16 Dawa, naypasngen do yanan naw do bītaw no rarahan, as nakabata na sya a kāna, “Ngay, mayoknod ta sichahep.” Ki chapatak naba a si Tamar a manōgang na.

Ki tominbay si Tamar a kāna, “Āngo itoroh mo dyaken tan pagostwan koymo?”

17 “Paiyangayan konchimo so orbon no kalding ko,” initbay ni Joda.

“On, an torohan mo yaken so pakaboyan a mandan paiyangay mo nawri a orbon,” binata ni Tamar.

18 Inyahes ni Joda dya a kāna, “Āngo a pakaboyan chakey mo?”

Ki binata ni Tamar a kāna, “Iyaw saryo mwaya konso bato†38:18 Iyaw saryo konso bato, ki akmay singsing, kan maparin aba paysyayen. Iyaw nya, ki pangilasīnan so mabaknang a tawo, kan pangilasīnan pa so katatawo no akin dyiraw. No kaosaran no bato naw, ki pangtatak na so naitolas a kari na. kan igpet mwaya sarokod‡38:18 Iyaw sarokod, ki myan naikitikit a pagilasīnan so akin dyiraw. Siraw ohwaw no sarokod da saw do kaychowa, ki naikitikit sabong, protas, mana manomanok. mo.” Dawa, intoroh ni Joda saw nya inakdaw na. Nayoknod sa, as nabōgi si Tamar. 19 Katayokan nyaya, naybidi si Tamar do bahay naw, as nakapakaro na so abōngot naw. Nakapirwa na nagsokat so laylayaw no bālo.

20 Do nakapakarapit ni Joda do kwanan naw, ki tinoboy na si Hira a sīt na a taga Adollam a mangyangay so kaldingaw a orbon, as kahap na siras pakaboyan naw a binidin nad mabakesaw. Ki nachichwasan paba ni Hira. 21 Dawa, inyahes ni Hira dyirad mahahakayaw daw do idi a Enaim a kāna, “Chapapatak nyo abaw mabaybayādanaw a mabakes a para do pakaidaydayāwan no didyosen taw dya,§38:21 Siraw mabakes a mabaybayādan a masīrbi dyirad didyosen saw no Kananeo saw a tawo, ki magabōngot sa. iyaw maydidisnaw do bitayan rarahan?”

Ki binata da a kon da, “Namna, abaw komwan a mabakes dya.”

22 Katayoka no nawri, naybidi si Hira do yananaw ni Joda, as binata na a kāna, “Nachichwasan ko pabaw mabakesaw. Inyahes kwaw dyirad mahahakay saw daw, ki binata daw a aba kono komwan a mabakes daw.”

23 Binata ni Joda a kāna, “Nolay mwa kapyahen naw pakaboyan saw a intoroh ko dya. Chakey kwaba chamimyeng da yaten no tawotawo. Bāli, ta pinādas kwaya inpayangayan so orbon a kalding, ki naboya mwabaya.”

24 Katayoka no tatdwa kabohan, myan nakaibahey di Joda so nyaya a kāna, “Nayparin kono si Tamar a iyaw manōgang mwaw a mabaybayādan a mabakes, ta ari dana mabōgi.”

Do nakadngeyaw syaw ni Joda, inbilin na a kāna, “Yangay nyo a hapen, ta sosohan ta a sibibyay a sigon do dadakay ta!”

25 Do kapahtot daw si Tamar, inpaibahey naw nyaya di katogāngan na a kāna, “Binōgyaw yaken no akin dyiraw so nya saya. Chiban nyo an sino akin dyira siras nyaya saryo konso bato kan sarokodaya.”

26 Nailāsin ni Joda a siraw dyira naw. Binata na a kāna, “Ayya! Malinlintegaya si Tamar kan yaken, ta pinarin kwabaw rebbengen ko dya a inpakabahay ko si Sela a pōtot ko.” Katayokan nawri, polos a dyi dana minirwa nachoknod di Tamar.

27 Do nakarapitaw no araw a kapaymanganak ni Tamar, napatakan a singin saw anak naw. 28 Do kapagpasikal naw, minohtot asaw a tanoro no adekeyaw. Inigpet no partīraw, as nakaytan na sya so mabaya bolabola. Binata na a kāna, “Nyaw pakaboyan sya a nanomaw nya.” 29 Sinpangan na, minisek tanorwaw no adekeyaw. Ki do nakaysek naw, naychihat a nayanak iyaw kasingin naw a mahakay. Binata no partīraw a kāna, “Namna! Pinīlit mwayaw minohtot!” Dawa, napangaranan so Pares*38:29 No chakey na batahen “Pares,” ki “mohtot”. adekeyaw. 30 Katayoka na, nachitādi a minohtot kasingin naw, ki mahakay dana. Iyaw nyaw naytananaw so tanoro so mabaya bolabola. Napangaranan nyaya adekey so Sera.†38:30 No chakey na batahen “Sera,” ki “mabaya”.