1 Kinepkep ni Jose si āmang na a tomnanyitanyis, kan dinadek naw rōpa naw. 2 Katayoka na, binilin ni Jose siraw mangāgasaw a magsīrbi dya, tan balsamaren da si āmang na. Dawa, binalsamar da. 3 Apat a poho a karaw iyaw pinarin da, ta nyaw gagāngay a kahay no kapagbalsamar. Nagmanmanto saw taga Egiptwaw so papito a poho a karaw a maynamot do nakadiman ni āmang ni Jose.

4 Do katayokaw no chimpo no nakapagmanto da, binata ni Jose dyirad opisyalis saw no āri a kāna, “An chāsi nyo yaken, ibahey nyo nya saya chirin ko di Paraon a kon nyo, 5 ‘Do kakalo a madiman ni āmang ko, pinagsapata na yaken a itābon ko do tanem na do aschipaw a inpabangbang na do tana a Kanaan. Dawa, palobōsan mo pakono yaken a mangay a mangitābon si āmang ko. Ara, ta maybidi akonchi.’ ”

6 Ki nyaw inbahey ni Paraonaw a kāna, “On, yangay mo a itābon si āmang mo a akmas insapata mo dya.”

7 Do dāwri, inyangay ni Jose a intābon si āmang na. Minonot sa di Jose a mangay do Kanaan tabo opisyalis saw ni Paraon, siraw panglakayen saw do palasyo na, as kan siraw tabo pangpangolwen saw do Egipto. 8 Minonot saw tabo a pamilya ni Jose, siraw mahahakay a kakakteh na kan tabo a pamilya ni āmang na. Sira danaw adedekey da saw kan siraw karniro, kalding, kan bāka da saw nabidin do tana a Gosen. 9 Myan pa saw soldādo a nachisakay do logan sa a pachigobat kan nakakabalyo a minonot di Jose. Taywaraw kāro no bonggoy da.

10 Do nakapakarapit daw do pangirkan daw do Atad do dāya naw do Oksong a Jordan, kinalyak daw nagdongdong-aw. Do dāwri, papito a karaw a pinarin ni Jose iyaw dadakay daw a kapagdongdong-aw. 11 Do nakaboya daw no omidyaw do Kanaan so nyaya kapagdongdong-aw da do Atad, binata da a kon da, “Taywaraya makapaynyin nyaya a kapagdongdong-aw no taga Egipto saya.” Dawa, nayngaran nawri a logar do dāya nad Jordan so Abel-misraim.*50:11 No chakey na batahen “Abel-misraim” do chirin a Hebreo, ki “dongdong-aw dan taga Egipto”.

12 As dawa, pinarin dan pōtotaw ni Jakob iyaw inbilin naw dyira, 13 ta inyangay daw bangkay naw do tana a Kanaan, as intābon da do aschipaw a myan do bengkag no Makpela do dayāen logar a Mamre. Iyaw nya aschip kan bengkag, ginātangaw ni Abraham di Epron a Heteo tan payparinen na pangitabōnan. 14 Katayoka ni Jose a nangitābon si āmang na, naybidi do Egipto kontodo siraw kakakteh na saw kan siraw tabo tawotawowaw a minonot dya do kaitābon ni āmang na.

15 Katayoka no nakadimanaw ni āmang da, namo saw mahahakayaw a kakakteh ni Jose. Binatabata da a kon da, “Āngwan ari pa yaten ni Jose a ipsok, as bahsen na yaten do marahetaw a pinarin ta dya do kachwaw?” 16 Dawa, nyaw inpaibahey da di Jose a kon da, “Sakbay a nadiman si āmang, 17 inbilin na dyamen a ibahey namen dyimo nya a kāna, ‘Pakawanen mo pakono saw mahahakay a kakakteh mo do gatos da dyimo kan do marahetaw a pinarin da dyimo do kachwaw.’ Dawa, chāsi mo pa yamen, yamen a magsirsīrbi do Dyos ni āmang mo, ta pakawanen mo pa yamen do gatos namen dyimo.” Tomnanyis si Jose do nakadāmag naw so nyaya.

18 Sinpangan na, siraw kakakteh naw, ki nangay sa di Jose, as nagrōkob sa do tana do salapen na. Binata da a kon da, “Cha kami dya a mayparin a adīpen mo.”

19 Binata ni Jose dyira a kāna, “Mamo kamo aba, ta polos a dyi kwa salsalyan chakey no Dyos. 20 Panggep nyo mamarin so marahet dyaken do kachwaw, ki pinayparin no Dyos a maganay a akmas naparinaya changori tan dya madiman āro a tawotawo do kapteng.†50:20 Rom. 8:28 21 Dawa, abaw chamo nyo, ta yaken makatoneng dyinyo kan siraw kamotdehan nyo.” Do dāwri, inahwahok na sa do makadadaw saw a chirin na a pinapaydamnay so kapangtokto da.

22 Tinongtong ni Jose iyaw minyan do Egipto kontodo saw tabo a pamilya ni āmang na. Magtawen so asa gasot kan asa poho do kadiman na. 23 Ki sakbay no kadiman na, naboya ni Josew apoko na saw do toben yapo dyirad pōtotaw ni Epraim. As do kaiyanak dan apoko naw do tōd a siraw pōtotaw ni Makir a pōtot ni Manasses, sinapnyi sa ni Jose do yanan tōd na.‡50:23 No chakey na batahen nya dadakay a “sinapnyi do yanan tōd,” ki inbidang na saw adedekeyaw a dyira na. Gen. 48:12

24 Do asa karaw, binata ni Jose dyirad kakakteh na saw a kāna, “Makalo danaw kabitos no anges ko. Ki aran komwan, chapatak ko a no Dyos masigorādo a mangaywan dyinyo. Ikaro nanchinyo do dya a tana, as paybidihen nanchinyo do tanaw a insapata na da simna Abraham, Isaak, kan āmang tas Jakob.” 25 Katayoka na, pinagsapata na saw kapotōtan no Israel a kāna, “Masigorādo ko a no Dyos, ki mangaywan dyinyo, as anchan pabidihen naynyo do dawri a tana, isapata nyo dyaken a panawbi nyonchiw tohatohang ko.” 26 Nadiman si Jose do kapagtawen na so 110. Binalsamar da iyaw inawan na, as nakailongon da sya do Egipto.