1 Do chadadwa naw a katawen a nakapagtoray ni Āri Daryos do Persya, do dāmwaw a araw do chanem naw a bohan,*1:1 Iyaw nawri a araw, ki Agosto 29, 520 B.C. As si Āri Daryos do Persya, ki nagtoray do tawen a 522-486 B.C. inpakatoneng ni ĀPO minsāhi naw di propīta Haggeo. Iyaw nya minsāhi, ki para do gobirnadoraw do Joda a si Serobbabel†1:1 Si Serobbabel, ki yapo do kapotōtan Dabid. Iya, ki apoko ni Jehoyakim a āri do Joda. 2 Ār. 24; Esr. 3:2; Mat. 1:12 a pōtot ni Salatiel. Masaw di Joswe‡1:1 Si Joswe, ki iyaw katotohosan a pādi do damdāmo paw no nakapaybidi dan tawotawo yapo do nakaakaw daw yapo do Babilonya. Iyaw āpong na a si Serayas, ki inpadiman ni Āri Nebokadnessar do Babilonya do nakasākop naw kan bōyot na saw do Jerosalem. 2 Ār. 25:18-21; Esr. 5:1-2; Sak. 3:1, 8 a pōtot ni Jehosadak a iyaw katotohosanaw a pādi.

2 Nyaw batahen ni ĀPO a Manakabalin do Tābo di Haggeo a kāna, “Batahen daw no nya tawotawo a kon da, ‘Ari na pad chimpo§1:2 No kapangtokto dan kadwan a maynamot do chimpo no kapatnek so Timplo, ki nayahen daw pandan no papito a poho a katawen. Jer. 25:11; 29:10 iyaw mirwa a kapatnek so Timplo.’ ”

3 Sinpangan na, inpakatoneng ni ĀPO minsāhi naw di propīta Haggeo para dyirad tawotawo saw a kāna, 4 “Inyo a tawotawo ko, āngo ta omyan kamo do magaganay a bahabahay nyo, ki tori dana makabakabaw Timplo kwaya?”

5 Nyaw inpakatoneng pa ni ĀPO a Manakabalin do Tābo a kāna, “Kapyahen nyo a iktokto pariparinen nyowaya. 6 Kināro nyo naymohamoha, ki dēkey naāpit nyo. Koman kamo, ki chabsoy nyo aba. Minom kamo, ki makaywaw kamwaba. Maylaylay kamo, ki makakekeh aba dyinyo. Naytarabāko kamo a myan so tangdan, ki tod nyo a kinapya do botbot a pitāka nyo.”

7 Nyaw inpakatoneng ni ĀPO a Manakabalin do Tābo a kāna, “Kapyahen nyo a iktokto pariparinen nyowaya. 8 Somonget kamo do paytoytokonan saya, as manongeh kamo so kayokayo. Iyosok nyo saw toroso, kan patneken nyo Timplo kwaya a mirwa tan mahwahok ako kan maidāyaw ako,” batahen ni ĀPO. 9 Tinongtong ni ĀPO a kāna, “Āro hinahaw nyo a āpit nyo. Ki chiban nyo, nayparin a dēkey. As do kaisabat nyowaw sya, pinasayaw ko pa. Āngo ta pinarin ko nya?” batahen ni ĀPO a Manakabalin do Tābo. Batahen na pa a kāna, “Maynamot ta nakabakaba danaw Timplo ko, as katakatayisaya dyinyo mangigodegodes so bōkod na bahay. 10 As dawa, maynamot dyinyo, pinenpen no kahanyihanyitan iyaw apon, as kan pinenpen no tana iyaw mohamoha a tomobo. 11 Pinagtīkag ko tana kan paytoytokonan tan pahayohen nanchiw paray, asin ōbas kan olibo kan tabo a tomobo do tana. Maynamot do tīkag, maglak-am anchiw tawotawo, binyay, kan tabo nayhohopagan nyo a inmoha.”

12 Do dāwri, si Serobbabel a pōtot ni Salatiel, si Joswe a pōtot ni Jehosadak a katotohosan a pādi, kan tabo tawotawo saw a nakapaybidi yapo do nakaakaw daw do Babilonya,*1:12 Mana “tabo tawotawo saw a natokos a dya nangay do nakaakaw daw no kadwan do Babilonya”. ki tinongpal daw bilinaw ni ĀPO a Dyos da. On, do nakadngey daw so minsāhyaw ni propīta Haggeo a tobotoboyen ni ĀPO a Dyos da, ki chinamo da si ĀPO kan tinongpal da.

13 Sinpangan na, inpakatoneng ni Haggeo a tobotoboyen ni ĀPO iyaw minsāhi ni ĀPO dyirad tawotawowaw a kāna, “Yaken, ki myan ako dyinyo, kāna ni ĀPO.”

14 Sinalid ni ĀPO gobirnadoraw do Joda a si Serobbabel a pōtot ni Salatiel. Masaw di Joswe a pōtot ni Jehosadak a katotohosan a pādi. Masaw sinalid na a tabo tawotawo saw a nakapaybidi yapo do nakaakaw daw do Babilonya. Nangay sa kan inrogi daw maytarabāko do Timplo naw ni ĀPO a Manakabalin a Dyos da, 15 do chadadwa naw a poho kan apat a karaw, do chanem naw a kabohan, do chadadwaw a katawen†1:15 Iyaw nawri a araw, ki Sikchimri 2, 520 B.C. no nakapagāri ni Āri Daryo.